舊約人物的信仰模式:反抗

40
1987年3月11日,台南市府派出主任秘書薛文鳳出面接受陳情抗議,鄭國忠牧師手持麥克風由陳博誠牧師宣讀抗議書。(相片提供/黃昭凱)

陳柏壽

對創世記開始,人類 ê 先祖夫婦就先反抗上帝,叫 in 這叢果子袂使食,in 偏偏阿去挽來食。有人講對上帝 ê 信仰會沖破人 ê 理性佮科學,宗教信仰佮人 ê 理性不可並存,上帝 ê 啟示佮人 ê 本性本來就無法度一致,因為聖經不准人獨立思考佮懷疑。

但是猶太人獨立 ê 思考佮行動,處處可見:亞伯拉罕、以撒、雅各、約瑟 ê 兄弟、摩西、亞倫、基甸、撒母耳、各先知親像以利亞佮以利沙,以及流浪時期 ê 但以理、末底改、以斯帖。希伯來人 ê 先知書內面,差不多所有 ê 先知攏有佮上帝爭辯 ê 紀錄,包括以賽亞、耶利米、以西結、哈巴谷、約拿、約伯。咱會使講,會佮上帝爭辯 ê 才是先知。 Chiah-ê 先知面對權威 ê 時,違背命令佮法律,做 in ê 代誌,講 in ê 話。

Chiah-ê 人 ê 反抗行為,完全  是對頂面落來 ê 指示,完全是出佇 in 家己 ê 自由意志佮決定。埃及法老 ê 查某子佮她 ê 女婢看著希伯來人放 ê 嬰孩浮佇河中,in 違反法老王 ê 命令將嬰孩救起來,才留摩西 ê 活命。上帝呼召摩西去𤆬以色列人出埃及 ê 時,摩西應上帝講 ê 第一句話是講:「上帝啊,我是啥物腳數,祢竟然叫我?」(參閱出埃及記 3 章 11 節)

摩西無處罰百姓造金牛來拜,應該是背逆上帝 ê 命令,上帝猶繼續支持摩西。亞倫無照命令去執行燒祭 ê 禮典,上帝嘛是繼續支持這種違反命令 ê 行為。上帝吩咐約拿往東,伊 chhoàn-chhoàn 走往西,結果去互海翁吞入肚腹,三日三暝 bē 輸佇墓仔埔。

亞伯拉罕佇上帝欲毀滅所多瑪城 ê 時求上帝回心轉意。大衛對上帝處死伊 ê 人心真不平。仝款 ê 代誌佇以賽亞、耶利米、以西結、哈巴谷、約拿佮約伯 ê 身上,chiah-ê 人面對上帝 ê 話 ê 時,第一個反應就是反抗。上帝叫亞當(亞當 ê 意思就是人)種作,該隱照上帝 ê 吩咐去園做田,但是上帝竟然愛彼個 m̄ 聽話 ê 亞伯。約伯受真濟苦難,最後猶佮上帝辯論,叫上帝離開伊,放伊一人孤單活落去就好。(參閱約伯記 42 章 5、6 節原文)

雅各佮上帝 ê 使者 sio-ián(相偃),竟然互上帝謳咾講:「對今以後你無叫做雅各,你著叫做『以色列』,因為你有法度佮上帝相偃,閣偃贏。」(參閱創世記 32 章 28 節)上帝 ê 愛佮對人 ê 憐憫就是佇遮顯明。

我佇協和神學院讀冊 ê 時,著時常去隔壁 ê 猶太神學院選修學分,互我印象上深 ê 一句學校 ê 銘言(Proverb)就是:「咱佮人佮上帝相偃,攏欲贏!」這可能這就是猶太神學 ê 精神特點。

前現代 ê 思想佮神學,包括希伯來佮希臘哲學最大 ê 特點,就是在佇 in ê 思想基礎是建立佇人做中心,不斷追求人本身 ê 問題,不斷勇敢產生疑問,不斷勇敢欲尋求答案。中國人 ê 傳統思想雖然有這種人本傾向,但是無親像希伯來思想 ê 明顯佮強調。

有記者問蔡英文總統,伊回答講:「以前國民黨時代咱豈毋是攏選擇服從!?」伊 ê 意思是講「服從」是一種常態,「反抗」是一種「反態」。這豈毋是世間所有執政 ê 人一貫對人民 ê 期待佮苛求呢?咱現代有理性有良心 ê 台灣人是 m̄ 是著繼續培養這款有權者 ê 苛求呢?

我有話要說