張宗隆（台灣基督長老教會總會聖經現代台語譯本翻譯審議小組召集人）
張正雄兄刊佇《台灣教會公報》3458期的大文，講著台語文一個非常重要的問題──台語文的主體性。關心台語文的人攏會抵著（tú-tio̍h）此個問題，mā 需要做夥進一步思考討論。特別，面對台語文受強勢的華語文真大影響的實況，咱會發見台語文主體性的問題加真緊迫、複雜。
以下是筆者對台語文主體性的一寡淺見：
一、台灣話是語言抑是方言？
台灣話是語言，毋是方言！百外年前，杜嘉德（Castaire Douglas）就將廈門話定義作獨立的語言，毋是方言。何況，台灣話老早就及廈門話無仝。台灣話毋是閩南方言，毋是普通話閩南方言，毋是中國方言的一種。台語毋是廈語！
咱會當真自信對全世界講，雖然台灣話的起源是佇中國，毋拘已經毋是中國漢語的支系方言。台語文 vs.漢語普通話／華語文的情形，含日語文 vs.中語文，以及美語文 vs.英語文的情形仝款。台語文及美語文、日語文攏會當公開講，in 的語文是 tùi 中語文抑是英語文去的，毋拘已經 tùi 華／英語文獨立出去啦。台灣話是另外一個獨立語言！台語文是獨立佇華語文以外的語文！
二、著替台語文「尋根」？
有人愛替台語文 tùi 古音、（古）漢字、華語文去「尋根」。此款作法，有時陣有需要，有時有幫贊，有時咱就深深感覺 so what。
講著台語漢字及台灣話的用字、讀法，豈（kiám）一定著用廈門音新字典、閩南方言辭典、廈英及台日辭典作標準抑是作根據？台灣有一寡本土人士編撰的台灣話字／辭典，雖然有時猶會去中語文「尋根」，毋拘已經有新的詞，造新的字；仝款的漢字有新的讀法（註1）。Tùi chiah-ê 著作及整理，以及觀察台灣人的生活語言，咱嘛會當看著有一寡仝款的用字用詞，佇台灣話的含意已經及漢語普通話抑是廈門話的含意無仝。換話講，對台語文的用字、用詞，抑是讀法，毋是閩南方言字／辭典，以及 hiah-ê 用漢語普通話／華語讀法做台語文的根據的辭典講的才著。華語文無資格對日語文講東講西（註2），美語文毋免插英語文 teh 講啥（註3）。像款，台語文毋免步步去華語文「尋根」；台語文的讀法、用字、用詞、意思，毋免步步用 hiah-ê 根據華語文編的（普通話）廈門方言字／辭典，抑是古早的廈門音字／辭典作最高權威。
聖經現代台語譯本雖然字詞含發音及廈門音有仝款的所在，毋拘，伊用的是台灣話毋是廈門話；聖經此個譯本是現代「台語」譯本，毋是「廈語」譯本。
有影，目前台語文的讀法、用字、用詞，是佇「戰國」的情形。咱著接納此種現況，嘛著相尊重，佇逐個人對字詞、發音的「寸尺無仝」的中間做伙為台灣話拍拚。
三、按怎才是正港的台語文？
台灣話真多元，嘛真開放。台灣話有漳州音、泉州音、海口音、鹿港音、金門音（註4）……。雖然有人笑台灣話「不漳不泉、亦漳亦泉」，毋拘這抵抵表示台灣話的多元性。咱已經 bē 當講，用叨一種音講，才是正港的台灣話。咱真歡喜，無論對方講什麼音的台灣話，大家會當互相接納、包容，koh 會當了解對方 teh 講的話的意思。
台語文因為歷史因素，加真豐富。平埔族話、原住民話、日本話、英語、普通話、……，攏有佇台灣話內面。換話講，台灣話有真多外來語，台灣人會曉用台灣話的發音講外來語的字及詞。台語文已經有一寡廈門話、漢語普通話無的字、詞，特別伊的語法及華語文的無像（bô-siâng）。
因為歷史經驗的緣故，對台語文引用華語文，咱特別敏感。台語文對華語文的引用無法度避免，毋拘欲接納到什麼程度，就見仁見智啦！
