Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
口述◉張錦玲
整理／圖◉鄭雅怡
3. 戰後、228、白色恐怖、改信天主教
戰後goán搬到鹽埕埔。Chia是日本政府tī Takao填海起造ê第二个現代市區。頭一个填海ê新市區Hamasen hín差不多開發到盡磅，已經無空地ah，m̄-chiah日本政府tī伊南pêng ê鹽埕埔開發第二个新市區。Goán tòa tī鹽埕埔ê新樂街152號，這是一棟有兩間店面、三層樓koân ê樓á厝。M̄-ku空襲ê時mā是hông pōng kah破糊糊。Goán tú-á搬–入來ê時，厝壁、門koah窗仔chiâu是大砲、chhèng-chí（銃子，子彈）thàng–過ê khang，鳥仔tī hin做siū，chiuh-chiuh-háu。
因為戰亂，國校góa攏總讀六間。起頭讀Hamasen ê「湊國民學校」（鼓山國小ê前身），so͘-khai去安平bat讀兩間，戰後轉來鹽埕埔，就近ê崛江國民學校（鹽埕國小ê前身）hō͘ 戰火破壞。Góa代先去讀三塊厝ê旭國民學校（chín ê三民國小）和河濱國校，ta̍k日to過橋，tùi愛河頂行–過。若落雨，攏gia̍h紙雨傘，kiàn行到愛河ê橋中央，風透ka̍h，紙傘就開花péng–過，tiāⁿ-tiāⁿ pháiⁿ，tiāⁿ-tiāⁿ換。Hín ê橋攏是簡單搭ê pang-á橋，e̍h-e̍h–á，歹天行，不止仔危險。總–是hín ê囡仔真巴結，攏ka-kī行路去學校。路尾鹽埕國校整修好勢，góa chiah轉來chia讀。
囡仔時goán全家攏去鹽埕長老教會做禮拜。Hín是Lí Sêng-ngô͘（李乘鰲）牧師teh牧會。Góa猶會記–chit， 伊有一个查某囝號做「阿慈」。Hín彭明敏ê老母陳金英先生娘kà goán主日學，印象中伊生做chiâⁿ súi，lò-lò，氣質高尚。彭明敏ê老爸彭清靠是醫生，bat做鹽埕教會長老和高雄市參議會議長，228期間hō͘ 軍方騙去壽山頂談判，soah hông kho̍k–起來，險á死。
另外，hín goán ê主日學校長是蕭瑞安齒科醫生，伊不時to汗流kah規面，直直chhit。若需要補嘴齒，goán若m̄是去hō͘伊看，就是chhōe另外一間，號做「尤齒科」。蕭校長ê hāu-siⁿ蕭泰然是góa tī鹽埕國校ê同學，路尾伊成做國際聞名ê作曲家，kā台灣ê音樂，特別是台灣ê古早調，chhui-sak到全球樂壇。彭明敏和蕭泰然攏有堅定ê台灣意識，koh攏變成做海外烏名單，分別tī政治和音樂領域有重大貢獻，鹽埕長老教會ē-tàng出in兩位chiah傑出ê會友，實在光彩，應當好好á kā in記念。
終戰才過冬外，就發生228事件。鹽埕埔tú好tī壽山跤。壽山要塞司令部的軍隊一下落山，beh攻擊市役所（後來變做市政府，現在ê高雄市歷史博物館）和高雄車頭ê時，頭到就來到鹽埕埔，致到chia成做Takao 228無差別屠殺上慘烈ê戰場之一。
1947年3月初六chia̍h-pá-tàu（食飽晝），goán-tau 煮飯ê阿姨去到三樓ê chng-pîⁿ-á（磚坪仔，陽台），beh收pha̍k好ê棉chioh被，無疑悟soah看tio̍h中國軍隊tùi壽山頂行對山跤。佳chài伊有警覺性，隨kā goán老爸通報：「Siǎⁿ-séⁿ，兵仔落–來ah！」Goán老爸beh kā大門關–起來ê時，hín goán大兄teh讀高雄中學高一，真佳chài也tú好騎車仔chông到tè，一个面驚kah白sih-sak，隨hō͘老爸kā giú–入來。門一下關，支那兵隨溢到路–ni̍h。厝外面槍聲、砲聲、手榴彈ê聲pōng無soah。Hiông-hiông ta̍k-ê無看tio̍h老爸，緊張ka̍h，後來發現伊khiā tī二樓，窗仔開一phāng-á，teh偷tham外口。伊親目看見hín teh做市參議員ê厝邊駱–先生（駱榮金醫師）tī in-tau門跤口hō͘ 支那兵掠–teh，用槍柄大力kā lòng胸坎，害伊疼kah哀哀叫。駱–先生開民安皮膚科病院，就tī新樂街和鹽埕街ê三角窗。Goán老爸本chiâⁿ beh衝出去kā救，m̄-ku hō͘ goán老母kā giú-tiâu–leh。代誌過了，聽講是goán老爸kā駱–先生糊藥仔醫治。228過了，goán爸母kā大兄文徹ê雄中學生制服和帽仔tàn去燒，驚了萬一伊hông牽連，會hông掠–去，甚至thâi–sí。
