Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉李南衡
福伯看我踏入in ê門tio̍h大聲喝：「真歡喜，真歡喜！」我問講：「你真歡喜啥？」福伯講：「恁chiah-ê朋友無棄嫌愛來阮厝行踏，我當然歡喜。咱台灣俗語話講：『人腳跡，富！（Lâng kha-jiah, pù！）』有真濟人愛來恁厝，表示你受歡迎，你一定會發展、好額起來。中國古早孔子講：『有朋自遠方來，不亦樂乎？』有朋友ùi遠遠ê所在來，敢m̄是真歡喜ê代誌？」
福伯講：「像講美國聯邦眾議院議長Phe-lo-si （Nancy Pelosi）女士beh來台灣訪問敢m̄是真歡喜ê代誌？」我應講：「當然歡喜，伊是25年來到台灣訪問ê美國聯邦眾議院議長。」
福伯hàiⁿ頭講：「不幸咱有一个歹厝邊中國真無歡喜，kah《聖經》ê教示：『你tio̍h疼厝邊親像家己』抵抵顛倒反。中國pàng-tiau講伊若敢來台灣，中國解放軍bē恬恬無管，甚至有人彈臭屁講，美軍戰機若護送Phe-lo-si去台灣，解放軍若kā伊驅離無效tio̍h會使kā『拍落來』。In講Phe-lo-si若是佇台灣停留，tio̍h是點to̍h台灣海峽ê火藥桶。Phe-lo-si議長m̄是hông嚇驚大漢ê，伊8月初二暗時10點外飛到台北松山軍用機場，第二工去見蔡英文總統、拜訪立法院。伊佇台灣講ê話真要緊。伊講：『今仔日中國步步進逼，佇軍事、經濟、外交等各層面打壓台灣，中國可能會tàng阻擋台灣領袖參與國際會議，但是bē-tàng阻擋世界領袖抑是任何人來訪問台灣。』伊來tio̍h是beh傳達美國國會跨黨派對台灣安全ê支持，幫助台灣上有效ê自我防禦。
福伯講：「2020年8月30，捷克參議院議長韋德齊（Miloš Vystrčil）chhōa團來台灣訪問五工，中國mā氣kah pho̍k-pho̍k跳，恐嚇捷克議長『tio̍h付出沉重ê代價。』一冬後，韋德齊議長笑講：『唯一ê代價是我連任當選。』」
我講：「以前ê mài講，舊年8月初二Phe-lo-si議長來台灣訪問了後，相續來台灣訪問ê各國貴賓tio̍h足濟，像講8月14，五位美國參眾議員來台灣。8月21，美國印第安納州州長侯康安（Eric Holcomb）chhōa團來台灣。8月22，『日華議員懇談會』會長、自民黨眾議員古屋圭司kah日華懇事務局長、自民黨眾議員木原稔來台灣。8月25暗半暝，美國共和黨籍參議員Pù-lek-pong （Marsha Blackburn）坐軍機來台灣，26早起見蔡英文總統。丹麥國會有六个政黨佇舊年秋天選舉結束後講準備beh訪問台灣。歐洲議會議員、德國聯邦議院議員、英國下議院外交委員會議員已經分別佇舊年9月、11月kap 12月來台灣訪問。」
福伯講：「Taⁿ koh有濟濟國家ê 濟濟團體beh來台灣訪問，咱台灣chit句俗語話『人腳跡，富！』無提起來liū-liū一下，煞險險會bē記得！」
