◎ 阿表
Ùi 開始食三塊十箍 ê 俗麭年代開始，露螺麭、波蘿麵包是三塊十箍內底逐擺一定 lóng 會出現 ê 基本盤。行入去這間佇現代看起來真袂時行，佇舊時應是 siak-phāⁿ（鑠奅）ê 店，一位少年頭家用無啥物氣力 ê 氣口 kā 阮招呼。
平常時，我家己買麭三分鐘 tō 會當解決，因為我愛食台灣這款油光油光 ê 麭，所以入店進前，我家己會先佇外口相好敢有我欲買 ê 麭。若是 kah 阮翁做伙，我 tō 愛開淡薄仔時間 kā 伊紹介店內底 ê 麭。
佇阮翁某討論麭 ê 過程，少年家問我：「請問你們在說法語嗎？」
我幌頭應講：「m̄ 是，阮是 teh 講德語。」
我 ê 回答可能有去揤著少年家佗一个開關，伊開始紹介遐 -ê 連阮翁家己攏無啥興趣 ê 麭。阮恬恬仔聽伊 ê 分享，也分享阮家己佇德國食麭 ê 習慣。
過無偌久，一位序大人 ùi 外口行入來。伊一看著阮 to̍h 講：「來坐 lah，欲食 lêng-géng（龍眼）無，阮家己種–ê」。
佇我欲開喙時，少年家講：「人怹聽無台語 -lah」。
我微微仔笑無接少年家 ê 話。「多謝，真濟冬無機會食著 lêng-géng，佇外頭數念伊，轉來欲揣伊又 koh 定定 m̄ 著時，這回著時轉來煞袂記得愛食伊。」
我 ùi 序大人彼雙厚 koh 結趼 ê 手接過 lêng-géng，紲手挈一粒問阮翁：「Probieren, lêng-géng？」（欲試食龍眼無？）阮翁問：「台灣荔枝？Litschi？」
「遮無荔枝，無通請恁，真歹勢。」序大人講。
聽了，我緊說多謝。佇阮翁試食龍眼 ê 時，序大人講一句我這幾年轉來台灣所學著 ê 代誌。
「小姐，你 ê 台語講了真輾轉，佗位學–e？」
「佇阿母 ê 腹肚 tō 學矣。」我微微仔笑 kā 應，心肝蒂仔有足濟 m̄-kam。因為，我想著彼年參朋友去參加伊 ê 朋友 ê 烘肉會。
彼時，有兩位 96 歲 hām 102 歲 ê 阿媽坐佇邊仔，in ná 開講 ná 看阮遮 ê 囡仔 teh 烘肉。可能是數念家己 ê 序大人，我行過去參這兩位阿媽破豆。兩位阿媽雄雄 tùi 我講：「小姐，你 m̄ 是講英文？台語 ná 會遮輾轉，比阮孫 koh 較 gâu。」聽著這句話，真 m̄-kam 阿媽。因為，我想著家己 ê 親情，有人參孫講台語，sòa hō͘ 家己 ê 新婦講會 hō͘ 囡仔 ê 英文腔口歹聽……
Mā 想著幾年前，阮翁 ê 同事𤆬拄結婚 ê 台灣太太來阮兜行跤花。這位台灣太太英文無幾句，德文無半句。伊聽我參 in 某冇談 ê 聲調，若親像 in 某 ê 阿媽 teh 講話 ê 聲調。伊問我：「你是 m̄ 是講台語？」
「是啊，是台語啊。」我答。
阮翁 ê 同事目頭 liap 一下，用歹勢 ê 口氣講：「阮某講彼是無水準、無讀冊 koh m̄ 捌字 ê 人才會講 ê 話。」我無回答伊 ê 問題，我問伊：「你敢會感覺你所講 ê 德語是無文化 ê 人咧講 ê 話？」
「你知影，阮 ê 皇帝踮德國歷史是非常重要，tio̍h m̄ tio̍h？」伊問。
「你知影，m̄ 是踮 Google 翻譯揣會 tio̍h ê 語言才是語言，tio̍h m̄ tio̍h？」我答。阮翁同事笑笑無回答，我 mā 無 koh 繼續這个話題。恬恬聽眼前 ê 這位德國新婦 ê 委屈代，伊講參 in 翁去別人兜，逐家為著伊袂曉講德語，換講英語，落尾，hō͘ 人發見，伊連英文 lóng 聽無半句，伊感覺 hō͘ 人看袂起 ê 代誌。
聽伊講遮 ê 代，我 teh 想，m̄ 知影伊按怎看待 in 翁所講 ê 德語。因為 in 翁 hām in 規家伙所講 ê 德語，德國學校應該無 leh 教，Google 翻譯 mā 揣無。
這層代 hō͘ 我想著，ùi Ka-ná（Ghana）來 ê Anthony hām ùi Eh-lī-chhùi-a（Eritrea）來 ê 阿萬分享 ê 話，「有人講，『利便 ê 網路，人 hām 人免講話，只要有 Google。Google 翻譯揣無 ê 話，tō 是無文化、無水準』。」這時，咱這幾个人，每一个人 lóng 有家己 ê 語言。有 ê 會通，有 ê 袂通，m̄-kú 咱猶原會通破豆。這是為啥物？
這是咱 ê 肥底成就 ê 美麗 hām 趣味。
