(請安裝Taigi Unicode字形，配合Firefox瀏覽器來讀)
作者：郭亮祈（苗栗縣苑裡鎮山腳國小四年甲班），指導老師：郭燕霖
佇古早兔仔佮龜走相逐，兔仔因為中途睏去煞比輸，予人恥笑。為著欲挽回面子，兔仔宣布向龜挑戰，koh 比一遍。龜答應 ah，這擺兔仔集中精神無睏去，毋過猶是比輸，問題出佇佗？
頭一遍龜佮兔仔走相逐，兔仔輸輸去 ah，兔仔 ê 心內毋是滋味，所以兔仔 kā 龜講：「咱 koh 比一遍，輸 ê 人就愛 chhōa 贏 ê 人去輸 ê 人上意愛 ê 所在耍，好毋好？」「好啊！」所以龜佮兔仔 chhē 上公平 ê 動物──牛，做裁判。
「Beh 用啥物物件代表比賽開始？」牛按呢問。兔仔應講：「用 pi 仔。」
「Pi！」比賽開始，兔仔先掠車，龜因為跤小可麻去，所以慢慢仔行。兔仔走 5 公里後 chhùi-ta，去苑裡買茶來 lim；龜走一點鐘後，mā 走 5 公里 ah，伊腹肚 iau，去買池上飯包食；牛因為想講苑裡 ê 蓆草足好食，所以牛請羊支援做裁判。牛食草了後，感覺真好食，所以伊繼續食。
比賽比 10 公里，兔仔代先到位，龜慢伊一點鐘後到位，龜輸去。所以龜 chhōa 兔仔去山腳國小𨑨迌，龜先 chhōa 兔仔去參觀日本厝、水池仔，尾手去愛情果園看彩繪稻仔田。
比賽 soah，牛 koh 想欲看比賽 ê 過程，所以伊看監視器，結果發現兔仔無照原路比賽，伊走別條路，所以比賽其實是兔仔輸輸去。
龜知影比賽結果後，kā 兔仔講：「你免 chhōa 我去你上意愛 ê 所在耍，你感覺你贏 tō 你贏。對我來講，輸贏無重要。」
