Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉澎錦
我若講結婚七冬搬11擺厝，無人相信，連阮兄弟姊妹嘛毋知阮tòa過遐濟所在。Chit-má越頭看這層代誌，其實是少年無定性，頭路無穩定，加上早婚早生囝，便若換頭路，全家就搬徏。古早孟母三遷是為囡仔ê教育，阮是為tio̍h顧腹肚，每一个所在攏tòa無久，對新環境猶未se̍k就愛閣搬，阮嘛只有認命，嫁雞綴雞飛，嫁狗綴狗走。
第11擺搬厝是搬轉去西港老厝，佇遐有tòa較久，大約五冬。這五冬阮翁仔某ná兩隻戇牛，若有工課阮to做，佇彼个台灣錢淹跤目ê年代，甘願做牛毋驚無犁通拖。阮翁原本佇夜市排攤，後來駛計程車、貨車、工程車、做工廠ê司機，我佇厝顧囡仔兼做針織代工、電頭毛、透早送報紙，勞力拍拚欲食三頓，晟養三个囡仔無問題。毋過阮翁愛跋筊，翁仔某定定為tio̍h錢冤家量債，我若好喙勸伊莫閣跋，伊to應我跋是為tio̍h欲hō͘阮母仔囝過較好ê生活。我講：「十賭九輸，你若疼惜某囝莫閣跋，安分守己我mā thīn（伨）你鬥拍拚，翁趁某khîⁿ（拑），咱ê未來iáu-sī有希望，囡仔沓沓仔大漢，咱做序大tio̍h做好模樣hō͘序細看，咱三个囡仔攏誠乖閣𠢕讀冊，佇學校攏是模範生，咱攏受義務教育爾，你敢無想欲hō͘𪜶加讀一寡冊？」聽我按呢講，伊紲落來一段時間確實無閣跋。毋過進前欠ê筊數mā是ài還，筊數還欲了ê時，阮ê人生閣來一个轉斡。
伊無想欲繼續駛車，招我做伙做小生理。阮會做油湯這行，tio̍h是本錢較少，阮參詳了，決定我先去學。師傅答應欲教，kap阮約束，我kā鬥做四個月無領工錢，功夫學起來，愛搬去他鄉外里發展。咱mā了解牽師仔賣埔頭ê道理，所以學成以後照約束搬去關廟，這是阮第12擺搬厝，佇遮阮tú-tio̍h閣較大ê考驗。
阮翁彼年才34歲，kā頭路辭辭咧，𤆬三个攏讀國小ê囡仔，規家伙仔搬去關廟這个阮足生份ê所在做生理，賣𩵚魠魚羹、香菇肉羹、筒仔米糕、四神湯、炒麵、炒米粉，一開始mā毋是蓋順利，後來換地點、改變營業時間，才沓沓仔kā生理做起來，真正是牛仔囝毋驚虎。毋過當咧趁錢彼時，拄好是大家樂上熱上痟ê時陣，阮mā迷失佇彼个「全民運動」，我是真緊就醒來，阮翁猶是簽袂煞，就按呢做生理趁ê錢輸佇大家樂，我mā是後悔當初無應該去沐tio̍h這个䆀習慣，阮逐工親像干樂踅無停，毋知辛苦是為tio̍h啥？定定為錢冤家量債，貧賤夫妻百事哀，尾仔伊閣轉去駛計程車，我家己kā生理收縮，干焦炊筒仔米糕批發hō͘早頓店。工課上ê需要，這擺阮搬去仁德，我炊米糕、伊鬥送貨，才做三工爾，彼暝伊出車佇安平tú-tio̍h搶劫，人受傷、車hō͘歹徒搶去閣作案，後來有破案，tú-tio̍h這款代誌，阮mā是無奈。
彼時陣大伯、小叔𪜶攏佇高雄做機車百貨ê生理，做了袂䆀，提議阮改行綴𪜶做，到遮又閣是人生ê十字路口，隔行如隔山，阮重新思考未來ê路，最後決定欲結束我tú-chiah起步ê米糕批發生理，做伙去高雄學做機車百貨ê生理，這擺阮無搬厝，兩个查某囝去蹛校舍，後生阮𤆬去鳳山讀國小，阮暫時蹛佇大伯ê厝，日時去兩个小叔ê店學做生理，半年後佇新營揣tio̍h店面，這是阮第14擺搬厝。開店頭一冬生理普通，拄好有較好ê地點，阮閣搬一擺，佇遮9年是阮稅過ê厝蹛上久ê，mā趁較有錢ê。
1997年，政府法令通過騎機車要戴安全帽，阮趁時機佇台南開元路加開一間安全帽專賣店，前兩冬生理好，阮翁恬恬仔顧店，紲落來生理較䆀，伊tō無想欲顧矣，嫌顧店縛牢牢無自由，欲閣去駛計程車矣，伊ê个性袂穩重，𠢕chhia-poa̍h-péng（車跋反），毋過攏一直有工課做，毋敢làng時間毋趁錢，對伊ê決定我mā無法度說服伊，想想咧歹歹翁食袂空，一直thīn伊，尾仔kā兩間店收起來，放伊自由去駛計程車，我圍裙縖咧，煎匙閣再攑起來，佇黃昏市場賣油飯、炒麵、炒米粉，對透早準備材料，煮、賣、洗，到收攤攏家己做，捌三个月無歇睏毋知忝，一心想欲hak一間厝安定落來，我知影徏岫雞母生無卵，搬入來市區又閣蹛過三位矣，到遮阮已經搬18擺ê厝，朋友滾耍笑講「十八嬈」，阮無想欲閣嬈落去矣。
回想一路kiâⁿ來，火燒、車禍、搶劫歹運ê代誌攏tú-tio̍h，關關難過關關過，四界無厝四界蹛，歹運了一寡、歹囝了一寡，三个囡仔攏大學畢業，擔頭較輕矣，阮佇2002年開始揣厝，尾仔佇安和路揣tio̍h一棟透天厝kā買落來，終其尾搬來家己ê厝，免閣流浪矣。阮當初結婚是佇台19線ê西港中山路，這碼厝hak（蓄）佇台19線ê安和路，才短短ê十公里，阮搬19擺kiâⁿ 27冬才到。唉！向望ē-tàng平「安和」樂佇遮過後半世人。
