心慢慢拍開，寫落破碎、寫出整全、寫落感動、寫出恩典。
佇巴克禮文字事奉學校，抾倚思緒、共記持揣轉來，互家己佮上主連結。
透過個人經驗，用性命影響性命，傳揚福音，幫贊眾人佮上主相遇。
（相片提供／陳逸凡、陳惠淑）
講師簡歷
王昭華
*2011 台灣文學獎台語散文金典獎得主
*2018 金馬獎最佳電影原創電影歌曲作詞人
台文心適寫 Tâi-bûn sim-sek siá
◎王昭華
交出 chit-kái 「第13屆巴克禮文字事奉學校」寫作營台文場題目「台文心適寫」ê 時，心內 iáu 是略仔感覺 khê-khê。
「心適」ê 意思是趣味、好 sńg。憑天良 kóng，台文寫作，實在 m̄ 是一chân 心適 ê 代誌，嘛 m̄ 是倚靠一時 ê 心適興 tio̍h thang 學會。
總是，「寫作」這項事，完全是「心」ê 運作。心受感動，心內出聲 beh 講話，咱透過筆尖（或者是指尖），努力 kā 話句一字一字沓沓 á 寫（或者是phah）落來，hō͘ 咱 ê 「心」得著一个適當 ê 形式來表達。
這是訂「台文心適寫」chit-ê 題目 ê 思量。
對台語 kàu 台文
「台文」是台語 ê 書面化，台文 beh ē-tàng「心適」寫，台語能力一定 ài 有夠。卻是，現此時50歲以下 ê 台灣人，lóng 講華語講了 chiâⁿ 慣勢，逐工目睭擘金看著 ê 字、耳空 phah 開聽著 ê 話，mā 大面是華語。這款情形之下，致使咱若「beh 寫台文」進前，必須 ài 先有意識「kā 台語 kóng–轉來」。
「台語」可比是一條聲線、一塊曲，「台文」就若像是譜。記譜ê方式是在人發展出來–ê，聽寫 ê 能力 mā ài 靠大量練習。Góa 一直感覺，台語 kap 音樂是仝 chi̍t 件代誌。學寫台文等於是學一項樂器，學樂器有「心適」無？頭仔可能有心適興，不而過，若想 beh 熟手、技術精到，達 kàu 自由自在 ê 境界，下 ê 工夫定著 m̄ 是一工兩工。「心適」掠外，更加需要 ê 是決心 kah 研究心，beh ē-thang「心適寫」、「寫心適」進前，可能 ài chiâⁿ 練–leh。
當初，假使拆白講 kah chiah-nih 無心適，m̄ 知 kám iáu 招有學員 neh？真感謝可愛 ê 各位。
一下晡無夠3點鐘 ê 課，對一个母語是台語 ê 學員，beh 對台語牽入去 kàu 台文，是 kan-taⁿ 有夠tiām 1粒種子入心 niā-niā。短短 ê 時間內，希望學員對台文書寫有基本 ê 認識，有影 phah 開心 ê 目睭，對生活中 ê 台語 kap 台文有新 ê 眼光。從來 m̄-bat 寫過台文 ê 學員，來寫作營一定ài提筆寫，寫 kúi 句是 kúi 句，是詩、是話，lóng 好。
Chit 粒種子若有出芽，後手若繼續有生長 ê 意志，對台文有愛情，tō ài 家己去追求 ah。Ah tī-chia ē-tàng kā 逐家報 ê 下一步，就是一定 ài 去 kā 白話字學 hō͘ 好，he 是咱 ê 好寶。
對台南 kàu 台北
「Kā 生活 ê 聲音記 lo̍h 來」、「kā 心內 ê 聲音寫出來」，這條「聲音」ê 主索，是 kǹg 過台南場 kap 台北場 ê 共同中線。
台語 ê 生態，南 kap 北、都市 kap 草地，差真濟。Tī 台南場，台語逐家 lóng 聽有，投影片出現白話字 ê 時，閣有kúi-nā 位學員會曉讀，用台語讀漢字 ê 文章 koh khah 無問題。台北場 tō 無仝 ah，有完全聽無 ê 僑生，mā 有第一擺講台語 ê 外省第二代。Khah 濟是普普聽有，平常時仔真少有機會講台語 ê 人。
