(請安裝Taigi Unicode字形，配合Firefox瀏覽器可閱讀)
作者：歹銅舊錫
半暝，生日 tú 過三點鐘半，你 koh tī leh
誰 kā 你查封 tī 無情 ê lāi-lî-á
問你 ê 名 kan-taⁿ 淺淺 bô-ta-ôa ê 笑容
Chhùi 開開微微 á 動是 leh 講 siáⁿ
Kiám-chhái 聲音 mā hông 鎖牢
Án-ne，kám 會聽見我 ê 聲？
左派右派隔界你我無才調 hāⁿ 過
我 是來 kā 你解救，是面會
怪我無了解你心情
目神相 tú soah thàng 袂過心肝
明明 lán 是雙生 á soah 無心靈交結
伸 kha pih 手性地 bái 欲 kā 我 phah
Chhùi 形袂輸是 leh chhoh-kàn-la̍k-kiāu 大細聲
我知 he 是 chng-thāⁿ 過 ê siáu 鬼 á 殼
我在你激 chhoah 流 ê 情緒
沖入我目空接續我燒 lō ê 目屎
M̄ -káⁿ 看你消瘦 ê 面模
薄板枝骨漸漸 ta-lian
來，用燒酒沃
1 chhùi 接 1 chhùi 合力 kā 孤獨夜魔 phah 落地獄
Sa-bui-sa-bui ê 目 chiu 硬 keng
見證年歲 ê 皺痕生 thòaⁿ
我看你，你看我，siáng 是 siáng？
來，點 1 支薰
用尼古丁薰頭殼內 ê 不安驚惶
冰霜 ê 胸 khám kám 有感受 tio̍h 伊 ê 溫柔？
茫茫 ê 煙海看無未來 poa̍h 落烏暗深沉
我看無你，你看無我，chia 是 tī tah？
Phah-bū-á-光，âm-po͘-chê thǹg 殼
聲 put-chí-á 大聲 koh 響
趕走滿腹心悶 lóe-chì
你 gia̍h 1 支 chhùi 鬚 khau-á kā chhiah-ia̍h kap lap-sap lóng 總 khau 落來
Ka 刀 chián 斷過去 pe̍h-sih-sat ê 掛礙
過去無知落塗摔摔死
猛醒 ê kha 手欲雕 siáⁿ-mi̍h 款 ê 向望
束縛 tī lāi-lî-á ê 你比我 khah 堅強
偷偷 á chhōe 你我 ê 精差
雙人孤單搬獨跤戲
我問你，你 iû-goân tiām-tiām
Tī 東南西北錯亂 ê 雙叉路口
過謙苦勸行無 sio-siāng ê 方向
Soah 有仝款 ê 目標
闊 bóng-bóng ê 玻璃世界 chhiau-chhōe
Chhan 像 1 杯白 chiáⁿ 無味 ê 烏咖啡
總是，感 tio̍h 你心跳 ê 聲韻
phoh-phoh-phoh
耳甕 á 激情相伴演奏
血筋內透濫熱情 ê 紅
Teh 寫 1 本號做「chhōe ka-tī」ê 旅行冊
你我 kàu chia cha̍h-chí，再會！
Tiû-tû m̄-káⁿ 叫出你 ê 名
Tī lāi-lî-á kám 有日頭天光？
記持 ê pit-hûn kám 有法度補 thīⁿ？
你我心肝頭知知免拆破
時間 iû-goân 轉 se̍h
比以早緊欲百萬分之二點六八秒
結束面會行出門外接受日頭洗盪
雄雄了解，原來纏 tòe ê 影是你
無聲無句心 lia̍h 定
免 koh 問
因為你 chiū 是我，我 tō 是你
