答案 Tap-àn

Image by 愚木混株 Cdd20 from Pixabay

(請安裝Taigi Unicode字形,配合Firefox瀏覽器來讀)

作者:陳俐文

Bô lâng kiáu-chhá ê mê
Pi-siong kám-ē bih-khí–lâi?
Í-keng thêng-pit ê kò͘-sū
Kiat-kio̍k kám-ē tt-tt hēng-hok?
無人攪吵 ê 暝
悲傷敢會覕起來?
已經停筆 ê 故事
結局敢會直直幸福?

Tap-àn tàu-té tī chin-siòng ê tó-ūi?
Kám ē tī hong–nih teh thiàu-bú?
Ah-sī tī hái–nih chhàng-chúi-bī?
答案到底佇真相 ê 佗位?
敢會佇風–裡咧跳舞?
抑是佇海–裡藏水沬?

Che jîn-seng oh-kái ê bê
Liân jiâu-phé-phé ê chhiú-hûn
Mā chhōe bô pòaⁿ-si ê thâu-cháng
Hō͘ gōng-lâng bâng-bâng sa-bô-cháng
Kan-na ē-tàng iōng hi-hi ê kháu-hō
Khí-chō tēng-tauh ê bí-bāng
Tī chiù-khang ê chheng-chhun
Chhiau-chhōe hau-siâu ê sū-st
這人生僫解 ê 謎
連皺襞襞 ê 手痕
嘛揣無半絲 ê 頭摠
予戇人茫茫捎無摠
干單會當用虛虛 ê 口號
起造碇篤 ê 美夢
佇蛀空 ê 青春
搜揣嘐潲 ê 事實

Tàu-té ài khai gōa-kú ê sî-kan
Chiah thang kiâⁿ ē chhut tà-bông ê hoàn-kéng?
到底愛開偌久 ê 時間
才通行會出罩雺 ê 幻境?

Thiⁿ-téng ê jt-thâu–ah!
Chhiáⁿ iōng kng-iāⁿ ê la̍t sio-lō ǹg-bāng ê sit
Tòa-niá liû-lōng ê sim poe kòe giâu-gî ê kéng
Ín-chhōa bê-he̍k ê hûn chhiong chhut o͘-àm ê éng
天頂 ê 日頭啊!
請用光焱 ê 力燒烙向望 ê 翼
帶領流浪 ê 心飛過憢疑 ê 境
引𤆬迷惑 ê 魂衝出烏暗 ê 湧

我有話要說