捎無寮仔門 Sa bô liau-á mn̂g

牛車主人蔡國賓先生解說探更寮歷史。(攝影/陳逸凡)

(請安裝Taigi Unicode字形,配合Firefox瀏覽器來讀)

作者:李南衡

阿輝講 beh 去拜訪林老師,阿文教伊坐捷運到啥物站,改坐公車到啥物站落車向東行百五公尺斡正旁,行兩百公尺才 koh 斡左旁……講猶未完,阿福伯講,你 chit 種報路 ê 方式,保證阿輝「捎無寮仔門(sa bô liau-á mn̂g)」。隔壁 ê 阿發問講:「捎猫仔毛(sa niau-á mn̂g)beh 創啥?」阿福伯講:「啥人 teh 講猫仔毛?我是講寮仔門。」阿發問講:「寮仔門是啥?」阿福伯講:「寮仔是早前咱先民簡單搭 ê 細間厝仔,致使暗時定定會 chhōe 無、摸無寮仔門。」

咱上捷聽 tio̍h ê 一句台灣歇後語是:「火燒罟寮──無網 ah!」罟寮是囥罟網(夯魚 ê 地曳網)ê 細間寮仔,火燒罟寮魚網燒了了,借 hit-ê 音講是「希望無了了」。咱無注意 tio̍h,其實「啥物寮」ê 地名全台灣有兩百八十外個,早前咱 ê 先民為 tio̍h 工作上 ê 方便,簡單搭一間細間厝來作工課、作暫時歇睏、囥工作器具 ê 所在。Kah 漁業有關 ê 寮,有烏魚寮(彰化縣鹿港),蚵寮(新竹市香山、彰化縣伸港、雲林縣口湖、台南市北門),成子寮、蚶子寮、塭寮。Kah 農業有關 ê 寮,hō͘ 栽種 kah 採收農作物使用 ê 細間厝,像芋(子)寮(嘉義縣義竹、雲林縣古坑、彰化縣社頭、高雄市橋頭)、蕃薯寮(高雄市旗山舊名、新北市新店、宜蘭縣頭城),猶有茶寮、柿子寮、苦瓜寮、菜瓜寮、菜寮、麥寮、麻油子寮、薑(母)寮。Kah 條柴(liâu-chhâ)有關 ê 有枋寮(屏東縣 ê 一個鄉名、新北市中和、新竹縣新埔、台中市后里、高雄市杉林)。

Khah hō͘ 我感覺意外 ê 是當年台灣有 hiah 濟剉樟腦、生產樟腦 ê 所在,日治初期 ê 專賣局包括專賣鴉片 kah 樟腦,因為激腦 ê 所在傷過濟,用號碼來號第幾間 ê 腦寮,五寮(新北市三峽、苗栗縣大湖),三寮、六寮、九寮(苗栗縣大湖),七寮、八寮、十寮(新竹縣關西),十分寮、十四寮、十五寮(新竹縣峨嵋),趣味 ê 是大部分攏佇客人庄。早前台灣鹿真濟,大量鹿皮 ùi 鹿港外銷,台灣四界有鹿寮(基隆市七堵、台中市沙鹿、彰化縣竹塘、南投縣竹山、嘉義縣布袋、屏東縣萬巒、台東縣鹿野)。

「寮」ê 另外一種意思,是一群仝性質 ê 人 tòa 做伙 ê 所在。台灣先民一群仝所在移民來 ê 人聚集做伙,形成一個小社區,用 in 唐山地名號作寮名 kah 在地人作區別,像海豐寮(彰化縣二水),泉州寮(新北市淡水、桃園市觀音、新竹縣竹北、台中市大安、后里、清水,彰化縣伸港、員林,南投縣竹山),猶有南靖寮、安溪寮、同安寮、永春寮、溫州寮、詔(照)安寮。

台灣 hiah 濟地名有一字「寮」字,卻真少人知影「捎無寮仔門」chit 句台灣俗語話啥意思。M̄ 免偌久,相信 chit 句台灣俗語話會漸漸失傳去。

李南衡《那teh褪色的台灣俗語話》(1-2冊 )已經出版,歡迎來交關,做伙進步

我有話要說