(請安裝Taigi Unicode字形，配合Firefox瀏覽器來讀)
作者：澎錦
頭一款
想起較早細漢，阿母煮飯、我 hiâⁿ 火，伊攏會無張無持哼出歌，洗衫 ê 時嘛是那洗那哼，上會記得著是彼首〈河邊春夢〉。
阿母咧唱歌 ê 時，阿爸嘛會綴咧唱，這个時陣阿母會滾耍笑講：「狗聲乞食喉，閣咧吹狗螺啊！」
有當時阿爸買愛國獎券，阿母笑笑 kā 鄙相：「猴頭鳥鼠耳，亦想欲著獎。」阿爸著講：「有著愛錢；無著愛國。」
等阮大漢時才知影，原來彼種 ê 答喙鼓叫做幸福。
第二款
阿爸袂曉 Do Le Mi，卻真愛唱歌，無懸無低無節奏，歌詞看有，to̍h 講伊會曉唱。
有一擺規家伙仔去 KTV，音樂一出來，阿爸 maiku 攑咧著唱，阮發覺伊走音嚴重，想欲 kā 救，顛倒予伊搝去。一首歌唱煞，所有 ê 人攏笑佮攬腹肚，目屎流目屎滴。第二首閣紲落去，腸仔腸肚起童（tâng），規陣人笑 kah 東倒西歪。因為眾人 ê 笑聲，阿爸愈愛唱，阮逐家嘛聽 kah 慣勢矣，確實有娛樂 ê 效果！
原來幸福是佇阿爸離離落落走音 ê 歌聲中！
第三款
隨著序細一个一个成家立業，攏出外去。阿母嘛離世16年矣，這馬賰阿爸一个人家己蹛佇庄跤，阮一禮拜攏會轉去一擺陪伊。
阿爸看著阮轉來，著緊 kā 點歌簿仔搬出來，開伴唱機，叫我唱歌。阮一首閣一首，有當時伊嘛會點予我唱。佇阮唱歌 ê 時，阿爸泡茶，伊皺皺攏是老人斑 ê 雙手泡出來 ê 茶是遐爾仔芳，遐爾仔甘。
人生進入第二甲子，閣有幸啉著阿爸親手泡 ê 茶，心內感動，更加感恩，這嘛是幸福！
＊ ＊ ＊
每一个人對幸福 ê 定義攏無仝，毋管是物質上抑是精神上 ê，無一个標準講啥物是幸福。我認為生活中只要心平氣和 ê 時，斟酌去看大細項代誌，就會發現原來「幸福佇遮」。
