◎李南衡
頂日拄 tio̍h 一個中學 ê 同學，in 厝裡有一塊仔，我問伊：「Chit 氣好 bò͘ ？」伊應講：「Chit 幾年 chia 投資一寡、hia 份一寡，無幾年七溶八溶溶了了（chhit-iûⁿ peh-iûⁿ iûⁿ-liáu-liáu）！」伊按呢講有 khah 膨風，我知影伊投資所了去 ê，極加是財產去一角角仔 niā-niā。奇怪，伊那會講 chit 句台灣俗語話？我問講：「七溶八溶溶了了，你敢知 chit 句俗語話是按怎來的？」伊應講：「M̄ 知，我聽人按呢講。」
戰後，中國國民黨政府劫收台灣了後，m̄ -nā kā 台灣二三十年無看 tio̍h ê 各種傳染病帶來台灣，mā kā 中國官方 ê 貪污舞弊、民間欺詐吸金 ê 地下錢莊帶來台灣。上海人來台北開 ê「七洋貿易行」算是上轟動上出名 ê 一件。
1949年4月20，陳誠省主席查封地下錢莊「七洋貿易行」，kā 當時囤積物資、買俗賣貴 thàn 大錢、擾亂台灣經濟 ê「七洋貿易行」負責人掠起來，斷掉當時台灣 kah 中國之間 ê 滙兌大管道，koh 有1000萬美金作後注，兩個月後 ê 6月15，陳誠才有可能佇台灣推行伊 ê 貨幣政策──發行新台幣，以舊台幣4萬換新台幣1元。
「七洋貿易行」ê 做法是，用懸利息吸錢。準講一般銀行 ê 存款利息是2%，伊出5倍10% ê 利息，若錢寄佇伊 hia 1000萬，除了付真懸 ê 利息以外，另外現付 hō͘ 介紹人總金額5% 50萬作報賞，介紹愈大條 ê 領愈濟錢。而且鼓勵你 chhōa 下腳手來，無論你叼一個下腳手領偌濟報賞，你攏會 tàng 有1% 10萬 ê 報賞，講 khah 白 tio̍h 是「貓鼠仔會」。當時一個朋友 ê 大兄是「貓鼠仔會頭」，當好 thàn ê 時 in 厝裡棉被櫥攏總是銀票。
當時小貪 the̍h 錢去借「七洋貿易行」ê ，錢愈寄愈濟。雖然每個月有領一成 ê 利息錢轉來，但是當負責人攏 hông 掠去，本錢無 tè 討。因為「七洋」ê「洋」字，kah 物件佇水裡「溶去」ê「溶」字仝音，所以才會有「七溶八溶溶了了」chit 句台灣俗語話。
一位歷史學家講：「人一定 tio̍h 讀歷史，按呢你才知影，人無 ùi 歷史學 tio̍h 啥物。」1949年大台北地區有真濟人為 tio̍h 貪懸 ê 利息，錢寄佇「七洋貿易行」ê 落場是一寡錢「七溶八溶溶了了」，32年後 ê 1981年，沈長聲、劉鐵球、於勇明等人以投資公司名義成立鴻源機構，利用懸利息作「餌」，用「貓鼠仔會」ê 方式，非法吸收民間游資新台幣1000億去炒股票、炒土地。1990年喝倒 tio̍h 倒，留落900億 ê 殘局，m̄ -nā 一時造成台灣金融體系動亂不安，mā 害 tio̍h 16萬個債權人哀父叫母：「我 ê 錢七溶八溶溶了了！」
「七溶八溶溶了了」chit 句台灣俗語話，到今仔日會曉講 ê 人已經愈來愈少 ah，知影 chit 句俗語話是按怎來 ê 人一定 koh-khah 少。
