Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
福伯問講：「你敢bat聽過『仙拚仙，害死猴齊天！（Sian piàⁿ sian, hāi sí kâu-chê-thian！）』chit句台灣俗語話？」我應講：「聽是bat聽過，但是無真了解。」福伯解說講：「古早道教ê講法，人經過修煉了後得道，變作長生不老、超脫塵俗ê仙。但是仙kah仙之間mā會因為意見無合，互相不服，致使相拚武功抑是智慧，拚了傷厲害，煞害猴齊天承tio̍h拳頭屁。Chit句台灣俗語話亂講。因為猴齊天tio̍h是孫悟空，伊是明朝吳承恩寫ê小說《西遊記》所講ê唐三藏前往天竺（現今印度）取經ê故事，過程中有三位保護伊ê徒弟孫悟空、豬八戒kah沙悟淨，其中武藝上強ê孫悟空自稱『齊天大聖』，咱台灣人攏叫伊『猴齊天』。Chit句台灣俗語話是講幾个武功抑是學術真koân段ê人teh相拚，煞連累tio̍h無辜ê第三者。」我問福伯：「你講歸晡久，到底是beh講啥代誌？」
福伯講：「2024年總統大選一開始，中國國民黨主席朱立倫tio̍h提出『非綠大聯盟』，表明中國國民黨拍bē贏民進黨，驚kah未戰tio̍h先認輸，伊希望招別黨鬥出力、做伙拍倒民進黨。中國國民黨chhōe民眾黨ê柯文哲來『藍白合』，合來合去合bē好勢，煞變作『藍白拖』。11月15，中國國民黨黨主席朱立倫、總統參選人侯友宜、民眾黨總統參選人柯文哲，第二次政黨協商，佇前總統馬英九ê見證下，達成6點共識，宣布藍白合成局。原本11月18早起beh公布民調結果，但是雙方為tio̍h『統計誤差』是m̄是正負3%有歧見。民眾黨代表拒絕簽署。11月23下晡4點半，藍白kah郭台銘三方佇君悅飯店展開會談，但是一人講一話，無結果。煞變作『藍白切』，切了tio̍h刀光劍影隨時上場。第二工，藍白兩黨隨人chhōa副總統候選人去選委會登記。」
我問福伯：「藍白兩陣仙到底teh拚啥物？」福伯應講：「頭起先teh拚『是我』──總統正ê是我，副ê是你。」我問講：「Chit-má既然兩个攏是家己黨ê總統候選人，應該無事ah敢m̄是？」福伯搖頭講：「猶teh拚，chit-má teh拚『M̄是我』──破壞『藍白合』ê m̄是我，是你。Thang向後壁ê大頭家交待。」
我問講：「仙拚仙，害死叼一隻猴齊天？」福伯笑講：「新北市第七選區立委參選人葉元之。伊想講大人講話應該是chiàu ho͘ chiàu kiâⁿ (照呼照行），11月17伊tio̍h拚全台灣第一个，kā伊kah侯友宜、柯文哲仝框ê看板掛起li̍h。無疑誤，總統副總統登記ê前一天，藍白雙方互相péng-toh（反桌）。藍白正式破局，害葉元之滿面全豆花，伊tio̍h倩吊車來拆看板。葉元之感慨講：『神仙相拍凡人tio̍h災。』台語應該講作：『仙拚仙，害死猴齊天！』」
