Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉黃俊誠
當西方文化tú-á開始衝擊福爾摩沙這tè太平洋上美麗島嶼ê時，tō kah島上ê原住民文化pèng-chhut美麗ê hé-kim-chhiⁿ。主後1622年，荷蘭為tio̍h擴大kah東亞ê貿易，占領今仔日ê台南安平，kiàn-li̍p Zeelandia城（熱蘭遮城）。三冬後，iū-koh用15 tè棉布向新港社原住民換Sakam（赤崁），成立一个小城市。荷蘭人降伏附近ê原住民部落了後，開始kah in和平徛起。荷蘭ê宣教師甚至用羅馬字教西拉雅族書寫in自己ê語言。對按呢，台灣ê原住民開始有這款用拉丁字母做基礎ê上早文字──新港文書。
翰安東是一个25歲單身ê荷蘭宣教師，1650年joa̍h-thiⁿ受荷蘭歸正教會總會宣教部ê差派前往遠東福爾摩沙ê新港社，伊beh協助已經tī當地設立教會ê尤羅伯牧師kàu-tō Si-lá-iah（西拉雅）族人讀聖經。Tī i kàu-tè福爾摩沙以前，翰安東已經tī雅加達東印度公司總部用羅馬字學習兩冬ê Si-lá-iah語，伊這擺前來ê任務，一方面是kàu-tō Si-lá-iah人學會曉書寫新港文書方便教化，一方面進行伊ê傳教事工。
八月初六這一工，45歲ê尤牧師駛馬車到熱蘭遮城港口去giâⁿ-chih翰安東。In兩人見面互相握手請安，翰安東kā行李khǹg-tiàm馬車後壁面，上車。
「感謝主ê保守，今仔日bô tú-tio̍h風颱。我來遮beh二十冬，逐冬tī這个時陣lóng不時有風颱。」尤牧師ná駛馬車ná講。
「Hèⁿ！我tī Batavia ê時陣就tú-tio̍h這款東南亞海域ê風颱，好佳哉我這pái tī海上bô去抵–tio̍h，風靜湧平！若bô就費氣了。」 翰安東笑leh應講。
馬車經過thian-tho̍h ê路段，來到新港社ê禮拜堂。尤牧師指教堂邊仔一間柴厝仔講「這就是你tòa–ê所在。邊仔彼間是我tòa–ê。」
翰安東kōaⁿ行李，tòe尤牧師入去伊beh tòa ê房間，尤牧師tī伊ê眠床跤拍開一片柴板仔。翰安東看tio̍h一支火銃kah一寡銃子。尤牧師對伊講：「這是為你ê安全設想。十外冬前，有一个心內怨恨ê Si-lá-iah少年人gia̍h刀入來，kā培力牧師刣死，所以，我想想leh，咱上好有一寡仔武器thang來kā遮个po̍k-tô͘ hè-kiaⁿ。」
尤牧師接sòa chhōa伊kiâⁿ khì宿舍邊仔ê另外一間柴厝，伊真驕傲kóng：「干治士牧師所起做ê禮拜堂以外，這間青年語文學校是我經手ē-tàng榮光主ê建築物，通過伊，我帶領上千个Si-lá-iah人歸主。這mā是你以後週間做工課ê所在。」翰安東看遮个椅桌，用充滿期待koh感恩ê心面對未來ê挑戰。
Tī語文班內面有一个生做清秀、學習認真ê Si-lá-iah女子名號做貝拉。有一擺貝拉問翰安東講：「馬太福音書lāi-té耶穌是按怎會講『hō͘人和好ê人，beh稱作上帝ê囝』咧？」
「Hèⁿ，因為上帝愛人好好á tàu-tīn，koh khah愛hiah-ê hō͘人好好á tàu-tīn ê人。」翰安東ná回答ná him-sióng伊ê智慧。
「貝拉，妳今年幾歲？」
「我mā m̄知影，應該是30 á-sī 是35歲！」
