Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Sím Yêng-TÊNG
Chū sè-hàn gún tau tō-sī iōng Tâi-gí teh kau-liû. M̄-koh góa tha̍k kok-sió ê sî-chūn, kàu-bū chú-jīm it-ti̍t kā gún kóng, tī ha̍k-hāu tō ài iōng “Kok-gí” kóng-ōe, nā-bô, tō ài khì hoa̍t-khiā. Só͘-í choân-hāu ha̍k-seng-á ko͘-put-chiong lóng-iōng “Kok-gí”. Kan-ta tī chhù–ni̍h chiah kóng Tâi-gí, kú–lâi pē-bú phòe-ha̍p gún kóng Pak-kiaⁿ-ōe, tì-sú góa chiām-chiām bô siáⁿ ē hiáu kóng Tâi-gí, lú lâi lú chhiⁿ-so͘.
Chòe-kīn, in-ūi kàu-io̍k chèng-chhek teh chhui-sak, Tâi-gí beh piàn-sêng chèng-sek khò-têng, ha̍k-hāu khai-sí tiâu-cha kám-ū lâng siūⁿ beh ha̍k-si̍p Tâi-gí. Bī-lâi beh choán-kho ê lāu-su, koān-hú ē kā i thui-chiàn hō͘ kàu-io̍k-pō͘, koh úi-thok Sêng-kong Tāi-ha̍k Tâi-bûn-hē khui-khò. In-ūi góa ka-kī ê a-î mā tī kok-sió kà “Bân-lâm-gí” kúi-lō͘ nî, i kó͘-lē góa tio̍h pá-ak chit-pái ê ki-hōe khì pò-miâ chham-ka. Góa beh chhì-khòaⁿ-māi, pôe-ióng tē-jī choan-tióng, ke jīn-bat ka-tī ê bó-gí. Hó-lí-ka-chài, góa hāu-pó͘ ji̍p-khì ah.
Ùi kū-nî gō͘-goe̍h, e̍k-chêng thòaⁿ-khui kàu-taⁿ, kok-kip ha̍k-hāu mā khai-sí sòaⁿ-téng kàu-ha̍k. Kū-nî ê hioh-joa̍h, góa chiâⁿ chòe ha̍k-seng, tī sòaⁿ-téng kap chò-hóe siōng-khò ê tông-o̍h sio-tú, khai-káng, ha̍k-si̍p, mā kap lāu-su thó-lūn, kau chok-gia̍p, khó-chhì, si̍t-chāi chin sim-sek. Gí-giân-hak hō͘ góa ê hoat-im ē-tàng koh khah chèng-khak, chai-iáⁿ Lô-má-jī bô góa chìn-chêng siūⁿ–ê hiah-nī pháiⁿ o̍h. Lēng-gōa, Siraya bûn-hòa ê khò-têng hō͘ góa khah liáu-kái Tâi-oân le̍k-sú, chai-iáⁿ chi̍t-ê bûn-hòa nā siau-sit, siūⁿ beh kā khoe-ho̍k-tò tńg–lâi, su-iàu hùi-kang kúi-lō cha̍p-pōe neh. Koh chit-mn̂g khò, chú-tê sī koa-á-chheh, sian-siⁿ siāu-kài Tâi-oân kok-pó Iûⁿ Siù-kheng liām-koa ê hong-chhái. Iáu-ū thoân-thóng hì-kio̍k, in teh thoân chhiùⁿ ê kòe-têng tō-sī chiong gí-giân pó-chûn lo̍h–lâi ê hong-sek. Múi chi̍t ūi lāu-su lóng hō͘ góa kám-siū in siūⁿ beh kā Tâi-oân bûn-ha̍k, gí-giân, bûn-jī, lóng pó-liû lo̍h–lâi ê khì-tô͘. Góa kám-kak ka-tī mā eng-kai khiā–chhut-lâi, ài ū sù-bēng-kám mài hō͘ Tâi-gí siau-sit.
Góa sī chāi-chit ê tiong-ha̍k Chū-jiân lâu-su, tī oân-sêng Tâi-gí khò-têng ê ha̍k-hun liáu-āu, góa tàu-té beh choán-kho khì kà bô? Iáu-bô chù-ì. It–lâi hoân-ló ka-kī ê lêng-le̍k bô-kàu, m̄-chai-iáⁿ beh án-chóaⁿ kà, in-ūi ē-hiáu thiaⁿ, ē-hiáu kóng, bô pit-jiân ē-hiáu kàu-ha̍k. Jī–lâi, hoân-ló choán-kho liáu, chiong-lâi nā hùi-tû Tâi-gí chit-ê pit-siu ha̍k-hun, kám-ē bô khang-khòe? Put-jî-kò, tùi góa lâi-kóng, jīn-chin thong-kòe kiám-tēng chiah-sī siāng tiōng-iàu ê tāi.
Kā Tâi-gí tòng-chò bó-gí ê lâng lú lâi lú chió, chin-chē pún-té ē-hiáu kóng Tâi-gí ê lâng mā jīn-ûi Tâi-gí thài tio̍h ái o̍h, in siūⁿ kóng pêng-siông tī chhù–ni̍h kóng tō ē-sái, bô ì-sek Tâi-gí ná lâi ná bô-lâng teh kóng ah. Hiān-chú-sî, góa thiaⁿ ha̍k-seng kan-na tī mā-lâng ê sî chiah ē kóng Tâi-gí, tû-liáu phái-thiaⁿ-ōe kóng khah bêng í-gōa, chhun–ê lóng thàu-lām Hôa-gí. Só͘-tì, góa ê tē it hāng jīm-bū tō sī kà in chèng-thóng ê Tâi-oân-ōe beh án-chóaⁿ piáu-ta̍t. Mê-nî, pún-thó͘-gī chiūⁿ-lō͘ liáu-āu, tùi ha̍k-seng lâi kóng, kám-sī khoài-lo̍k ê ha̍k-si̍p, á-sī lēng-gōa chi̍t-chióng hū-tam leh? Ká-sú ū chi̍t kang, góa chin-chiàⁿ teh kà Tâi-gí, it-tēng beh hō͘ gín-á jīn-bat Tâi-gí sī tiōng-iàu ê bûn-hòa, Tâi-gí sī ū bûn-jī, ē-tàng kì-lo̍k ê. Lán tio̍h thiàⁿ-sioh Tâi-oân pún-thó͘ gí-giân ê súi. Nā ta̍k-ke ū kiōng-sek, khai-sí ha̍k-si̍p, góa siong-sìn, ū tōng-ki, tō ū chìn-pō͘, tō ê ū hi-bāng.
