Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎澹露水
你，先看頭看尾
Ná看ná hàiⁿ頭
Gōa濟詩人佇文字ê迷宮chhōe無路
漢字羅馬字透種失去高貴、美感
厚話ê過路人hiông-hiông nauh –1-句「袂見笑」
咱，身世不明ê khî無人洗會清
你，聽kah微微仔笑
我，kō͘ 虔誠ê心佇Word檔案1字1字排
字體、大細、欲làng chōa無……
1空1縫chim-chiok安排khah tàu-tah ê位所
欲phùn文學ê芳水
Chng-thāⁿ 修辭學ê siáu kúi-á殼
總–是，iû-goân bái kah無té比
我早tō ùi你ê目chiu仁看tio̍h咱ê臭賤
有人質疑我愛用度針，mài用現代ê度燒
笑我iû-goân選擇肉燥飯做早起
M̄是趕流行去 STARBUCKS lim ka-pi
He有人講是價值kap價數ê戰爭
講是成見á是對現代進步適應有困難
我soah認為是人愛kā人貼標頭ê性koh giâ–起-來
我1人gōng-gōng佇詩chōa內phah-kho͘-se̍h
Kā Nobel文學家siá 1句gió-toh ê文句
伊勸我kā虛華ê華語借詞thǹg–掉
詩chōa ut hō͘好mài kā字用jiâu
空phàⁿ ê鋪排是掠龜走鱉ê hām-kheⁿ
袂輸無蒙面搶銀行ê土匪
He是餒志文人ê雜唸仔
Kā人情世事切斷
食著虛無ê妙禪氣功
M̄是唸滿滿口訣ê降龍十八掌
Soah無力頭ê金庸武俠小說
文學招式敢無教你做拋輾斗ê sió-thiú-á！
有話無té講soah that tī nâ-âu cheng-á
你若會hiah-nī cha̍t-thâu
為著這首史詩
卡佇硬碟（ngē-tia̍p）臭奶呆ê腔口
Kan-taⁿ koh 回轉hit本重khoâiⁿ-khoâiⁿ 、ta黃ê詞典
重新整理人生變調ê規則
挽面了ê羅馬字kap大舌ê漢字朝對
Koh再開戰
你，hit雙目chiu
無張持予我想著hô͘-sîn ê目chiu ê學名—-複眼
Lāi-kiàm-kiàm將我ê詩剝做2半
Ná kā蔥頭1層1層peh–落-來
用呂柳仙ê唸歌速度
Kā pha-hng ê韻kha khioh–轉-來
準講chhun孤線ê月琴 koh thang用生鉎 ê聲âu替換
Hia suh殖民ê chhùi-nōa大溪ê gín-á
咱mā tio̍h m̄-thang 掛gāi；好thang安hioh
你佇府城城外ê iâm-tiâⁿ 1人bih起來喘喟
Chheⁿ-kông chhiau-chhōe pùn-sò桶ê白話字文本
M̄-thang造成博物館館員ê困擾ah
管thài史詩停佇第幾章第幾回
硬piàng-piàng ê注跤iû-goân無法度赦免殖民者ê
罪kòa
緊kā政治láu-á ê質詢改做「脫線爆笑劇」lah
我ná空思ná調對夢ê圖點數（像數，pixel）
Lô-keⁿ（羅經，羅盤） m̄知是緊張á是lia̍h狂起se̍h-lin-long
Ín-chhōa我死佇無人知ê無尾巷
M̀，koh有留寡氣魄
生鉎 ê 筆尾a̍h有水……hoah袂出聲
