(請安裝Taigi Unicode字形，配合Firefox瀏覽器可閱讀)
李南衡
2020 年 4 月 24 ，中國、菲律賓兩國 ê 歌星 kah 外交人員，歡歡喜喜做伙錄製一首歌，中文名〈海的那邊〉（海 ê hit pêng）、菲律賓名“One Sea”(一个海)，網路頂面囥三工，按「讚」ê 有一萬人，按「倒讚」罵 ê 人超過 17 萬。發生啥物代誌？原來歌詞內底有一句：「我 kah 你佇仝一个海，守望 tio̍h 愛 ê 伴。」叼一个海？菲律賓人一向所講 ê「西菲律賓海」，tang-sî-á 已經 hō͘ 中國號作「南中國海」，簡稱「南海」。「我 kah 你佇仝一个海」，是啥人 ê 海？你 tio̍h 講清楚！
福伯講：「對菲律賓人來講，中國明明是『侵門踏戶』（chhin-mn̂g ta̍h-hō͘）ê 行為！莫怪人受氣。」阿孫問講：「按怎講是侵門踏戶，菲律賓人那會受氣？」福伯解說講：「侵門就是無人 ê 允准侵入人 ê 門，門是所有權 ê 一个界限，門外是公 ê 所在，門內底是私人 ê 領域，侵門 tio̍h 是無尊重人 ê 權限。」阿孫問講：「踏戶是啥物意思？」福伯解說講：「早前咱台灣 ê 瓦厝建築，beh 入門進前有一个『戶橂』，算是內外 ê 隔界，beh 入去人 ê 厝，一定 tio̍h hāⁿ 過戶橂，絕對 bē 使踏 tio̍h 人 ê 戶橂，表示對 hit 家人 ê 尊重。踏人 ê 戶橂 tio̍h 是向 hit 家人挑戰，足無禮貌。」
中國對菲律賓侵門踏戶，chit 遍 是頭一遍。前兩工，菲律賓外交部長駱辛（Locsin）才佇 Twitter寫文章講，中國有收 tio̍h 伊兩遍 ê 外交抗議，今年 2 月佇西菲律賓海巡邏 ê 一台菲律賓軍艦，kah 中國軍艦相拄 tio̍h，中國軍艦用「射控雷達」（radar gun）瞄準 in，而且中國講菲律賓軍艦所行 ê 海域是中國 ê 南海。菲律賓講中國是「違反國際法 koh 侵犯菲律賓主權。」
講 tio̍h 海域，koh khah hō͘ 菲律賓人感受 tio̍h hō͘ 中國侵門踏戶 ê 屈辱感，明明佇菲律賓門口、佇 200 海里專屬經濟海域範圍內、離菲律賓 ê 蘇比克港約 100 海里 ê『斯卡伯勒（Scarborough）淺灘』，中國叫作『黃岩島』，離中國海南島 500 海里。中國講是 in ê，佇 hia 築工事派兵駐守，不准菲律賓漁民佇附近掠魚。Che 攏是因為中國褪褲圍海，講自古早畫 ê「九段線」範圍內攏是中國 ê。菲律賓當然不服，告到國際法庭，2016 年 7 月 12 海牙常設仲裁法院宣判：「中國家己講伊有南海主權 ê 歷史證據 kah 所畫訂 ê『九段線』地圖無法律依據」，而且認定中國佇 chit-ê 資源豐富而且政治、經濟、戰略意義重大 ê 海域所進行 ê 人工島工程、石油開採 kah 對漁民活動 ê 干擾攏是侵犯 tio̍h 菲律賓 ê 主權。但是中國講 in 無承認、無接受 chit 種裁決。
台灣西式建築愈起愈濟，攏無戶橂，將來若有人講「侵門踏戶」，少年人一定會問講踏戶是踏啥物，以後 tio̍h 無人會曉講 chit 句俗語話。
