(請安裝Taigi Unicode字形，配合Firefox瀏覽器來讀)
作者：林益彰
「 一邊流著清氣氣 ê 目屎
一邊流著烏汁汁 ê 血
一面想起妳時空倒流 ê 命運
一面想起妳予人欺負 ê 身世
阮活佇妳烏白分明 ê 心內 」
──〈濁水溪〉，林宗源
1.馬公 ê 光尾
阮咧等待暗暝 ê 跤步
觀音亭牽起金榕樹，做伙
聽候虹橋煙火，五彩 ê 心跳聲，
光尾 ê 眼神來矣無講話
寬寬仔倚近，坦倒佇四眼井 ê 胸坎頂
中央老街比山懸比海深 ê 肩胛
彼敢若有石滬 ê 燒烙，袂輸火山石 ê 向望
所以西瀛矣菊島澎湖矣
這條雜雜念綿爛綿爛 ê 菜瓜
連鞭唱著褒歌連鞭咧唸歌詩，可比
溫柔 ê 心肝，馬公聖母 ê 慈悲；雄雄
海鳥仔飛過去，暗暝 ê 海島你有聽著看著無
阮是你 ê 囡仔矣，風帆 ê 囡仔，雲尪色
2.望安 ê 心跳
望安你會孤單無
海沙埔咧數念大水大湧
大水大湧煞咧數想
眠夢當中，彼一蕊
只會踮在深深海湧當中 ê，金珊瑚
望安你會孤單無
天台山 ê 喙舌，恬恬靜靜，聽候
船帆做梢聲 ê 批信
文石 ê 紋路咻喝著風飛沙
尾後煞攏是罩雺罩雺 ê 詩句爾爾
毋過孤單 ê 望安，猶原，這世人
猶原徛在火山石內底
無怨無慼 ê 顧牢牢
火莧刺 ê 心跳佮忠心菊 ê 信仰
3.白沙 ê 目睭
檢采有生生世世
目斗嶼 ê 燈火，永遠
會踮在上迷失 ê 所在上亂迷 ê 時陣
袂輸半天鳥 ê 靈性
咻喝莫畏寒莫驚惶，浪花柔韌 ê 言語
就徛佇風風雨雨內底，永遠，
若跨海橋 ê 肩胛
靜靜恬恬，chhōa 起這座島嶼，風島
影向遠方 ê 虹橋煙火。暗暝來矣
愈來愈暗愈來愈暗 ê 時陣
燈火 ê 翼股就會飛出來，敢若講著
透明 ê 大水大風大湧，永遠，蹛佇這座
西瀛澎湖菊島，風島內 ê 山佮海
