感謝阿母

(請安裝Taigi Unicode字形,配合Firefox瀏覽器來讀)

作者:蘇晏德

五月感恩母親節 Gō͘-goe̍h kám-un Bó-chhin-chiat
第二禮拜上特別 Tē-jī lé-pài siōng te̍k-pia̍t
全家聚集真鬧熱 Choân-ke chū-chi̍p chin nāu-jia̍t
感謝阿母的心血 Kám-siā a-bó ê sim-hiat

阿母親像一支傘 A-bó chhin-chhiūⁿ chi̍t-ki sòaⁿ
閘咱熱天袂流汗 Cha̍h lán joa̍h-thiⁿ bē lâu-kōaⁿ
阿母親像一座山 A-bó chhin-chhiūⁿ chi̍t-chō soaⁿ
擋咱寒天袂畏寒 Tòng lán kôaⁿ-thiⁿ bē ùi-kôaⁿ

阿母恩情無地比 A-bó un-chêng bô-tè-pí
時刻辛苦為囝兒 Sî-khek sin-khó͘ ūi kiáⁿ-jî
歷盡風霜阮永記 Le̍k-chīn hong-song goán éng-kì
妳的恩惠較大天 Lí ê un-hūi khah tōa thiⁿ

母親佳節愛感恩 Bó-chhin ka-chiat ài kám-un
囝兒序細著孝順 Kiáⁿ-jî sī-sè tio̍h hàu-sūn
阿母是咱的後盾 A-bó sī lán ê āu-tún
犧牲奉獻為囝孫 Hi-seng hōng-hiàn ūi kiáⁿ-sun

阿母恬恬無出聲 A-bó tiām-tiām bô chhut-siaⁿ
拄著風雨攏毋驚 Tú-tio̍h hong-hō͘ lóng -kiaⁿ
為囝將來一直拚 Ūi kiáⁿ chiong-lâi it-tt piàⁿ
逐工辛苦為細囝 Ta̍k-kang sin-khó͘ ūi sè-kiáⁿ

阿母按家真無閒 A-bó hōaⁿ-ke chin bô-êng
逐日做工無時停 Ta̍k-ji̍t chò-kang bô-sî-thêng
顧家顧囝顧家庭 Kò͘-ke kò͘-kiáⁿ kò͘ ka-têng
感謝阿母大恩情 Kám-siā a-bó tōa un-chêng

我有話要說