狗蟻協力扛 Káu-hiā Hia̍p-le̍k Kng

(請安裝Taigi Unicode字形，配合Firefox瀏覽器來讀)

作者：李佳柔

酸佮臭　臭佮酸
昨昏　的白飯
食賰　的炒卵
按算　煮飯湯
配海產　做暗頓
物件　桌頂囥
煞　囥甲臭閣酸
臭酸矣　臭酸
成做潘矣　成做賁

酸酸，酸酸酸
酸甲　縮縮酸（註1）
臭酸味　唌狗蟻
狗蟻　走來扛
協力　袂窮分
做伙扛矣　做伙扛
搬甲飯碗　光光光

Sng kap chhàu chhàu kap sng
Cha-hng ê pe̍h-pn̄g
Chia̍h chhun ê chhá-nn̄g
Àn-sǹg chú pn̄g-thng
Phòe hái-sán chò àm-tǹg
Mh-kiāⁿ toh-téng khǹg
Soah khǹg kah chhàu koh sng
Chhàu-sng–ah chhàu-sng
Chiâⁿ-chò phun–ah chiâⁿ-chò phun

Sng-sng sng-sng-sng
Sng kah giuh-giuh-sng
Chhàu-sng bī siâⁿ káu-hiā
Káu-hiā cháu lâi kng
Hia̍p-le̍k bē khn̂g-hun
Chò-hóe kng–ah chò-hóe kng
Poaⁿ kah pn̄g-óaⁿ kng-kng-kng

酸酸　臭酸飯
臭臭　酸臭卵
扛甲　攏無賰
飯卵　粒粒分
食甲　攏無賰

臭矣臭　臭臭臭
酸矣酸　酸酸酸
狗蟻愛食　臭酸飯
狗蟻愛食　酸臭卵
偷抾潘矣　偷抾潘（註2）
協力扛矣　協力扛
食有賰矣　食有賰

Sng-sng chhàu-sng-png
Chhàu-chhàu sng-chhàu nn̄g
Kng kah lóng bô chhun
Pn̄g nn̄g lia̍p-lia̍p pun
Chia̍h kah lóng bô chhun

Chhàu–ah-chhàu chhàu-chhàu-chhàu
Sng–ah-sng sng-sng-sng
Káu-hiā ài chia̍h chhàu-sng pn̄g
Káu-hiā ài chia̍h sng-chhàu nn̄g
Thau khioh phun–ah thau khioh phun
Hia̍p-le̍k kng–ah hia̍p-le̍k kng
Chia̍h ū chhun–ah chia̍h ū chhun

註：1. 縮縮酸：giuh-giuh-sng，酸縮縮台日大辭典收。2. 偷抾「潘」：偷人 ê phun，「潘」是廚餘。