Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
福伯講：早前咱台灣有一个sin-pū（新婦），這个sin-pū對伊ê ta-ke（大家）誠刻薄，真少煮好食物服侍大家。但是若去作人客hông請，伊會一直挾肉hō͘ in大家食。M̄-bat伊ê人謳咾伊是一个有孝sin-pū，bat伊ê人會佇kha-chhng（跤尻）後罵講：「假有孝，Pa̍t-lâng ê toh-téng ngeh bah chhī ta-ke （別人的桌頂挾肉飼大家）。」日後，若有人干單會曉開別人ê錢抑是慷慨別人ê物件作人情，人tio̍h會用chit句台灣俗語話ka-罵。
福伯問我敢bat聽過chit句俗語話？我應講bat。我問講：「你是想beh罵啥人？」
福伯講：2023年9月13，台灣「亞太千里論壇」邀請新加坡前外交部長楊榮文演講，講題是：「一个新加坡人視角下ê兩岸關係」，伊竟然提出台灣會使kah中國共組一个「中國人ê邦聯」（Chinese Commonwealth），按呢tio̍h ē-tàng邁向漸漸和平統一ê過程。台跤有一个少年聽眾喝講「阮是台灣人，m̄是中國人！」楊榮文回應講伊ē-tàng明白有真濟台灣人無愛hō͘中華人民共和國統治，因為台灣經歷過威權政體統治。「若是我是台灣少年人，我mā會有仝款ê想法。」
我問福伯講，楊榮文按呢敢m̄是「別人的桌頂挾肉飼大家」？
福伯笑講：美國在台協會（AIT）前處長司徒文（William Stanton）tio̍h講代先。2023年10月初六，司徒文投書《台灣英文新聞》反駁楊榮文ê論點，講若是考量台灣、中國、新加坡三个中間ê歷史文化、政經背景kah互動，講實在，新加坡比台灣koh khah適合加入楊榮文提議ê「中國人ê邦聯」。
司徒文佇投書中批評講：ùi楊榮文ê發言thang看出楊榮文對中國國家主席習近平ê「兩岸統一進程」kah統一野心了解傷少，mā無看tio̍h香港回歸中國了後，「一國兩制」按怎悽慘ê例。楊榮文mā m̄知影，當今大多數台灣人對中國共產黨統治ê中國完全無趣味。設使真正beh建立一个「中國人ê邦聯」，新加坡比台灣koh khah適合加入試看māi。第一，ùi土地面積來看，台灣面積是新加坡ê 50倍，新加坡kah香港仝款一點仔土地，吸納中共hit套遊戲規則khah容易。第二，新加坡590萬人中，75%是華人。華人佇新加坡真濟攏有重要政治職位，三屆總理攏是華人。第三，新加坡一定比台灣koh khah會適應中國共產黨ê政治kah社會制度，根據美國「自由之家」所做ê自由度ê報告評比kah排行，新加坡干單ē-tàng算是「有限度ê自由」niā-niā，中國是自由度足低。2023年台灣自由度全球排名第18名，亞洲第2名，干單輸日本。新加坡人可能比台灣人koh khah會適應無自由ê政治kah司法系統。
福伯講：司徒文ê意思誠明，若beh佇「別人ê桌頂挾肉飼大家」，不如先佇家己ê桌頂挾肉飼大家！
