【那teh褪色ê台灣俗語話】 抹壁雙面光

Boah-piah siang-bīn kng.

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◎李南衡

福伯看tio̍h我to̍h搖頭講:「Beh作阿哥無hiah簡單!」我問講:「福伯tang時仔想tio̍h beh作阿哥?」伊應講:「無lah,我beh作啥物阿哥,我是講美國想講伊喝一聲,逐個tio̍h會tòe伊行。世間代那有hiah簡單!」我問講:「是叼一條代?」

福伯講:「你若有看新聞tio̍h知影,第24屆冬季奧運會預定2022年2月初四至20,佇中國北京舉行。2021年12月初六,美國政府正式宣布,因為中國對新疆維吾爾族發動『種族滅絕』kah『反人類罪』暴行,對北京冬奧決定beh採取『外交抵制』。對奧運會ê 抵制有三級,上嚴重ê是全面抵制,像1980年蘇聯佇莫斯科舉辦ê夏季奧運會,美國tio̍h是拒絕派出運動員參賽,來抗議蘇聯入侵阿富汗。第二級是經濟抵制,雖然有派運動員參賽,但是無beh kah主辦國ê商業機構進行合作,mā無轉播主辦國ê電視台節目。上輕ê tio̍h是美國chit遍採取ê外交抵制。美國政府ê考量是,奧運會每四年才辦一遍,真濟運動員佇伊ê生涯內干單有極少ê機會參與奧運會。不准運動員參加,m̄-nā會kā原本有可能得tio̍h獎牌ê機會白白讓hō͘別國ê運動員,政府mā真有可能hông罵講是違背運動精神,chit種無官員參加ê『外交抵制』是上輕ê一種。莫怪美國前國務卿Mike Pompeo會罵講:『chit種抵制亦bē疼亦bē chiūⁿ,顛倒是家己失去立場。干單「外交抵制」根本無夠力!』」

福伯講:「雖然是按呢,作阿哥ê美國mā是希望khah濟國tòe伊ê腳步,hō͘中國一個教訓,上起碼情報互相交換、穿仝領褲ê『五眼聯盟』其他四國應該會tòe美國行。加拿大、英國、澳洲攏講kah美國仝款,意外ê是,紐西蘭講無beh派官員參加,是考慮tio̍h疫情ê關係。」我問講:「紐西蘭按呢做是啥意思?」

福伯笑講:「按呢叫作『抹壁雙面光(Boah-piah siang-bīn kng)』」。我問講:「抹壁雙面光是啥意思?你那會講紐西蘭按呢做叫作抹壁雙面光咧?」福伯講:「土水師佇壁面最後si-á-geh ê時,紅毛土抹佇壁頂了後,用抹刀真細膩kā壁面抹kah又koh平又koh金滑,按呢m̄-nā原本金滑ê抹刀金滑,壁面mā抹kah真金滑,咱講是雙面攏金滑。台灣人用chit句俗語話來講一個人,徛佇有爭執ê兩個人中間,伊ê講話抑是行為hông認定是無倚佗一旁,對雙方攏無歹。紐西蘭無beh派官員去北京冬季奧運會,算是kah美國徛仝旁,但是伊無用『人權」作理由制裁中國,算是hō͘中國面子。12月底,日本講伊徛佇美國chit旁,但是完全無提起制裁兩字。Mā會使講是抹壁雙面光ê做法。」

愈來愈少人看過土水師抹壁,chit句俗話可能會漸漸無人會曉講。

我有話要說