(請安裝Taigi Unicode字形，配合Firefox瀏覽器來讀)
作者：陳清俊
我 ê 老母食到七八十歲 ê 時，有發生一个現象，ta̍k 個月 lóng ē 發生貧血，to̍h 是欠血；ta̍k 個月 tio̍h 注一筒 ê 血，chiah ē 正常生活。檢查胃腸是 m̄ 是有出血，結果是無，koh 無其他 ê 流血，為何 ē 欠血？結果是製造血 ê 功能發生問題。
Koh 再詳細檢查原因，發現身體欠維他命 B12。後來 ta̍k 個月注一筒維他命 B12 ê 注射，造血 ê 功能就正常，無需要輸血。後來我 ê 老母有發見膽結石，真嚴重，就開刀除去膽石。無 phah 算膽汁開始 koh 作用，無需要 koh 注維他命 B12，亦無 koh 欠血，身體變正常。
一般 ê 人 lóng tùi 食物來吸收維他命 B12。人通常 lóng 有充分 ê 吸收，無需要特別 ê 注意。有三種人 chiah tio̍h 注意維他命 B12有夠 á 無，to̍h 是懷孕 ê 人、食菜 ê 人 kah 老人，chit 三種人有欠維他命 B12 ê 可能。
存在 tī 動物 ê 食品
Tāi 先來講食菜人，因為維他命 B12 只有存在 tī 動物 ê 食品，菜蔬 lóng 無。若是有食卵 ê 食菜人，就有夠額 ê 維他命 B12，若是無就可能會欠缺。通常各種動物 ê 肝 siōng-chē 維他命 B12。人 ê 維他命 B12 也是大部分存 tī 肝內。
第二種懷孕 ê人，需要雙倍 ê 量，若是平常食魚、肉 khah 少 ê 孕婦，to̍h 可能 ài 補充維他命 B12。
第三種就是老大人，親像我 ê 老母，雖然有食，總是 bē-thang 吸收入去身體。有人後半生 lóng tio̍h ài 注維他命 B12 來保持健康，好佳哉，維他命 B12 ê 注射無算貴，大部分 ê 人負擔 ē 起。
若是欠維他命 B12，人有啥物現象？我 ê 老母是製造血 ê 功能失去，欠血，是真 chē 人有 chit 種現象。總是，欠維他命 B12 ê 人 mā 是有無 siâng ê 現象。Tī 人 ê 神經系統中間，有需要維他命 B12 來合成神經訊號 ê 傳達物。若是欠維他命 B12，神經 ê 聯絡 to̍h 有問題，腳手 ē chia 麻 hia 麻 ê 現象，á 是 chia 痠 hia 痠，chia 抽 hia 抽，chia-tiuh hia-tiuh 各種奇怪 ê 感覺。行路 ē 失去平衡、無精神、精神 bē 集中、頭殼眩、記憶退化，甚至暫時失智。以及其他 kah 神經系統有關所發生 ê 現象，親像 kiuh 根、胃痛、làu 屎、目 chiu 畏光、耳孔有聲、喘氣變緊、嘴舌 ē 腫等等奇怪 ê 現象。
因為現象真 chē，真 oh 正確診斷出欠維他命 B12。有人平常無精神，食維他命 B12 了後 to̍h ē 變有精神。這 kám 是因為維他命 B12 ê 功效？我 m̄-káⁿ 確定。通常維他命 B12 ê 補充，若食真 chē，人 bē lóng 吸收，ē 放出來，只有浪費，m̄-koh 對身體無嚴重 ê 副作用。
Koh 進一步來想，為何 ē 欠維他命 B12？食物中間有維他命 B12，是因為本身無法度吸收入去身體，chiah ē 缺乏維他命 B12。維他命 B12 ê 吸收有下面 ê 步數：因為食物中有維他命 B12 lóng 是 kah 其他 ê 成分 kah-tiâu-tiâu，頭一步 to̍h 是用胃酸來分解出來維他命 B12 自由體。若是食胃酸 ê 制壓劑，維他命 ê 吸收有可能變少。然後 tī 嘴瀾中有一个蛋白質來 kah 伊結做伙，也是 beh 保護伊 bē 受其他 ê 物來破壞。維他命 B12 ê 綜合體到 tī 腸 á ê 時，koh 有一个腸 á ê 蛋白質（可能 kah 膽汁有關）來 kah 伊相結聯。Án-ne，維他命 B12 chiah ē tī 腸á 內受吸收到身體 ê 內面。Tī 身體，維他命 B12 大部分 lóng 存 tī 肝 ê 內面，食肝是 siōng 好 ê 來源，卵也是好 ê 選擇。膽汁無夠，ē 影響吸收，親像我 ê 老母一樣。食魚、食肉 ê 人 lóng 應該有充足 ê 維他命 B12 成分。
有機立體合成維他命 B12
最後我 beh 講一个有關維他命 B12 ê 故事來做結束。有一个有機合成 ê 化學家，名叫做 Woodward，tī Harvard 大學做教授。伊用有機合成 ê 方法，合成真 chē 天然物，真出名。Tī 1965 年得 tio̍h 諾貝爾獎，hit 時伊 tú teh 進行維他命 B12 ê 合成大工程。動用幾十个研究員，用 chiâⁿ 十年 ê 時間來完成。
Tī 1973 年發表，hit 時這是一个大 ê 成就，tī 有機化學界大轟動。到 chit-má 無 koh 有人發表維他命 B12 ê 完全製造（Hi̍t-時，我是一个化學研究生）。Tī chit-ê 立體維他命 B12 ê 結構合成中，綜合合成 ê 可能性。Ē 進行 á 是 bē 進行 ê 合成中，伊發見 tio̍h 一个原則，叫做 Woodward-Hoffman 原則，是有關「量子化學」ê 原則。Chit-ê 原則 tī 有機立體合成被大大應用，有真大 ê 貢獻，是量子化學家所 teh 追求ê，soah hō͘ 有機化學家所發見。
了後 Hoffman to̍h 因為 chit-ê 發見得 tio̍h 諾貝爾獎。可惜 hit 時 Woodward 已經過身，bē-thang 得 tio̍h 伊第二个諾貝爾獎，因為諾貝爾獎原則上 kan-taⁿ 頒發 hō͘ 活 leh ê 人。
