Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Png Gêng-hōng
Kòe-nî sī gín-á tī chi̍t nî ê tiong-kan siōng hoaⁿ-hí ê ji̍t-chí‚ ē-tàng chhēng sin-saⁿ, khe̍h âng-pau, koh thang hioh-kôaⁿ chi̍t goe̍h-ji̍t. Tōa-lâng ê kòe-nî-sî sī chin thiám-thâu koh hoân-ló ê sî-chūn.
Tōa-lâng ǹg-bāng in tī sin-khó͘ chi̍t tang liáu-āu ū âng-lī, ū siúⁿ-kim thang niá, ū nî-ká thang hioh, ǹg-bāng thang hó-hó-á an-pâi hām chhin-chiâⁿ pêng-iú liân-lo̍k chi̍t-ē-á kám-chêng, thang chhut khì lú-hêng. Chóng–sī, khah sin-khó͘–ê sī, kòe-nî chêng ta̍k-ke ta̍p-ta̍p-tih-tih ê tāi-chì lóng chin chē, ū kàu bô-êng–ê. M̄-nā ài kā khang-khòe chò hó-sè bē-tàng ū sit-kak-chhat, nā-bô tō-ē chhiân–tio̍h hioh-khùn; mā tio̍h khai-hùi chē-chē khùi-la̍t kap sim-sîn lâi piàⁿ-sàu chhù-lāi.
Kóng tio̍h piàⁿ-sàu, góa lóng tī chi̍t-goe̍h-ji̍t chêng khai-sí kā chàu-kha ê mi̍h-kiāⁿ kap tiáⁿ-oe-á the̍h chhut-lâi lù-lù sé-sé–leh, kā tìn-lō͘–ê khì-sak tàn-tiāu. Nā-sī tòa it-poaⁿ ê thàu-thiⁿ chhù, ta̍k-tang beh piàⁿ-sàu ê sî chiū hi-leh-leh, tio̍h peh-chiūⁿ peh-lo̍h. Nā chhiūⁿ goán āu-thâu-chhù tòa tōa-lâu chiū khah hong-piān, tōa-piàⁿ-sàu ê sî tō khah khin-sang, chéng-lí–khí-lâi kín koh sù-sī.
Kòe-nî sî-á sui-bóng sī kúi-kang-á niā-niā, m̄-koh tī sin-nî ê chêng chi̍t, nn̄g kang chiah hioh-khùn, nā kàu beh óa-nî chiah khai-sí piàⁿ, kin-pún tō bē-hù–ah! Koh khah bián kóng thoân-thóng ê Tâi-oân bîn-kan sìn-gióng ê ka-têng tio̍h chhoân pài-pài ê mi̍h-kiāⁿ. Só͘-í góa pêng-siông nā ū-êng tō khai-sí kā chhù-lāi chi̍t kóa sió só͘-chāi sòa-chhiú khoán hó-sè. Eng-kai siu–ê, chhit–ê, sé–ê, tàn–ê…, ta̍k-hāng lóng bē-sái chhìn-chhái, tō sī ǹg-bāng kòe-nî ê sî-chūn, chhù-lāi chheng-chheng khì-khì. Kā lāi-té khoán hó liáu-āu, góa ē tī kòe-nì chêng chi̍t lé-pài kā mn̂g-thang, po-lê, bāng-á-mn̂g téng-téng chhit kah kim-siak-siak. Lō͘-bóe kā piàⁿ tōa-mn̂g kap tah chhun-liân ê khang-khòe lâu tiàm jī-káu-mê chêng chi̍t kang chiah chò, khah bē pe̍h liáu kang. Chit-má, ū chin chē lâng bô-êng thang piàⁿ-sàu, kui-khì khai-chîⁿ chhiàⁿ-lâng lâi tàu-kha-chhiú, put-chí-á chheng-êng.
Chhin-sin piàⁿ-sàu sui-jiân ū khah phî-lô, hó-chhù sī ē chhōe tio̍h chìn-chêng chhōe bô ê mi̍h, iû-kî sī ū kí-liām-sèng–ê, m̄-nā hoaⁿ-hí koh ē-tàng kā chi̍t tōaⁿ sit-lo̍h ê kì-tî chhōe tńg–lâi. Kū-nî tōa-piàⁿ-sàu ê sî‚ góa chhōe tio̍h 20 tang chêng‚ khè-pē-á sàng góa ê lak-tē-á-chhú ê pò͘-ang-á, he sī i khì Ò-chiu ê sî‚ bé tńg-lâi sàng–góa ê lé-mi̍h. Sui-bóng ū tām-po̍h-á kū‚ m̄-koh che sī chi̍t ê chin ū kì-liām-sèng ê mi̍h-kiāⁿ‚ góa ū khioh tio̍h pó-pòe ê kám-kak‚ sim-chêng chiok hó–ê‚ mā hō͘ tōa-piàⁿ-sàu ke-thiⁿ chin chē chhù-bī‚ sim-lāi tō bē kám-kak hiah-nī thiám‐‐ah!
