Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◎William Barclay
台譯◎陳惠雅
有關約翰主要ê理論kap發展：
1.主所疼ê門徒根本m̄是實在ê歷史人物，只是一个理想中ê人niā-niā，而且是用心塑造出來ê一个敬虔ê形象。
2.有人kā主所疼ê門徒當做是加略人猶大，有影真譀。這款主張叫是猶大是唯一了解耶穌心意ê門徒，而且猶大ê行動是耶穌所授意ê。諾斯底派有《猶大福音書》，in kā猶大看做是唯一真正了解耶穌ê人，而且是幫助耶穌完成伊死亡ê理想ê「諾斯底主義者」。這種看法無符合約翰福音13章21～30節所講ê。
3.有人講主所疼ê門徒是拿但業。「伊是真正ê以色列人，是心無虛假ê人」（約翰福音1章43～51節），而且伊kah耶穌mā真親近。
4.有人認為，主所疼ê門徒是馬可福音14章51節所講ê hit个少年人。耶穌受掠ê時，伊兇兇狂狂棄捒moa tī身軀ê幼苧布，thǹg-pak-theh逃走。
5.Mā有人講主所疼ê門徒是拉撒路，因為經文有三擺講起耶穌疼拉撒路（11章3、5、36節）。
6.主所疼ê門徒有可能是hit个好額ê少年財主。馬可福音講起：「耶穌注目kā伊看，用疼心kā伊講。」（馬可福音10章21節）有人講少年財主kā家己ê心獻hō͘耶穌，成做「好管家」，為耶穌kap其他使徒準備Pôaⁿ過節ê晚餐，tī耶穌最後ê晚餐，the tī耶穌胸前ê hit个「主所疼ê門徒」tō是伊。其實，這是「看一个影，生一个囝」，全全是人臆出來ê。
反對「約翰是主所疼ê門徒」ê人根據ê主要理由是：這兩人性情完全無相仝。約翰充滿野心、kha̍p-beh-tio̍h tō受氣，腹腸狹，m̄-koh主所疼ê hit ê使徒是一个充滿疼心ê人。不而過，咱猶是甘願相信傳統ê看法，就是使徒約翰kap主所疼ê使徒是仝一个人。伊ê性命因為主耶穌基督來改變，雷公ê kiáⁿ chiū án-ne成做有疼心ê使者。新約對主所疼ê使徒有啥講法？Tī古早ê宴席，逐家lóng是身軀倒斜斜，kā跤伸ùi後壁，用倒手來chi-chhî頂半身ê重量，hō͘正手自由提食物來食。Tī最後ê晚餐，主所疼ê hit个使徒靠倚tī耶穌ê胸坎前，tō是講，伊坐tī耶穌ê正爿。彼得問耶穌啥人beh背叛伊ê時，伊tō是ǹg hit个使徒講ê（約翰福音13章21～25節）。聖經記載，耶穌kā伊ê老母馬利亞交託hō͘伊所疼ê門徒照顧（約翰福音19章26～27節）。耶穌koh活ê hit透早，代先來到墓地ê chiū是主所疼ê門徒（約翰福音20章1～10節），koh活ê耶穌tī湖邊向門徒顯現ê時，主所疼ê門徒mā在場，當彼得問伊ê將來會如何ê時，受tio̍h主ê教示。約翰福音作者ê權威之一mā是包含伊用約翰做名（21章）。
新約內底關於約翰ê事koh有一項，約翰福音18章15、16節講有一个ê門徒，tī耶穌受掠ê時，彼得kah伊tòe tī後壁，beh看到底發生啥代。隱名ê門徒是大祭司熟似ê人，in chiah ē-tàng tòe耶穌kiâⁿ入大祭司ê內埕。約翰是án-chóaⁿ熟似大祭司ê，thang用下面兩个方式解說。
1.約略是主後190年，以弗所ê主教坡旅甲（Polycarpus）有留批信講約翰是「見證者kap老師，bat倚tī主ê胸坎前，做過祭司、戴過祭司ê頭冠。」設使坡旅甲所寫ê是tio̍h，約翰kah祭司有真深ê淵源，伊beh入去大祭司ê內埕無困難。
2. Koh khah有可能ê是第二个解說。莫頓（H. V. Morton，1892～1979年）tī伊ê著作《主ê 跤跡》（In the steps of Master）內底，有一寡趣味ê資料：「Tī耶路撒冷ê後街仔，有一間暗眠摸koh細細間ê m̄-chiâⁿ厝仔，我相信內底全lóng是石頭kah彎彎ê拱門，看起來親像一間阿拉伯ê咖啡室，m̄-koh，hia bat做過基督徒ê教會。根據法蘭西斯教會ê傳統，這間教會是設立tī約翰ê老爸西庇太ê一間厝內。法蘭西斯講這个家庭是加利利ê魚販仔，tī耶路撒冷有開分店，專門供應魚仔hō͘大祭司。這點會當說明為啥物約翰會熟似大祭司in兜顧門ê人，mā thèng-hó了解西庇太掠魚事業ê狀況，知影伊是án-chóaⁿ有才調倩人kā in kiáⁿ tàu掠魚（馬可福音1章20節）。 （後期koh刊）
延伸閱讀：主 ê 門徒
