(請安裝Taigi Unicode字形，配合Firefox瀏覽器來讀)
作者：吳春滿
台灣風景真美麗，四季如春親像畫，春風微微吹，上適合一家大細春遊賞花。春天的花，媠媠仔開，花芳滿四界，鼻–著花香，心情嘛規个清爽起來。夏天的風，涼涼仔吹，佇熱–人的時陣，相招來去山頂𨑨迌，吹涼風賞山景，聽著鳥隻咧唱歌，真正是上大的享受。秋天的雲，沓沓仔飛，天頂白雲變化萬千，若是會當看著雲海閣較是好運。冬天的雪，惦惦仔落，一遍白茫茫的雪，予人完全無仝款的景緻。佇臺灣，每一季攏真有特色。
Tâi-oân hong-kéng chin bí-lē, sù-kuì jû chhun chhin-chhiūⁿ ōe, chhun-hong bî-bî chhoe, siōng sek-ha̍p chi̍t ke tōa-sè chhun iû siúⁿ-hoe. Chhun-thiⁿ ê hoe, súi-súi-á khui, hoe-phang móa-sì-kè, phīⁿ–tio̍h hoe-phang, sim-chêng mā kui-ê chheng-sóng–khí-lâi. Hā-thiⁿ ê hong, liâng-liâng-á chhoe, tī joa̍h–lâng ê sî-chūn, sio-chio lâi-khì soaⁿ-téng chhit-thô, chhoe liâng-hong siúⁿ soaⁿ-kéng, thiaⁿ–tio̍h chiáu-chiah leh chhiùⁿ-koa, chin-chiàⁿ sī siōng-tōa ê hiáng-siū. Chhiu-thiⁿ ê hûn, ta̍uh-ta̍uh-á poe, thiⁿ-téng pe̍h-hûn piàn-hòa bān-chhian, nā-sī ē-tàng khòaⁿ-tio̍h hûn-hái koh khah sī hó-ūn. Tang-thiⁿ ê seh, tiām-tiām-á lo̍h, chi̍t phiàn pe̍h-bông-bông ê seh, hō͘-lâng oân-choân bô-kâng-khoán ê kéng-tì. Tī tâi-oân múi chi̍t kùi lóng chin ū te̍k-sek.
台灣民俗文化通人知，規年迵天攏精采。上元燈會臆謎猜，捾鼓仔燈探世界，元宵好吃一喙一喙來。舊曆三月痟媽祖，信徒全程跟隨毋驚艱苦，繞境祈福平安多，軁入轎跤望照顧。紲落內門創意宋江來比賽，閣有厲害的總鋪師，輕鬆辦出規桌的功夫菜，予人食甲笑咍咍。中元普渡好兄弟，腥臊祭品規桌邊，搶孤活動好運添，向望未來出頭天。十月左營萬年迓火獅，火獅出巡望和諧，心中願望講予知，保庇囝孫仔攏將才。佇台灣，逐個月攏有鬧熱的活動等你來。
Tâi-oân bîn-sio̍k bûn-hòa thong-lâng-chai, kui-nî thàng-thiⁿ lóng cheng-chhái. Siōng-goân teng-hōe ioh bī-chhai, kōaⁿ kó͘-á-teng thàm sè-kài, goân-siau hó-chia̍h chi̍t-chhùi chi̍t-chhùi lâi. Kū-le̍k saⁿ-goe̍h siáu Má-chó͘, sìn-tô͘ choân-thêng kin-sûi m̄-kiaⁿ kan-khó͘, jiâu-kéng kî-hok pêng-an to, nǹg li̍p kiō-kha bāng chiàu-kò͘. Sòa–loh Lāi-mn̂g chhòng-ì sòng-kang lâi pí-sài, koh ū lī-hāi ê chóng-phò͘-sai, khin-sang pān chhut kui-toh ê kang-hu-chhài, hō͘-lâng chia̍h kah chhiò-hai-hai. Tiong-goân phó͘-tō͘ hó-hiaⁿ-tī, chheⁿ-chhau chè-phín kui toh piⁿ, chhiúⁿ-ko͘ oa̍h-tāng hó-ūn thiⁿ, ǹg-bāng bī-lâi chhut-thâu-thiⁿ. Cha̍p-goe̍h Chó-iâⁿ bān-nî ngiâ hóe-sai, hóe-sai chhut-sûn bāng hô-hâi, sim-tiong goān-bōng kóng hō͘ chai, pó-pì kiáⁿ-sun-á lóng chiòng-châi. Tī Tâi-oân, ta̍k-kò-goe̍h lóng ū nāu-jia̍t ê oa̍h-tāng tán lí lâi.
台灣好食物真正濟，物產豐富在你揣，山頂山產食田螺，海味上愛是龍蝦，閣有比賽冠軍「凍頂烏龍茶」。欲止喙焦食西瓜，欲食粗飽有飯羹，欲食奇巧夜市仔內嘛有真濟，食過數念閣來揣，踅街兼看貨，趣味的活動窒倒街，鬧熱滾滾予你來過袂後悔。佇台灣，山珍海味予人食甲體重加一倍。我愛台灣的好山水，閣有深深的人情味，毋管發生啥物款的大代誌，大家互相扶持袂放棄，共同創造未來的好時機。
Tâi-oân hó-chia̍h-mih chin-chiàⁿ chē, bu̍t-sán hong-hù chāi lí chhōe, soaⁿ-téng soaⁿ-sán chia̍h chhân-lê, hái-bī siōng ài sī liông-hê, koh ū pí-sài koan-kun Tàng-téng o͘-liông-tê. Beh chí chhùi-ta chia̍h si-koe, beh chia̍h chho͘-pá ū pn̄g-keⁿ, beh chia̍h kî-khá iā-chhī-á lāi mā ū chin-chē, chia̍h kòe siàu-liām koh-lâi chhōe, se̍h-ke kiam khòaⁿ-hòe, chhù-bī ê oa̍h-tāng that-tó-ke, nāu-jia̍t kún-kún hō͘ lí lâi kòe bōe hō͘-hóe. Tī Tâi-oân, san-tin hái-bī hō͘-lâng chia̍h kah thé-tāng ke chi̍t-pōe. Góa ài Tâi-oân ê hó san-súi, koh ū chhim-chhim ê jîn-chêng-bī, m̄-koán hoat-seng siáⁿ-mi̍h-khoán ê tōa tāi-chì, tāi-ke hō͘-siōng hû-chhî bōe hòng-khì, kiōng-tông chhòng-chō bī-lâi hó sî-ki.
台灣四季好𨑨迌
Tâi-oân sù-kuì hó chhit-thô
春夏秋冬景緻好
Chhun-hā chhiu-tang kéng-tì hó
賞花看雪挽仙桃
Siúⁿ-hoe khòaⁿ-seh bán sian-thô
Peh山泅水遊愛河
Peh-soaⁿ siû-chúi iû ài-hô
夜市小食佮水果
Iā-chhī sió-chia̍h kap chúi-kó
食過逐个攏呵咾
Chia̍h kòe ta̍k-ê lóng o-ló
誠心邀請來寶島
Sîng-sim iau-chhiáⁿ lâi pó-tó
做伙體會無價寶
Chò-hóe thé-hōe bô kè pó