翰安東知影Si-lá-iah ê曆法（當時Si-lá-iah人無節日、無年曆、無文字；in計算時間是用月圓做單位，一擺月圓算做一個月，十個月算做一年；時間一久，in mā袂記得家己幾歲），講：「在我看，妳今年是18歲！我認為妳是thian-châi。」翰安東按呢講，兩个人lóng teh笑。「我發見妳m̄-niā聰明，iáu-koh用功。逐禮拜兩節ê課程，妳m̄-niā無欠席，逐擺留下來學習ê時間mā比其他ê同學kha久。」
「講實在，chit-má熱–人不時有目nih久ê青狂雨，阮tòa ê用茅仔草鋪hām竹仔所起ê厝tiāⁿ-tiāⁿ ē lāu雨。我猶是khah ài來恁這間柴頭起造ê學堂，tī落雨天，我m̄免閣再忍受滿四界ê積水。」
「講妳聰明，妳koh真正有影！」翰安東看貝拉，in兩个人iū-koh 開始笑。
按呢，貝拉繼續參加逐禮拜女班ê學習。翰安東mā tī上課ê時講伊ê家鄉荷蘭ê文化hō͘逐家熟識，學生仔聽了有欣羨kap渴慕。總是，閣過幾個月了後，貝拉直直欠席，翰安東問坐貝拉隔壁ê女同學吉娜：「你敢知影為啥物這chām á貝拉bô來上課？」「聽講是in老爸m̄准伊來。」吉娜應講。另外一个女同學克利也tè-chhiú-bé：「In老爸是阮部落ê長老，最近聽講阮庄內有一个號作洛薩瓦ê人到Provintia（普羅尼遮城）作生理，洛薩瓦看tio̍h荷蘭ê馬車tō感覺真kah意，心內想講nā ē-tàng買落來載物m̄知有外好，對án-ne問hit隻馬車ê主人敢願意賣。洛薩瓦原底kah彼个荷蘭人講好，beh用四tè鹿仔皮來作交換，總是，洛薩瓦hō͘伊四tè鹿仔皮了後，彼个荷蘭人kan-ta hō͘伊車bô hō͘伊馬。彼个荷蘭人講：『馬iáu-tio̍h用六tè鹿仔皮來換。』你知影阮這族bô飼馬，洛薩瓦無法度，姑不將koh chah六tè鹿仔皮去kah伊換馬。轉來了後，洛薩瓦聽講邊仔大目降社ê都卡那，用四tè鹿仔皮換一組馬車轉–來，馬少年koh有力。貝拉ê老爸tī庄內公開罵蕃仔bô信用，攏是諞仙仔，叫貝拉mài koh來上課。」
幾禮拜後ê一个暗暝，tī翰安東準備beh睏ê時，hiông-hiông聽tio̍h khin-khōng kiò lòng-mn̂g ê聲。
「緊！緊！緊開門。」翰安東知影che是貝拉ê聲，應：「啥物代誌？」翰安東趕緊對眠床上起來，穿一領siat-chuh就去開門。
「我ê老母一直teh hoah腹肚疼，疼kah跪tī土跤，我ê老父走去問ang-î-pô，ang-î-pô講可能是林間ê魔神仔作怪，chū-án-ne來阮兜替她作法。Ang-î-pô離開ê時，我ê老母ná親像有較好，m̄-koh chit-má伊閣開始腹肚疼，phēng éng-pái khah厲害，阮攏m̄知影beh án-chóaⁿ。」
「敢是食tio̍h啥物歹物？Sió-tán一下。」翰安東oa̍t-tńg-sin打開tû-thoah，the̍h出一罐小藥罐仔，就tòe貝拉到in兜。
貝拉ê厝是chi̍t間船型ê竹仔厝，貝拉ê老母iû-goân 跪tī土跤哀。翰安東叫貝拉去the̍h一張紙來，將紙thiah作八tè，kā藥罐仔裏面ê藥粉攏倒一sut-á tī紙頂面，koh 將紙áu作一包一包。
「這是針對腹肚痛ê金屬離子ê化合物，妳叫伊逐工tio̍h食四包，配燒水吞落去，日頭到東樹頭ê時陣食一包，透中晝ê時陣食一包，日頭到西樹頭ê時陣koh食一包，最後，月娘tī頭殼頂ê時陣tio̍h koh食一包。先食兩工ê藥仔看māi，這兩工mài食任何物件，beh去sái-ha̍k儘量去無要緊，有淡薄仔iau先jím leh。兩工後koh看講敢有小寡khah hó。」翰安東講煞，看tio̍h貝拉teh tìm頭，伊就轉去。 （待續）
延伸閱讀：對鹿林內傳來ê呼聲
