Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
福伯講：「早前有一个人kah厝邊頭尾攏bē合，定定夯鎚夯棍佇人門口耀武揚威，那像beh chhōe人相拍。有一工厝邊隔壁合齊起來，按算beh kah伊大車拚一下。無疑誤hit-ê人煞kiu去、m̄敢koh大細聲。留落『惡人無膽（Ok-lâng bô-táⁿ）』chit句台灣俗語話。」我問講：「你是beh講啥人chiah惡chiah無膽？」
福伯講：「2023年9月24，中國佇南海ê黃岩島設置300公尺長ê漂浮佇海面ê遮閘物，來宣示主權，beh kā菲律賓漁民趕出去。因為中國阻擋菲律賓漁民進入合法ê所在掠魚，菲律賓當局譴責中國當局違反國際法。9月25，中國外交部發言人汪文斌強調：『黃岩島是中國ê固有領土，中國對黃岩島kah伊附近海域ê主權無thang爭議。』仝一工，菲律賓海岸警衛隊宣布講已經kā中國佇黃岩島附近設置ê漂浮海上遮閘物拆除。菲律賓海岸警衛隊ê潛水員，佇南海水底割斷一段索仔，是中國軍隊設置ê浮佇海面ê遮閘物ê一部分。菲律賓海岸警衛隊mā有翕相公布。
福伯講：「最近菲律賓政府有漸漸踏硬。今年2月初6，菲律賓海岸防衛隊司令阿武（Artemio Abu）表示：『菲律賓漁船佇南海受中國海警船擾亂不斷，阮會強化部署2萬6000个菲律賓海岸防衛隊，目前有25隻船艦thang巡邏，而且會執行koh khah濟偵察機任務，來保護海上領土kah漁民安全。」
中國講ê黃岩島，是南海中沙群島ê一個環礁。Chit ê島離中國海南島500海里、離菲律賓蘇碧灣100海里。2012年北京掌控黃岩島，菲律賓不服要求仲裁，2016年海牙常設仲裁法院仲裁法庭一致裁定，用《聯合國海洋法公約》做基準，中國對南海自然資源無根據「九段線」ê歷史性權利。
福伯講：「9月26，中國外交部發言人對菲律賓講：『阮khó͘-khǹg菲律賓m̄-thang無事惹事、製造事端。」伊講，索仔hông割斷了後、菲律賓kā固定索仔ê biâu（錨）解除了後，中國mā已經kā遮閘物攏拆除了了。」
我問講：「一向惡chhih-chhih ê中國chit遍ná-ē koai-koai-koai，chiah好死？」
福伯應講：「因為菲律賓chit遍ê行動是小馬可仕總統直接下令ê，真有可能已經有kah美國講好勢，中國若khí-kha-tāng-chhiú，美軍隨時趕到位。」
福伯講：「1951年，美國kah菲律賓訂《美菲共同防禦條約》，hit當時以菲律賓領土為主。今年2月21，美國國防部長表示，他國若是佇南海任何所在對菲律賓軍隊、飛機kah公務船隻發動武力攻擊，美國會根據《美菲共同防禦條約》第4條，照約束防禦菲律賓。」
Oh，原來惡人無膽是teh講中國。
