(請安裝Taigi Unicode字形，配合Firefox瀏覽器來讀)
作者：李秀鑾
真愛鼻台灣這蕊花
看伊 bî-bî-á 笑
看伊甜蜜結果實
致蔭落土 ê 新枝
一叢牽一叢互相欣賞
互相扶持
用智慧補足生活欠缺 ê
稀微
上帝 ê 福氣湠芳味
真愛台灣有活氣
風吹 海會笑
雨落 山會洗身軀
樹葉仔跳舞
溪水 寫出清爽 ê 旋律
魚仔、蝦仔 是輕輕 ê 交響曲
阮愛佇涼爽 ê 下埔時
相思
田野、都市攏知影
纍積財富
自由這葩火毋通 hoa 去
人旺袂 iau 死
五塊餅兩尾魚五千人吃有偆
囡仔將天國顯明
起床看著阿爸、阿母就真滿意
感情毋通拆開去
恁是天 kap 地
真愛台灣這塊土地
親像
上帝 ê 目睭
咱佇內面徛起
留下心思 ê 腳印
開花結實
生湠百百年
如今，只偆
心肝 iau 餓 ê 記持
kap 空虛勾勾纏
阮愛台灣
靜靜看伊 ê 傷痕
看伊爭無停 ê 兒女
肩胛懸抵天
向望有一日 in ê 目睭會當
歇佇聖經裡
尊重家庭婚姻 讀大自然 ê 真理
意念沒超越
上帝
聖殿清氣
土地無 suh 囡仔 ê 血
佇上帝 ê 目睭裡
福爾摩沙永遠茂盛永遠青翠
美麗島毋捌欠缺啥貨
