◎Chng Hūi-phêng
Sè-siōng bān-mi̍h lóng sī Siōng-tè chhòng-chō–ê, phok-bu̍t-koán tián-lám ê lóng sī I khah-chá ê chok-ûi. Góa kò-jîn chham-koan kòe ê phok-bu̍t-koán, tōa-pō͘-hūn sī tòe thoân khì, sî-kan chin iú-hān, mā lóng sī lâng kheh lâng, ùn tāu-iû nā-tiāⁿ.
Hō͘ góa ìn-siōng siōng chhim–ê sī tī 10 kúi nî chêng, hioh-joa̍h chhōa gín-á khì Tâi-tang chham-koan Tâi-oân Sú-chêng Bûn-hòa Phok-bu̍t-koán. Chit keng phok-bu̍t-koán chin chheng-iu, hó thêng-chhia, lâng bô chē, ē-tàng hō͘ lâng sim-chêng pàng khin-sang, mā thang hó-hó-á chham-koan. Chit-má thàu-kòe Google map, khòaⁿ hū-kīn ê khoân-kéng kah hong-kéng, ná koh tńg-khì kàu hit-chūn ê sim-chêng kāng-khoán. I chú-iàu ū 3 ê chú-tê koán: Chū-jiân-sú, Tâi-oân Lâm-tó-bîn-chok, Tâi-oân sú-chêng-sú (Tâi-oân 400 nî chêng ê le̍k-sú). Khòaⁿ Tâi-oân Lâm-tó-bîn-chok, siūⁿ tio̍h hiah-chē ê bîn-cho̍k, soah in-ūi chèng-tī kap keng-chè siōng ê jio̍k-sè, cho̍k-gí ê sèⁿ-miā chin-chē lóng sí-giān-giān, chhun–lo̍h-lâi–ê mā lóng tó-tī ka-hō͘ pēⁿ-pâng.
Lán Tâi-gí-chok kòe-khì ū jîn-sò͘ ê iu-sè, m̄-koh siū chèng-tī chè-tō͘-sèng ê ap-pek, mā bān-bān kap Lâm-tó-bîn-chok kiâⁿ tī kāng-khoán ê chhu-sè. M̄-koh ū chi̍t tīn m̄-goān ê lâng, ùi siàu-liân phah-piàⁿ kàu thâu-mn̂g chhùi-chhiu pe̍h, sīm-chì ū–ê í-keng chiūⁿ Thian-tn̂g ah. Siōng-chú ah, kiû Lí hō͘ sin chi̍t tāi Tâi-gí-chok thoân-sêng chit pha hóe-chéng, hō͘ Tâi-gí ho̍k-heng ê khùi-la̍t iâⁿ-kòe liû-sit ê le̍k-liōng, hō͘ Tâi-gí chhōa-thâu tài-niá tī Tâi-oân chāi-tē iáu oa̍h–teh ê cho̍k-gí lóng ē-tit thang ho̍k-heng, koh kiàn-li̍p iân-sio̍k sèⁿ-miā ê chè-tō͘, tāi-tāi bô chīn. A-men.
