Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎So͘ Iàn-Tekû
2020 nî 10 goe̍h 18 lé-pài, ūi-tio̍h tōa-hàn hāu-seⁿ ê chhin-sū, choân-ke kàu Thô-hn̂g chhī ê Peh-tè-khu the̍h-chhin, goân-pún sī kóng lú-hong beh tī kōaⁿ-tiāⁿ hit kang sūn-sòa chhiáⁿ lâng-kheh. Lâm-pō͘ ê lē sī seng kōaⁿ-tiāⁿ tēng-hun lú-hong soán ji̍t-chí, kiat-hun ê sî lâm-hong kéng ji̍t-chí seng chhiáⁿ lâng-kheh, sòa-chiap lú-hong chiah pān-toh. Khó-lêng sī lâm-pak hong-sio̍k bô-kâng, á-sī giân-gí piáu-ta̍t têng-tâⁿ, lú-hong tòng-chò goán tông-ì tēng-hun kah kiat-hun beh kāng chi̍t kang. Tī bo̍k-bêng-kî-biāu, hâm-hâm-hô͘-hô͘, hoaⁿ-hoaⁿ-hí-hí ê tiong-kan, hō͘ lú-hong soán tēng-hun kah kiat-hun ê ji̍t-chí.
Pòaⁿ kó-goe̍h āu, hāu-seⁿ kóng tēng-hun kah kiat-hun ê ji̍t-chí tùi-hong lóng soán kāng chi̍t kang tī Thô-hn̂g pān tēng-hun gî-sek, sòa-chiap kiat-hun iàn-kheh. Góa siūⁿ kóng chit-siaⁿ hāi-liú-liú, ná-ē bú chit-chhut–ê, lú-hong gō͘-kái góa ê ì-sù. Chit tùi sin-lâng í-keng khai-sí tī pak-pō͘ chún-pī in ê hun-lé. Ūi-tio̍h siang-hong ê hô-hâi, góa niū-pō͘. Hāu-seⁿ sin-pū tī 2020 nî 12 goe̍h 24 seng teng-kì kiat-hun.
Thàn hāu-seⁿ sin-pū tńg–lâi kòe-nî, góa sū-sian ū kah bo̍k-su, hāu-seⁿ chham-siông hó-sè, 2021 nî 2 goe̍h chhe 10, kū-le̍k 12 goe̍h 29 tī Tōa-chhiū kàu-hōe chò ka-têng lé-pài, kā chit tùi sin-lâng chiok-hok, in-ūi nā beh tī kàu-hōe pān kiat-hun-sek to͘-ha̍p bē tú-hó. Thong-kòe kán-tan ê gî-sek tī kàu-hōe hō͘ bo̍k-su chèng-hun, sin-lông kah sin-niû lóng bô chhēng lé-ho̍k, m̄-sī kiat-hun-sek, sī kán-tan ê ka-têng lé-pài, mā bô iau-chhiáⁿ chhin-lâng pêng-iú chham-ka. Goán choân-ke 5 lâng chá-sî 9 tiám ùi Lō͘-tek chhut-hoat, kàu Tōa-chhiū kàu-hōe chiah 9 tiám 45 hun, chún-pī hó-sè kā bo̍k-su kóng 10 tiám khai-sí, bo̍k-su thàm-thâu khòaⁿ gōa-kháu kóng: 10 tiám 10 hun chiah khai-sí.
Kòe chi̍t-tiap-á-kú, lé-pài-tn̂g gōa-kháu ū chi̍t tâi chhia, kèng-jiân sī Ki-liông hiaⁿ. Koh ū chē-chē chhia chi̍t tâi chi̍t tâi sái lâi kàu-hōe, góa chin gông-ngia̍h, ná-ē hiah chē kàu-hōe ê hiaⁿ-tī chí-moāi lâi chham-ka goán ê ka-têng lé-pài? Hó-iú Bí-hâ choan-têng sàng hoe lâi hō͘ goán sin-pū. Kán-tan ê ka-têng lé-pài piàn-chòe ì-gōa ê hun-lé. Ì-gōa ê hun-lé sī sin-lông kah sin-niû bô chhēng lé-ho̍k, ū 2 ê bo̍k-su ūi in chèng-hun, ū chi̍t tīn goán bô iau-chhiáⁿ, mā m̄-chai in tùi tó-ūi thiaⁿ-tio̍h hong-siaⁿ, cháu lâi kàu-hōe kā goán chiok-hok ê chin ū-sim ê hiaⁿ-tī chí-moāi. Bo̍k-su ê chèng-tō, hiaⁿ-ché ê chiok-koa, chi̍t siaⁿ chi̍t kù lóng khek-tiâu tī goán ê sim-lāi.
Kám-siā Siōng-tè, kám-siā hiaⁿ-tī chí-moāi ê chiok-hok, kám-siā ta̍k-ke thè goán mî-pó͘ ûi-hām ê khang-chhùi. Goán goân-pún pān chi̍t-toh an-pâi beh kah bo̍k-su choân-ke chū-chhan, lō͘-bé tiong-tàu pān 3 toh. Ì-gōa ê hun-lé tī ì-gōa ê hoaⁿ-hí kap gông-ngia̍h tiong-kan oân-sêng.
〈Hông-un Goân-hâm kiat-hun chiok-sû〉
Hông-tô͘ tāi-tián hó chiong-lâi,
Un-tián móa-móa hok móa-chài,
Kám-siā Siōng-tè chhe thiⁿ-sài,
Un sù hēng-hok tōa bú-tâi.
Goân-hâm un-jiû lâng-lâng ài,
Hâm-ióng chhut-chiòng thiam kong-chhái,
Ti-chêng ta̍t-lí hó thài-thài,
Chiok í hia̍p-chō͘ hó ang-sài.
Ki-tok sìn-gióng kiat liân-lí,
Hông-un sim-lāi chí-ū lí,
Sèng-keng tō-lí ài kín-kì,
Lêng-siu kî-tó bô thêng-chí.
Ti chhù pē-bú sioh-miā-miā,
Goân-hâm ǹg-bāng lí lâi thiàⁿ,
Sìn-gióng bô phian ài sì-chiàⁿ,
Tòe Chú kha-pō͘ Hiòng-chêng kiâⁿ.