台灣話互咱掛慮的有真多項。其中一項咱 bē tàng 忽略，就是用普通話的文句、語法直譯做台灣話。此款情形，咱佇電視台語新聞、演講（包括教會中的講道）不時會發見，佇日常的交談時常會聽著，佇台語文的刊物常常會讀著。台灣話「漢語普通話化」是一個大危機！咱欲堅持台語文的主體性，teh 主張著講正港的台灣話，可能著佇句讀（kù-tāu）及語法出較多力，較毋是 teh 爭發音及漢字按怎才著，雖然後面二項嘛真要緊。
建立台語文的主體性是台語文工作者共同的關心及勞力。佇以上講著的幾點，筆者感覺，台語文佇目前猶會有「見仁見智」「寸尺無仝」的情形。真向望，聖經現代台語譯本的讀者對此個譯本的用字、用詞、發音，會當包容、尊重。
四、什麼時台語文會當全面羅馬字化？
欲建立台語文的主體性，上根本的法度，是台語文羅馬字化。
呼音（拼音）語文是人類文字演化一定愛達到的地步。呼音文字比象形文字較好學，較緊普遍。呼音文字比象形文字較有包容力，嘛較會當保留所引用外來語的元素，較會當及國際連接。
台語文佇目前的處境，羅馬字化的第一個好處是，會當「去華語文／漢語普通話化」；無論是用字、用詞、讀法、語法，甚至思想，攏會當脫離普通話／華語文的牽制（khian-chè）。越南語文、韓語文、日語文攏是咱真好的先例（註5）。台語文若羅馬字化，就會當照台灣話想、講、寫、讀，建立 台灣文化（註6）的主體性。
什麼時台語文才會當全面羅馬字化？著聽候到台灣建國以後嗎？
台語文羅馬字化是一個大題目，有真多值得咱研究，嘛需要大家做夥討論。筆者干單佇 chia 點火作開始。真向望咱台灣早一日有家己的語文。
× × ×
張正雄兄的文章有講著「人名及地名」。現代台語譯本內面的人名、地名，有關漢字及讀法的關係，新舊約聖經全書出版前，本小組猶會做總體的討論。
筆者真期待有 koh 較多的兄姊及關心台語文的朋友歡喜對此個譯本提出建言，互此個譯本 koh 較好、koh 較 súi，通成做對台灣教會及台灣人民的祝福。
註
註1.張正雄兄佇文章內面講，伊有佇某圖書館 péng 館內「所有的」（quotation 是筆者添的）台語 kah 閩南語字典，tùi 按呢講有某某漢字並無什麼款的發音。張正雄兄若會當，請給彼個圖書館建議，加買寡本土人士編撰的台灣話字辭典。
註2.日本出名的建築師伊東豊雄去中國訪問的時，有中國人講伊的名的「豊」毋著，叫伊著改作「豐」才正確。
到今（2018）年，台灣的政府才承認的「黄」及「黃」攏著，攏會使（ē-sái）用。以前姓「黄」的人士去公家機關申請資料、辦手續，攏真麻煩。「黃」，日本人寫作「黄」；台灣經過日治時代，「黄」就按呢留佇台灣。
註3.到今仔日，猶有英國人會將美國人寫的 labor, fiber 改作 labour, fibre。有英國人講：美國人 bē 曉講英語；美國人講的英語毋是英語。
註4.今年，有一個民間的基金會舉行全國性國小學生的台語比賽。金門嘛有一隊來參加，毋拘 in 得著的分數並毋是真高。當然，比賽有輸有贏，逐個人有伊的標準，著尊重裁判共同的裁決。不過，事後有人 teh 討論，講，金門隊的同學講了實在非常好，可能是 in 的金門音及（金門的）用詞，台灣本島的人較無慣勢（koàn-sì）。
註5.日本、韓朝、越南原來的主流文字攏是漢字，毋拘 in 決心用家己早就創設的文字作 in 的國語文，一個非常重要原因是欲「去中國化」（脫中）。
註6.台灣文化包括中華文化、平埔族文化、原住民文化、西洋文化、日本文化、近年來新住民（南洋）的母國文化，以及 1948 年以前就住佇台灣的客人、福州人及「台灣人」（河洛／福佬／鶴佬人）的文化等等。台灣文化是全世界上有包容力、上有特色的新文化。
