◎林朝成
林俊育長老投書《台灣教會公報》3671期台文天地，提起聖經公會出版《現代台語譯本》採用泉州音翻譯，無採用台灣普遍腔 ê 漳州音翻譯，是真可惜 ê 代誌，因為無符合台灣人 ê 需要。
泉州音 kah 漳州音有基本 ê 差別，舉例來講，泉州音 ê ue ，漳州音讀 e，如：地（tuē／tē）、雞（kue／ke）、短（tué／té）。泉州音 ê u ，漳州音讀 i，如：語（gú／gí）、斤（kun／kin）、銀（gûn／gîn）等。《現代台語譯本》有說明，這是為著欲承接1873年 ê《咱 ê 救主耶穌基督 ê 新約》、1884年 ê《舊約 ê 聖經─舊約全書》kah 1933年巴克禮牧師翻譯 ê《新舊約聖經》，諸 ê 譯本攏是採用廈門音翻譯，因為廈門音 kah 泉州音較接近，所以採用泉州音，無採用漳州音翻譯。言下之意，聖經 ê 翻譯，是一脈相傳，用廈門音 kah 接近廈門音 ê 泉州音來翻譯。
林長老認為，泉州音譯本 ê 聖經，並無符合台灣人 ê 需要，伊希望將來會通出版，台灣普遍腔 ê 漳州音《現代台語譯本》，這才是台灣人需要ê現代台語聖經。我本身亦有這種 ê 感覺，因為當我看泉州音羅馬字聖經，欲讀家己習慣 ê 漳州音，真困難，我會照羅馬字拼音，讀出泉州音。所以咱真需要一本，台灣普遍腔 ê 漳州音《現代台語譯本》。（作者為退休牧師）
《現代台語譯本》那會是泉州音？規个共看，會用講是延續巴克禮白話字聖經个廈門音，即本聖經个「泉州音」講真是廈門音內底靴个倚泉个韻母，毋是直接位泉州音來个。若正經講是泉州音，因何攏無看著 eng 讀做 uiⁿ（清 chhuiⁿ、前 chûiⁿ、爿 pûiⁿ）？泉東佮同安的 aiⁿ（前châiⁿ、還hâiⁿ）嘛看袂著， 嘛無共ek 韻母唸成 iak 韻母（歷史 lia̍k-sú／sír、特色 tiak-siak）。若講是用泉州音，是按怎攏無卜用頂懸遮个聲母？煞規个佮廈門話遮呢仔相仝？當然，泉州音真各樣，毋是逐位攏總相仝，但是泉州應該是無一个所在个韻母佮即本聖經譯本仝款，顛倒較成廈門話。若咱請一个泉州儂、一个廈門儂來讀即本聖經，佗一个會感覺較接近家己个腔口？我想，毋免真正按呢做，答案著已經真分明。