228無的確帶hō͘ goán大兄永久ê精神創傷，雖然伊ê肉體無受tio̍h傷害。Hín雄中也是Takao 228 ê主戰場之一，hō͘軍隊射大砲攻擊，到taⁿ校舍壁面猶有hit當時留–落來ê砲khang。大兄雖然無正式參加雄中學生為tio̍h維持秩序、保護民眾所組成ê自衛隊，m̄-ku伊有tàu-kha-chhiú。伊ê chōe-chōe同學、囡仔伴tī 228死傷，活–teh–ê過了koh遭遇清鄉迫害。Chiah-ê變故大概hō͘伊chiâⁿ大ê刺激。大兄真gâu讀冊，後來考tio̍h台大醫科，做外科醫生，koh去美國留學，路尾tī加拿大開業、定居。M̄-ku伊透世人攏tài真重ê神經質，會莫名其妙驚惶、操煩。伊ê三个囡仔甚至會o̍h伊怪奇ê模樣teh滾sńg笑。幾ā十冬以後，有一擺伊轉來台灣，來到goán-tau門跤口，一下聽tio̍h警察等–leh beh來更新戶口資料，就驚kah peh-leh-lōng。大兄過身了後koh四冬，2016年伊ê查某囝有來台灣sio-chhōe，和góa kap goán大漢查某囝講起大兄ê神經質，hín goán chiah chhui-chhek，這可能是228 ê hiō-ûi-chèng（後遺症）。
2019年goán大漢查某囝訪問一位1947年雄中自衛隊ê成員何聰明。何–先生teh-beh 90歲ah，聽tio̍h goán大兄ê名真歡喜，講是伊雄中ê同學，in兩个也bat通批，m̄-ku幾ā冬無連絡ah，問goán查某囝：「伊chit-má按怎？」「Goán大舅2012年6–月tī加拿大過身–ah。」何–先生隨恬恬，表情嚴肅，gia̍h筆tī伊ê chhiú-chí phō͘-á chi̍t-oe̍h chi̍t-oe̍h寫–落來。Goá聽了chiâⁿ感動，mā chiâⁿ艱苦心。
初中góa考tio̍h省高女（現在ê高雄女中），入去讀，chiah發現學生中間中國軍人ê家眷佔真chōe。Hín有一个外省人主任tiāⁿ-tiāⁿ beh kā góa和一个楠仔坑醫生ê查某囝討藥仔。Goán老爸感覺費氣koh無妥當，m̄-ku mā驚kā得失–tio̍h，ke惹事，特別是tī白色恐怖ê氣氛下面。路尾手老爸就規氣kā góa轉學去市女中（taⁿ新興高中ê前身）。
高中góa讀長榮女中，去tī台南tòa學寮。Goán老爸làng一禮拜就來長女接góa轉去厝–ni̍h，非常疼–góa。會記chit hín長女有一个舍監，若是goán放尿siuⁿ大聲，會hō͘伊罵講，無查某囡仔款。Án-ne實在siuⁿ 嚴ah！長女出業了，góa bat tī愛河邊天主教設立ê樂仁幼稚園kà一站á，1961年12月30 góa結婚，了後就做專職ê家庭主婦和老母。
Taⁿ-chiah有提起，goán家族是幾ā代ê長老教會信徒，是按怎會牽對天主教去–leh？這是因為goán二兄考tio̍h高醫，成做第一屆高醫醫科ê學生，續接觸tio̍h幾ā位教拉丁文、德文ê德國籍神父。In kā二兄講，天主教chiah是耶穌源起頭創立ê教會，苦勸伊回頭，倒轉來天主教。Goán老爸本chiâⁿ反對，m̄-koh二兄chhōa chiah-ê德國神父來厝–ni̍h，kā伊說服。自按呢，goán大姊（hín結婚ah）以外，規家伙攏tòe老爸改信天主教。照天主教ê禮俗，洗禮ê時ài號一个教廷封ê聖人、聖女ê名，成做信徒ê「聖名」。加入天主教了後，真chōe教友稱呼góa ê聖名 「The-leh-sah」（Theresa，小德肋莎) 。這原本是19世紀一个法國修女ê名（Teresia Lexoviensis）。其實，goán老母和góa攏對tī天主教kha̍p-bē-tio̍h就一直唸經，經文koh四常是文言文，感覺chiok bē慣勢。Góa ê囡仔攏tī愛河邊ê玫瑰堂受洗。M̄-ku chêng美麗島事件以後，goán大漢查某囝就無法度koh認同天主教傾向中國和當權者ê所做，伊講「天主教有夠疼中國，無夠疼台灣」，路尾伊koh倒轉來長老教會。 （待續）
延伸閱讀：老母ê回想系列文章