台北場 ê 場地 tī 淡水教會1樓教室，淡水是 góa 徛過24冬 ê 地頭，góa 台文創作起蒂 ê 所在，淡水教會mā 是 góa ê 母會，góa 真久真久無 tńg 去，上帝 ê 引導真奇妙。
Tī 淡水講 ê 內容，lóng 是取khah 早 tī 淡水生活 ê 例。其中，有kóng 著詩，拄好最近 tī 舊冊店買著1本美國囡仔書作家艾瑞‧卡爾（Eric Carle） ê 冊，華語冊名叫《好忙的蜘蛛》，內底1隻蜘蛛自頭 káu 尾足專心–ê，馬啊、牛母啊、羊啊、豬啊、狗啊、貓啊、雞啊 kā 招 beh ????迌 lóng m̄ ，規日全精神無閒 leh 吐絲 chhiah 網，網 chhiah 好，tng 著1隻胡蠅，天也暗 ah，蜘蛛無閒 soah，忝 kah 隨睏去，這就是蜘蛛足足足足無閒 ê 一工。
曾經有一个朋友第1擺寫台語詩，詩 ê 題目就叫〈Góa 哪會 chiah 有福氣〉，hit 首詩最後1句 kóng：「góa 哪會 chiah 有福氣，m̄ 是蜘蛛，mā 會曉吐絲（詩）」，「吐絲」kap「吐詩」仝音無仝意，chiâⁿ 趣味。Góa kā《好忙的蜘蛛》翻譯做台語，唸 hō͘ 學員聽，用耳仔來感受台語繪本，是咱非常欠缺 ê 經驗。
大人囡仔 lóng 佮意 ê 繪本，文字無濟，話 mā 無濟，thèng 好刺激咱 ê 的思考：若是咱 beh 用簡單幾句話去編出1本繪本，咱 ē-tàng 按怎去 kóng 這款超級短 ê 故事？用咱有限 ê 台語能力，去創造美妙 ê 奇蹟。
對巴克禮 kàu taⁿ
明年，是巴克禮牧師170冥誕。140冬前，巴克禮牧師積極推 ê 白話字，目的是beh hō͘ 濟濟台灣人 bat 聖冊 ê 道理，時間chiah 過百外冬，漢字一四界真普遍，白話字 soah 無啥人 bat，連台語 mā teh beh 斷氣。如果語言只是傳道理 ê 工具，是 m̄ 是咱 ài 用少年人聽有 ê 話來傳福音 ê 上重要–ê，kám m̄ 是「愛」chiah-ê 問題，相信一定有人已經真嚴肅思考過。
Chit-ê 世界一直 teh kóng「愛」，góa 為 góa ê 父母話感覺深深 ê 悲哀，百年 ê 過程中，無公義徛 tī 伊 chit-pêng。台語、台文，怎樣復活，這是一條 ái 跑走到盡 ê 路。Góa 真歹勢，lóng 用行–ê，無用走–ê。
最後，感謝教會公報社舉辦「巴克禮文字事奉學校」，hō͘ góa chit-ê 機會。感謝主。
學員心得分享
Kā 心內話寫出來
◎澎錦
自細漢我 toh 愛寫作，生活當中遇到 ê 喜、怒、哀、樂，我攏會用文字記錄落來。有當時，嘛會提過去寫–ê 來看，無仝款 ê 時空背景，toh 有無仝款 ê 想法佮看法，回頭去看，佇這當中會得著反省，面對家己，認識家己，koh-khah 知影日後安怎改進。若是佮厝內 ê 人有衝突 ê 時，我嘛會佇 khah 冷靜 ê 時，寫出一寡仔心內話，透過筆寫出來 ê 文字，情緒已經有過濾，殺傷力 toh khah 小。有當時，喙講 bē 出 ê 甜言蜜語，用筆寫出來嘛 khah bē 歹勢，hō͘ 人看著 koh 有 sai-nai 味，親人之間 ê 感情會 koh khah 好。
我 teh 讀小學 ê 時，時常替大姨婆寫批，逐擺看著老歲仔人 hiah-nih-á 滿意 ê 表情，小小年紀 ê 我嘛感覺著書寫 ê 快樂， hō͘ 我感覺真滿足。
