(請安裝Taigi Unicode字形，配合Firefox瀏覽器來讀)
作者：吳春滿
慶祝正月十五 小過年
賀喜鼠年 萬事攏如意
上元燈會 鬧熱閣媠氣
元宵節 上趣味
來踅燈會 食好料
食物奇巧 食袂了
元宵圓 口味濟閣齊
宵夜食甲 身軀肥肉加一條
趣味謎猜 考頭腦
味字無喙 喙瀾流
燈盞無油 真苦惱
猜想答案 天文地理著愛 gâu
歡天喜地 迎鼠年
喜事入門 逐家攏佮意
賞花捾燈 四界奕
燈會鬧熱 心適耍歸暝
Khèng-chiok chiaⁿ-goe̍h cha̍p-gō͘ sió kòe-nî
Hō-hí chhí-nî bān-sū lóng jû-ì
Siōng-goân teng-hōe nāu-jia̍t koh súi-khùi
Goân-siau-chiat siōng chhù-bī
Lâi se̍h teng-hōe chia̍h hó-liāu
Chia̍h-mi̍h kî-khá chia̍h bōe liáu
Goân-siau-îⁿ kháu-bī chē koh chiâu
Siau-iā chia̍h kah sin-khu pûi-bah ke chi̍t-liâu
Chhù-bī bī-chhai khó thâu-náu
Bī–jī bô chhùi chhùi-nōa lâu
Teng-chán bô iû chin khó͘-náu
Chhai-sióng tap-àn thian-bûn tē-lí tio̍h-ài gâu
Hoan-thiⁿ hí-tē ngiâ chhí-nî
Hí-sū jip mn̂g ta̍k-ke lóng kah-ì
Siúⁿ-hoe koāⁿ-teng sì-kè ī
Teng-hōe nāu-jia̍t sim-sek sńg kui-mî
