(請安裝Taigi Unicode字形，配合Firefox瀏覽器來讀)
作者：姚志龍
鳥鼠仔 鳥鼠仔 真古錐
耳仔 耳仔 細細對
喙仔尖尖若 Phián-chih
毛仔烏烏 金熾熾
你敢知影 欲過年
暗時看你 走來 走去
是咧 無閒啥物？
我大聲 咧問你
你煞應：chih-chih-chih
鳥鼠仔 鳥鼠仔 覕佇佗位
想欲 閣揣你講話 揣無你
今年 是你的 天年
大大細細 真歡喜
歡喜啥？
歡喜 歡喜 欲過年
有新衫 新褲 新鞋 佮新錢
會當去買 好食物
阿爸 阿母 若賞我 較濟錢
我 tō 會當 去 去 去……
去換手機仔 換手機
現代 3C 少年的 愛甲欲死
鼠年 鼠年 鳥鼠年
祝阮 親情 朋友 媠閣甜
厝內序大健康 食百二
新年大家 有福氣
心想事成 攏如意 攏如意
Niáu-chhí-á niáu-chhí-á chin kó͘-chui
Hīⁿ-á hīⁿ-á sè-sè tùi
Chhùi-á chiam-chiam ná Phián-chih
Mn̂g-á o͘-o͘ kim-sih-sih
Lí kám chai-iáⁿ beh kòe nî
Àm-sî khoàⁿ lí cháu-lâi cháu-khì
Sī leh bô-êng siáⁿ-mi̍h?
Góa tōa-siaⁿ leh mn̄g lí
Lí soah ìn: chih-chih-chih
Niáu-chhí-á niáu-chhí-á bih tī tó-ūi
Siūⁿ beh koh chhōe lí kóng ōe chhōe bô lí
Kin-nî sī lí ê thiⁿ-nî
Tōa-tōa sè-sè chin hoaⁿ-hí
Hoáⁿ-hí siáⁿ?
Hoaⁿ-hí hoaⁿ-hí beh kòe-nî
Ū sin-saⁿ sin-khò͘ sin-ê kap sin-chîⁿ
Ē-tàng khì bé hó-chia̍h-mi̍h
A-pa a-bú nā siúⁿ góa khah chē chîⁿ
Góa tō ē-tàng khì khì khì……
Khì oāⁿ chhiú-ki-á oāⁿ chhiú-ki
Hiān-tāi 3C siàu-liân..ê ài kah beh sí
Chhí-nî chhí-nî niáu-chhí nî
Chiok goán chhin-chiâⁿ pêng-iú súi koh tiⁿ
Chhù-lāi sī-tōa kiān-khong chia̍h pah-jī
Sin-nî tāi-ke ū hok-khì
Sim siūⁿ sū-sêng lóng jû-ì lóng jû-ì
