Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Chok-chiá: 陳柏壽
六月初西北部西雅圖才開始感覺著春風來到。今仔日已經看著二擺蜂鳥飛來阮兜吸花蜜。第一擺聽著 sih-sut-á（蟋蟀仔）佇土跤吱吱叫，吱真大聲，kap 杜猴、烏龍仔合奏自然和音ê交響樂，南洋鯽仔佇魚池仔面吸空氣， hō͘ 我這個南國出身 ê 台灣囡仔 kimochi （気持ち）一直giang起來。阿公佇溪邊厝庄 ê 厝頭前園仔，chit-má 應該是柑仔、檸檬、暹邏文旦 teh 開花，sabojira（人參果）開始結子ê時陣。In 攏喚醒我靈魂內面上深 ê 所在永遠 ê 故鄉形影。
Tòa 美國久 ah 嘛 tòe 美國 ê 大自然心情變化。2004年佇 New York ê 時陣發現公園內攏是 siân（蟬）ê 聲。今年美國東部發現所有 ê 蟬 koh 轉來 lah，原來蟬 ê 幼蟲藏入去土跤，17冬是一个週期，in 會 koh 轉來。今年是2021年，是 in koh 轉來土頂 ê 時陣，所以 chit-má 美國東部公園內攏是蟬 ê 世界，真鬧熱。上帝 hō͘ 蟬 ê kiáⁿ 鑽入土跤約3公尺，親像花 ê 種子藏佇土跤瓣準備欲開，但是著經過17年，伊才欲起來看日頭，起來地面開花，後擺 in koh 轉來，就是2038年啊！生物界有 in 性命 ê 週期，非常奇妙，hō͘ 咱知影世間萬物攏有伊ê定時。我連 teh 睏 toh 有聽著蟬 teh 叫 ê 聲，hō͘ 人加真好睏。
咱台灣人猶無真注意地球溫暖化 ê 問題，西方 ê 智識界已經真普遍注意 koh 行動。瑞典 ê 一位十幾歲查某囡仔 Greta Thunberg 佇聯合國全體代表面前演講，伊講：「恁遮 ê 大人實在毋知死活！一日到暗 kan-na 講經濟，kan-na 欲趁錢，恁偷提阮 ê 青春 kap 希望，用恁空洞 ê 話語，將阮細漢時陣 ê 夢消滅，漸漸將咱這粒地球 chhōa-khì 絕滅 ê 邊緣。」 遐 ê 坐 teh 聽 ê 大人，in ê 心內攏聽有，攏知影伊講ê真有道理；m̄-koh in一踏出門，心肝就去hō͘錢淹過。至少，人若是有講，就會去想，有想；就會有行動。
當我高一ê時，一个人用冒險 ê 心，茫茫來到教會門口，揀一个倚近大門 ê 椅仔，坐佇 hia 聽人講道。後來有一个大姊頭仔送我一个白金色 ê 十字架，我 mo̍͘h 佇手心，心內非常歡喜，按呢經過幾仔年，深信我這隻鳥鼠入去教會 m̄ 免驚，因為教會無貓仔。這个十字架真正支持我天真瀾漫青春生涯。結婚了後，我ê十字架煞變做黑色，因為日 kap 瞑攏佇世間趁錢 ê 機器絞輾轉，認定世間實在無比趁錢卡重要。按呢經過十外冬。後來我去神學院讀冊，koh 做牧師40冬，我 ê 十字架煞變紅色，因為主耶穌 ê 救恩是紅色ê血，紅色 ê 十字架變做我 ê人生指標。自退休轉來西雅圖十外年，我煞發現我 ê 主耶穌 ê 十字架變做綠色，親像我 ê 故鄉 ê 蕃薯園 kah 甘蔗園，一片綠海，風若吹來，一湧一湧，親像海水。
我發現綠色是世間生物 ê 共通色，是人類生存 ê 倚靠，世間見若是人攏只有靠綠來生存。當初上帝佇伊甸樂園，就交代咱人類著好好「保存照顧」這个土地（創世記2章15節），但是人一直踳踏、加毒、破壞咱跤底 ê 這塊土地。真濟宗教人極加強調「社會正義」，講按呢表示 in 有遵照上帝ê教示；chóng–sī上帝 ê 教示猶有另外一爿叫做「自然正義」，咱若是無疼惜跤底這塊土地，若是想講趁錢會當彌補對自然ê破壞，就是犯罪，是犯真重 ê 罪，有一日上帝一定會給咱刑罰，因為自然袂 koh 轉來。有錢人欲擔當 ê 罪 kap 刑罰愈重，因為 in 愈有錢，愈無行動。
一年四季 ê 巔峰是夏天，夏天是地上所有性命活動 ê 中心，所有綠色 ê 生命攏活佇夏天。但是夏天並無永遠佇 leh， 夏天真緊就會消失。夏天「永遠 teh 變遷」，「永恆」在佇「暫時」，這就是世間 ê 逆理。咱 ê 性命嘛是按呢。真濟中國教科書講咱人著追求「留芳萬世」。顛倒反，我想咱人著學習夏天 ê 精神，就是綠色 ê 世界 ê 精神：當綠來世間 ê 時，緊緊來，烘烘烈烈、熱滾滾做伙來。但是咱 m̄-thang 期待綠留佇世間外久，伊緊緊來，嘛緊緊轉。性命ê意義我想就是親像一陣夏天ê清風， hō͘ 人想著就心滿意足， hō͘ 人非常清爽ê 懷念。啊，綠 ê 世界，請你緊轉來！嘛請你 m̄-thang 遐爾緊去！請你帶綠色 ê 十字架來到新天新地ê世界。
