【那teh褪色ê台灣俗語話】捷罵bē驚,捷拍bē疼

Chia̍p-mē bē kiaⁿ,chia̍p-phah be thiàⁿ.

◎李南衡

我問福伯:「是啥代誌害你搖頭吐大氣咧?」福伯koh吐一个大氣才講:「隔壁陳太太hiah少年,教囡仔若會親像古早人?定定聽伊罵囡仔罵kah大細聲,實在真噪耳,拍囡仔拍kah囡仔大細聲háu,咱聽tio̍h mā會m̄甘。現代教育應該是『愛』ê教育。其實永過ê人mā m̄是完全贊成『拍kah罵ê教育』,in若像khah贊成『拍kah罵』tio̍h有準節。所以咱祖先才會留『捷罵bē驚,捷拍bē疼(Chia̍p-mē bē kiaⁿ, chia̍p-phah be thiàⁿ)』chit句俗語話hō͘咱。」

福伯目睭看ùi桌頂ê報紙,koh吐一个大氣講:「你看新聞報導,昨昏中國解放軍koh飛六隻次ê軍機來亂。若是久久矣,一隻中國解放軍ê軍機飛入來咱ê防空識別區,一定會hông驚tio̍h,驚講是m̄是teh beh發生戰爭?舊年開始,中國解放軍ê軍機,愈飛愈濟隻次來,一開始三兩工tio̍h飛一隻來巡巡看看咧,原本有人hán講是『反共義士』koh駛軍機beh來領黃金幾千兩。原來是一場誤會,in駛軍機是來亂niā-niā。像講舊年(2021年)11月28,中國解放軍有12隻次戰鬥機飛入咱西南航空識別區來亂,包括2隻次『殲-10』、4隻次『殲-11』、6隻次『殲-16』戰鬥機,另外有15隻次軍機一路ùi咱西南空域se̍h去東南空域,攏飛出咱防空識別區東南界了後,才koh ùi原路飛轉去。Chit 15隻次軍機有4隻次『殲-10』、2隻次『殲-16」戰鬥機、2隻次『空警-500』預警機、1隻次『運-9』通信對抗機、5隻次『轟-6』轟炸機,khah特別是有1隻次『運油-20』空中加油機。實在是真過分!」

「In按呢是beh創啥?」我應講:「是來作空中軍機展覽會,展in ê手骨有偌大枝,抑是罔嚇驚咱?」

福伯講:「嚇驚咱?頂日我問一個少年ê講:『中國解放軍軍機làng時無làng日來亂,你敢bē驚?』伊應講:『驚?Beh若驚會了,若像台灣一日到暗teh地動,有時一工搖3遍、5遍,有時一暗動6、7擺,搖作伊搖,除非搖kah誠厲害,才有人會喝地動地動!當今ê國際局勢,m̄是中國一个國家想beh拍tio̍h會拍,tio̍h考慮國際上ê因素,kah動武ê可能後果、代價等等問題。』」


我講:「像講舊年10月初4 hit一工,中國解放軍軍機飛入來咱ê西南航空識別區tio̍h有56隻次。咱看新聞報導極加mā是『哦!』一聲niā-niā。我一个朋友ùi法國轉來,講歐洲幾個大國誠緊張,英國、法國攏派航空母艦來南海、台海、太平洋巡巡咧,連澳洲mā緊派軍艦來。是外國人hō͘中國解放軍嚇驚tio̍h,咱台灣人若像連chùn-būn(顫悶)to無。

福伯笑講:「Chit句台灣俗語話最近hoān勢會改作:『捷háⁿ bē驚。』」

廣告/手到心至抄寫本-箴言

我有話要說