永遠ê敵人亞瑪力人

(請安裝Taigi Unicode字形,配合Firefox瀏覽器來讀)

作者:陳柏壽

編按:本文引用經文為作者自譯。

猶太人久長 ê 歷史中間,in 世世代代交代子孫 ê 一點,就是:「亞瑪力人是咱永遠 ê 敵人」,「今恁著去攻打亞瑪力人,滅盡 in 所有 ê,毋通憐惜 in,著將 in ê 男女、兒童、食奶 ê 紅嬰仔、及 in ê 牛羊駱駝及驢仔,一盡剿滅。」(撒母耳記上 15 章 3 節)上帝雖然命令著「一盡剿滅」,但是掃羅留一寡牛羊私用,嘛是互先知裁判伊犯大罪。摩西佇利非訂及亞瑪力人相戰,亞倫及戶珥扶摩西兩支手,兩支手扶高 ê 時,以色列人就贏,一直到日頭落山,約書亞用刀刣死亞瑪力王,耶和華給摩西講,伊欲將亞瑪力人 ê 名號對天下全然擦消,耶和華咒誓講伊欲世世代代及亞瑪力人爭戰(出埃及記 17 章 8~16 節)。「佇耶和華你 ê 上帝賜你為業 ê 土地,你著將亞瑪力人 ê 名號,對天下抹消。不可袂記這項代誌。」(申命記 25 章 19 節)亞瑪力人及以色列人不共戴天,因認定亞瑪力人是永遠 ê「惡」。

二個兄弟互相車拚

欲講亞瑪力人 ê 故事著對頭開始講。亞伯拉罕 ê 囝以撒娶利百加做某,利百加生二個囝,一個叫以掃,另外一個叫雅各。亞瑪力就是以掃生 ê 第 13 囝。以掃及雅各佇母胎內面猶袂出世就冤家:以掃先出母胎,雅各毋甘願,手 giú 著阿兄 ê 腳 tòe 出來。對遐開始,雅各一世人就是 giú 著 in 阿兄 ê 腳,毋放伊煞。「二族欲對你同一個胎出,但是二族分裂 ê。」(創世記 25 章 23 節)二個兄弟互相車拚,但是閣分袂開。

以掃生做強壯,紅頭毛,愛拍獵,得著老爸 ê 疼;但是雅各這個 giú 後腳 ê 小弟,真 gâu 怨妒,時常 bh 佇厝內,較得老母 ê 疼。

有一日以掃拍獵轉來,肚腹真枵,雅各就利用這個機會講,伊有煮一鼎紅豆仔湯。「以掃你若將大囝 ê 名分賣互我,我這鼎紅豆仔湯就互你飲。」這個短氣衝動 ê 以掃,中著這個計。結果老爸 ê 財產 2/3 就歸雅各,真正 ê 大囝以掃只分 1/3。

雅各一世人真 gâu 計算,計算遺產、名分、權力、名聲。到今仔日伊 ê 後代,嘛是仝款,佇世界政治舞台上,為著遮 ê 目標綿爛跋反,永無放棄。另外彼個以掃 ê 後代,到佇今仔日猶繼續生活佇袂曉計算將來 ê 樂天。

決定性 ê 所在,就是老爸以撒破病 tih-beh 過身 ê 時,叫二個囝來欲給 in 祝福:雅各搶頭去老爸遐,假影講伊就是大囝以掃,老母利百加配合演戲,去刣一隻羊羔,煮好,叫雅各捧去老爸以撒面前。以撒年老,目睭看無。聽著聲是細囝雅各 ê 聲,但是摸伊 ê 手閣有發毛,原來伊老母利百加用一塊羊皮給 khàm 佇雅各 ê 手骨及頷仔頸。來到年老 ê 老爸以撒面前,老爸目睭無看,問伊講:「你講話 ê 聲是雅各,但是手閣 sêng 以掃?」以撒因為分袂清楚,就給伊祝福。

雅各受以撒祝福了後,tú 踏出門,以掃 tú 好對外口拍獵入門。伊緊去做一盤真正 ê 野味,捧來老爸以撒面前。

以撒問伊:「你是啥人?」伊講:「我就是你 ê 大囝以掃!」以撒大驚,講:「Tuh-chiah 煮一盤肉捧來互我食 ê 是啥人?我已經食了,嘛給伊祝福了!」

以掃聽著放聲大哭,給老爸講:「你豈干單會當祝福一擺?老爸,請你嘛祝福我!」以撒講,伊干單會當按呢祝福伊:「你著倚靠刀劍過日,閣著事奉你 ê 兄弟。到你強盛 ê 時,你欲對你 ê 頷頸掙脫伊 ê 擔。」(創世記 27 章 40 節)

