Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◎William Barclay
台譯◎陳惠雅
西庇太ê kiáⁿ、雅各ê兄弟約翰是一个掠魚ê。有一工伊kap伊ê兄弟、老爸做伙tī船頂teh補魚網ê時，耶穌呼召in（馬太福音4章21節；馬可福音1章19節）。約翰kap彼得ê關係特別密切，因為彼得是伊teh ê掠魚時ê同伴（路加福音5章10節）。Tī迦百農守安息日了後，約翰去彼得in兜（馬可福音1章29節）；主耶穌tī世間路尾ê hit幾工，伊特別吩咐彼得kap約翰去為伊kap其他門徒備辦最後ê Pôaⁿ過節晚餐（路加福音22章8節）。Ùi使徒行傳所描述ê早期教會，咱thang知，彼得kap約翰定定做伙出現，彼得通常是代表講話ê hit个人。In m̄-nā是漁船頂ê同伴，而且tī「tit-tio̍h人親像掠魚ê tit-tio̍h魚」ê事工，in mā是同工（馬可福音1章17節）。
佇成做耶穌ê門徒進前，約翰原底kán-ná是行洗禮ê約翰ê學生，第四福音書記載，行洗禮ê約翰指出耶穌是「上帝ê羊羔，祂beh來消除世間ê罪」，伊有兩个學生聽tio̍h老師án-ne講了後，tō去跟tòe耶穌。其中一个是安得烈，另外一个無寫出來，m̄-koh tī chia自然會hŏng想tio̍h，這个無名氏chiū是作者約翰本身（約翰福音1章35～40節）。彼得、雅各kap約翰成做使徒內ê核心人物，in幾个khah親近耶穌ê使徒，其中上倚近耶穌ê會當講是約翰。
Tī前三本福音書裡，約翰kap雅各真少分開，in大部分時間lóng做伙。Ùi chia ê記載內浮出一幅約翰ê形影，而且真清楚，m̄-koh奇怪ê是，這个形影並無啥吸引人ê所在。
1.約翰kap雅各lóng是有野心ê人。馬可福音記載in怎樣求耶穌，想beh tī主ê國度坐大位，其他ê使徒看in野心chiah-nī大，tō表示憤慨。因為án-ne，耶穌借這个機會來教示in「謙遜」ê美德（馬可福音10章35～45節）。M̄-koh，馬太福音對chit chân代誌ê理解無siâng，認為約翰kap雅各應該bē遮爾有野心，這有可能是in老母ê意思（馬太福音20章20～28節）。這个無仝ê看法可能是因為：馬太比馬可慢30年才寫福音書，hiáng時，十二使徒tī一般人心目中已經chiâⁿ-chòe教會ê thiāu-chioh，自然會想beh除去使徒ê汙點，或者為in辯護，所以馬太tō將beh搶權力kap地位ê野心攏總sak hō͘使徒ê老母。M̄-koh，咱寧可相信馬可ê講法是khah符合實際ê情況。
In提出beh坐大位ê要求，可能ê理由有兩个：
（a）雅各kap約翰比其他使徒ê家境khah富有，而且in出世tī khah頂懸ê社會階層，這點會使ùi in老爸西庇太有才調chhiàⁿ工人來kā in tàu-saⁿ-kāng看出來（馬可福音1章20節）。雅各kap約翰可能因為án-ne感覺家己比別人khah尊貴。
（b）也有可能是因為雅各kap約翰是耶穌ê近親。耶穌hŏng釘十字架時，最後khiā tī邊仔ê，是三个婦人人。馬可福音記載in是：抹大拉ê馬利亞、小雅各kap約瑟ê老母馬利亞，以及Sat-lô-bí（『撒羅米』，馬可福音15章40節）。約翰福音記錄ê是：耶穌ê老母kap阿姨、Kek-lô-pa（『革羅罷』）ê bó͘馬利亞，以及抹大拉ê馬利亞（約翰福音19章25節）。馬太福音所記ê是：抹大拉ê馬利亞、雅各kap約瑟ê老母馬利亞，以及西庇太兩个kiáⁿ ê老母（馬太福音27章56節）。Téng-bīn lóng有記載抹大拉ê馬利亞。雅各kap約瑟ê老母馬利亞應該是kap Kek-lô-pa ê bó͘仝人。照án-ne來看，賰ê tō是耶穌ê阿姨Sat-lô-bí kap西庇太兩个kiáⁿ ê老母。所以，咱thang推論講Sat-lô-bí tō是雅各kap約翰ê老母，伊mā是耶穌ê老母馬利亞ê姊妹。所以，雅各kap約翰確實是耶穌ê表兄弟。可能tō是這沿親情關係，hō͘ in認為家己tī耶穌ê國度內thang tit tio̍h特別ê地位。
2.雅各kap約翰是性情暴烈ê人。耶穌in自加利利去耶路撒冷ê路途中會經過撒馬利亞，m̄ koh當時ê偤太人kap撒馬利亞人無往來，耶穌最後一擺轉去耶路撒冷ê時，tō是行這條路。伊先派人去撒馬利亞做beh過暗ê準備，但是因為偤太人kap撒馬利亞人古早就結冤仇，致到in hông真無禮拒絕。雅各kap約翰當時ê反應直接koh激烈：「主ah，祢kám ài阮tùi天頂叫火降落來kā in消滅，tō ká-ná以利亞所做ê？」M̄-koh耶穌提醒in，in所跟tòe ê人子來m̄是為tio̍h毀滅，是beh拯救（路加福音9章51～56節）。約翰kap雅各百面是因為án-ne才得tio̍h「Boán-ne-ge̍h」（希臘語Boanerges）ê稱號，希伯來語ê意思是「雷公ê kiáⁿ」，耶穌tō是án-ne叫in（馬可福音3章17節）。In這號雷公性，定定kha̍p-bē-tio̍h tō kap人起衝突、冤家量債。
3.共觀福音單獨講tio̍h約翰ê經文講伊腹腸eh-kheh：「老師，阮有看著一个人奉你ê名趕鬼，阮給伊阻擋，因為伊無teh tòe咱。」（馬可福音9章38～40節；路加福音9章49、50節）。M̄ koh，耶穌反倒轉kā約翰講：「M̄-thang kā伊阻擋，因為無人會奉我ê名kiâⁿ神跡，隨時koh講我ê歹話。無反對咱ê就是為咱。」
約翰初初hō͘人ê印象是充滿野心、急性koh無度量。事實上，伊m̄-nā án-ne。咱知影共觀福音記載袂少關係約翰ê代誌，m̄ koh，第四福音書攏無講tio̍h約翰。第四福音書有講一个「主所疼ê門徒」，彼自古早tō hŏng當做是約翰，不而過這个看法佇近代已經有真濟人憢疑。 （後期koh刊）
延伸閱讀：主 ê 門徒