阮3个 gín-á 細漢 ê 時，逐年 ê 母親節攏會佇老師 ê 安排下送禮物。我會 kā in 講：「我想 beh愛 ê 禮物是1人1張小卡片，寫一寡 hō͘ 我會笑出聲，抑是感動 kah 會流目屎 ê 話。」每一擺，看著 gín-á ê「童言童語」，對過去 ê 感恩，佮對未來 ê ǹg 望，攏是足貼心 ê 感受。
阮 khah 早做生意 ê 時，bat hō͘ 人欠賬，阮尪親身去收，koh 收無。我 toh 寫一張講情、講理 ê 批寄 hō͘ 對方。想 bē 到，伊接著批，馬上 toh 來還錢。這 hō͘ 我有一種小小 ê 成就感，更加認為文字 ê 力量贏過口語。我嘛足愛 kā 一寡台語老歌改歌詞，只是 kan-ta 改改 leh 家己娛樂家己，毋捌提 hō͘ 別人看，應該是講無自信啦！
這擺，台灣教會公報社主辦寫作班，邀請陳鳳翔講師，針對安怎寫見證故事來講課。我以前 kan-ta 會曉 kā 事實記落來，感覺內容無夠 chat 實，經過老師所教 ê：五官 ê 感受、回憶 ê 探索、想像 ê 奔馳……，chiah-ê 對我來講，攏是足寶貴 ê 知識，對我未來 beh 寫文章，絕對有足大 ê 幫贊。
另外，台文課程中，王昭華老師所傳授 ê 寫作技巧，toh 是 ke 讀一寡好 ê 文章佮詩句。伊嘛介紹一寡好冊、好作者 hō͘ 阮認識。針對台語用華語思考、華語化 ê 現象，昭華老師嘛有誠好 ê 見解，確實這攏是 beh 寫台語詩、台語文章 ê 時，愛好好思考 ê 問題。
感謝公報社 hō͘ 阮有一个 chiah 好 ê 學習機會，以後寫作會 koh-khah 有信心！
課堂作品分享
台灣是美麗島
◎王琇玄
台灣是一个美麗島
充滿人情味
充滿真濟咱 ê 記持
台灣是一个寶島
文化特別 koh 趣味
人文風景 koh khah 媠
會當佇台灣成長
是我一生上大 ê 福氣
寫文章
◎盧碧雲
大家來排隊
有 ê 排直–ê
有 ê 排橫–ê
有 ê 排正爿
有 ê 排倒爿
有 ê 講古早
有 ê 講今仔
我真愛講這 ê 故事
講來講去攏 bē siān
足愛講
真愛講
講 hō͘ 逐家聽
靈感
◎王文正
寫作若溪水流過跤邊
空空掠無腹內黃金千條
想欲行 危險嘆無命
無欲行 徛久雙跤爛
無享欲出名 但求有命
一步一步目睭金金看
望水花會媠 落在心
靜靜 sù-sī 等花開
我 ê 細漢囝
◎王惠瑛
我有一个細漢囝，伊足古錐，嘛真活潑。伊 ê笑容文文仔，親像冬天 ê 日頭，hō͘ 人一種有夠溫暖 ê 感覺。雖然伊有時佇阮身軀邊走來走去，若像雀鳥仔 chi-chi-cha-cha 吵 bē 停，連一時 ê 安靜攏無。今仔日來公報社上課，真歡喜會當小可清靜 kah 自由，koh 會當讀我愛讀 ê 文章、親近我所思慕 ê 「先生」（老師）。
Ùi 報名寫作班彼日開始，我 toh 足期待。毋 koh ，課上到下埔 ê 時，我 toh 淡薄仔懷念 he 那雷吵鬧 ê gín-á 聲，koh chhun 一點外鐘，就會當看著伊囉！原來，身在吵鬧 ê gín-á 聲中，嘛是一種幸福啊！
我 ê 細漢囝
吵吵鬧鬧
半日無見
感覺思念
風 颱
◎黃復強
風聲走萬馬 橫雨掃千家
聽來親像山哮叫 看去閣若水浪花
厝瓦片片飛 樹枝斷斷落
細漢 ê 記持
◎賴玉虹
細漢 ê 記持，是
阿母佇灶跤煮飯 ê 芳味
阿爸三輪車轉來 ê 汽油味
阿兄佇外面摃棒球 ê 聲
隔壁阿伯咧叫阿孫轉來食飯 ê 聲
巷仔內，麥芽膏 ê 叫賣聲
牽起我對故鄉 ê 思念
細漢彼甜蜜 ê 滋味
親像糖柑仔
慢慢佇喙內溶開
煞深深藏佇記持內