彼時開始以掃 khioh 恨雅各,準備有一日欲報復。二人相爭、冤家、分離,但是二人又閣時常相遇。這次相遇 ê 時,雅各好聲好嘴給以掃講:「我看著你 ê 面,親像看著上帝 ê 面!」閣講:「請接受我為你準備 ê 禮物,上帝已經互我真有夠額啦,所以遮 ê 攏欲送互你!」雅各想著伊佇伯特利佇夢中看著天梯,有上帝 ê 天使上上下下來來去去,上帝閣及雅各 sio-ián,上帝對雅各偷提長子名分 ê 代誌,若準無欲放伊煞。

上帝要求雅各,用一世人 ê 時間及拖磨來還債。上帝要求還賬 ê 時間有時拖真久,咱有時感覺一直到今仔日,伊猶 leh 還。這豈毋是上帝 ê 一種逆理?人想袂到 ê 所在,上帝猶 leh 做工。這種若準是上帝 ê 暴力及無理,結局是世間向善 ê 一種希望。

上帝無偏心

咱讀著這段聖經,感覺故事內面若準有贏及輸,若準有受揀選及受排斥 ê 二邊。但是認真來想,兩邊攏無輸贏。算來算去,加加減減,in 二邊財產及命運攏差不多。上帝佇二邊對立 ê 時,伊對天頂 teh chhiâu。咱認為著 ê,有可能是  著。咱想講是贏 ê 時,有可能是輸。上帝家己 leh chhiâu。

這二個囝 ê 老爸以撒嘛是有仝款 ê 故事。以撒 ê 老爸亞伯拉罕 giâ 起刀欲刣以撒獻祭互上帝 ê 時,伊 ê 兄弟以實瑪利佇遐 teh 看。伊斯蘭教 ê 可蘭經有記載真清楚,in ê 先祖以實瑪利受著上帝 ê 賜福並無輸以撒,伊斯蘭教族群最後也形成世間大族。代誌發生 ê 當中,初看若準是災難,若準上帝非常不公,但是咱對歷史來看:上帝並無偏心,上帝無徛單邊。

以撒二個囝──雅各及以掃──ê 冤家及鬥爭占滿舊約聖經以及後來世界歷史 ê 版面。這個故事主角之一──亞瑪力人就是希伯來人 ê 先祖之一。In ê 神明叫以色列人著完全剿滅亞瑪力人,完全擦消 in ê 歷史,其實毋是擦消別人 ê 歷史,是擦消 in 家己兄弟及先祖 ê 歷史。因為每次發出「剿滅」 ê 命令 ê 時,雅各 ê 兄弟以掃,攏徛佇門邊 leh 聽 leh 看。「亞瑪力」這個名,歷史上不但無消失,顛倒是一代一代互人傳落去。人所毋愛 ê,上帝留落來。鬥爭、祝福、破壞、剿滅、賠償,攏是一事二面。

聖經主宰人 ê 社會真清楚,譬如講烏人佇美國久長 ê 奴隸制度社會內面,「烏人啥物財產攏無,只有互 in 一本聖經,叫 in 去讀,互 in 知影烏人是白人 ê 財產。」美國建國 ê 先輩較濟攏是按呢想,按呢經過百外冬。世間真濟宗教思想,包括一部分舊約 ê 思想,實在是分裂社會、政治及人心 ê 起源。今仔日阿拉伯人及西方人 ê 對立,就是活活顯現佇咱面前 ê 事實。

咱信耶穌 ê 人知影咱人活這世間,永永有敵人;有外在加互咱 ê 社會、政治、人間世事 ê 敵人。見若反對咱 ê 會當講攏是一種咱 ê 敵人;另外有咱家己心內創造 ê 內在 ê 敵人,咱感覺會著及感覺袂著 ê 意識內面,忽然會產生敵人。外在 ê 敵人較好對付,但是心內 ê 敵人,心內時常掰袂開、纏袂離。

耶穌真知人 ê 世界及人 ê 本性,伊無講咱袂使有敵人。但是伊愛咱脫離敵人 ê 纏絆;若是會當,最好離開敵人遠遠。伊講若是會當,甚至咱著去「疼」敵人。這是人生第一大 ê 困難,真少有人做到。但是這是主耶穌設互咱人生最高 ê 道德標準,親像一 pha 燈火掛佇咱面前,親像上帝永遠佇 hia leh 呼叫 ê 聲音,親像 leh 叫咱轉來 ê 聲。

雖然這 pha 燈火真遠,親像一個永遠達袂到 ê 目標,但是咱一定著向彼個目標進前,因為知影世間所有代誌,咱初想是上帝徛佇咱這邊,但是無一定,咱家己毋知,因為上帝是毋是最後徛佇咱這邊,著等到最後結束 ê 時咱才知。咱著真正去等,認真等,耐心等,祈禱 leh 等,等到最後才會知。咱著認真去思考啥物才是上帝「最善良、通歡喜、純全」ê 旨意及教示(羅馬書 12 章 2 節)。這款代誌是上帝留互世間咱信耶穌 ê 人每日 ê 工課。

我有話要說