(請安裝Taigi Unicode字形，配合Firefox瀏覽器來讀)
作者：陳清俊
一般人講 tio̍h 細菌，á 是 bâi-khín（ばいきん=細菌）lóng 講是對人有 bái ê 作用，其實細菌有兩種：好 ê kah bái ê；to̍h 是對人有利益 ê 細菌叫做好 ê 細菌，親像胃腸內有真 chē 細菌是幫助消化用 ê，人 chiah ē 得 tio̍h 營養吸收進入身體。第二種 ê 細菌，是 ē hō͘ 人破病 ê 細菌，叫做 bái ê 細菌，所以也叫做病菌。人若破病 to̍h ē 去看醫生，無論中醫 á 是西醫，得 tio̍h 藥方，thiah 藥 á，食藥 á 來得 tio̍h 醫好。
抗生素 ê 發見
Tī 1928 年，人 tī 無意中發見 phe-ní-sí-lín（penicillin，抗生素），頭一个抗生素 ê 發見，是一个真大 ê 醫藥進步。Tī hit 時，人若患 tio̍h 肺癆（肺結核），ná 親像現在 ê 人患 tio̍h 癌症，判死刑 ê 款式，無藥 thang 醫。M̄ -nā án-ne，因為肺癆 ē 傳染，koh ài 受隔離。Phe-ní-sí-lín tú 好是 thang 治療肺癆 ê 藥 á。二次大戰後，phe-ní-sí-lín 大量生產，救了真 chē 人 ê 性命。
我 ê 阿舅 kah 阿妗 lóng 是 tī 二次大戰 ê 時患 tio̍h 肺癆來過身，in ê kiáⁿ 也有，因為得 tio̍h 新藥來醫治，一下 tio̍h 好起來。雖然好起來，肺部 iáu 有傷痕，m̄-koh bē koh 對人傳染。當我 ê 表兄 beh 出國 ê 時，因為肺部 ê 傷跡，ài koh 照電光（X-ray）證明傷跡無變化，bē 傳染 chiah 許可 in 出國留學美國。
Phe-ní-sí-lín chit 類 ê 抗生素有 chiah 大 ê 貢獻，後來 koh 陸續發見，有 chē-chē 新 ê 各種抗生素。我 tī 小學 ê 時（1950 年代），真 chē gín-á lóng 有砂眼。聯合國 beh tī 台灣治療砂眼，免費供給一種抗生素（大概是 O-lí-go-mâi-sín（Auligomycin=金黴素），每一个學生 lóng ài 點，點幾 nā 禮拜，到無 koh 有砂眼為止。果然了後砂眼真正罕 koh 聽 tio̍h，所以，阮 lóng 是抗生素 ê 受益者。
抗生素大量使用了後，現見 tio̍h 兩个問題。頭一个，是人對抗生素 ê 過敏；第二个，是病菌對抗生素產生抵抗，soah hō͘ 抗生素失去功效。
Phe-ní-sí-lín 大量用 tī 各種 ê 病症，尤其是細菌 ê 消滅有真大 ê 功效。後來，有一部分 ê 人對 phe-ní-sí-lín 有過敏，to̍h 是 in ê 免疫系統有真大 ê 反應，ē hō͘ 人 ê 呼吸困難，甚至發生死亡。所以 beh 使用 phe-ní-sí-lín ê 時，lóng ē 用皮膚來看有反應 á 無。用一點 á phe-ní-sí-lín 抹 tī 皮膚頂面，過半點鐘了後，看皮膚 ē 變紅、變腫 ê 現象 á 無；若無，to̍h thang 使用 phe-ní-sí-lín。有 ê 厝內 ê 人有過敏，to̍h 想其他 ê 人 mā 過敏；有 ê 人因為嫌費氣，ài 先試 chiah 使用 phe-ní-sí-lín，to̍h 用其他 ê 抗生素。其實真正有過敏 ê 人無 chē，過敏 ê 原因 iáu 無明確，講有遺傳 ê 講法，並無正確。
抗生素使用普遍了後，有少數 ê 病菌對抗生素產生抵抗，hō͘ chit-ê 抗生素失效。Chit 款 ê 病菌 ka 叫做超強病菌。Beh hō͘ 病好起來，to̍h 用無 siâng ê 抗生素。所以，發展各種 ê 抗生素是 tī 20 世紀後半年代真興旺；m̄-koh 新藥 ê 發明成本 ná 來 ná 貴。新藥使用無幾年，病菌 koh ē 產生抵抗，新藥 koh 再失效，所以，抗生素 ê 新藥發展就 khah 少藥廠去做。
病菌對抗生素 ê 抵抗，tī 醫學界用 ê 方法是食抗生素 ài kā 病菌徹底消滅 chiah thang 停止藥 á。我因為有肺部 ê 病症，真早 to̍h 用真 chē 抗生素；約 30 gōa 年前（1980 年代），有醫生 hō͘ 我食抗生素兩禮拜，停兩禮拜，án-ne 使用有超過半年久。因為 chit-ê 藥 á 對我無效，我去看別 ê 醫生；伊認真檢查，hō͘ 我食兩種 ê 抗生素。若是食頭一款無效 ê 時，就用第二款，有時亦 thang 交換使用。Án-ne，我 ê 肺部 ê 病症無惡化，嗽 ê 現象 mā 控制好勢。過真久，我退休 tùi 波士頓搬來費城，前後 chhōe 三个肺部 ê 專家醫生，chiah koh 對我 ê 肺部 ê 病症有控制。伊 mā 是用兩種抗生素 hō͘ 我食；後來伊 koh 用物理治療 ê 方法，減少藥 á 使用，效果真好。
超強病菌 ê 發生
Τī-chia 我 ài 探討 chit-ê 超強病菌 ê 發生。當然，是抗生素使用過度 ê 緣故，人食抗生素治療病症，有醫生講是 ài 兩禮拜，mā 有醫生講是 10 工，koh 有醫生講是一禮拜 to̍h 好。醫生 hō͘ 我 ê 抗生素，30 gōa 年來，chit 三款 lóng 有，看起來一禮拜 to̍h 有夠額。抗生素食到一禮拜，伊 ê 副作用 mā 開始發生，to̍h 是對胃腸 ê 好細菌 mā 消滅，致到漏屎。我想超強病菌 m̄ 是 tī 人 ê 身體發生，是因為人所食 ê 藥 á 排泄出來 tī 外圍 ê 環境發生。糞埽中有抗生素少量，koh 有病菌真 chē，容易產生超強病菌。
另外有人用抗生素 tī 豬、雞、魚 ê 養飼，致到抗生素 tī ta̍k 所在 lóng 存在。一般環境 ê 消毒，使用漂白水消毒 lóng ē kā 超強病菌殺死。總是，人 tī 無意中，亦 ē 感染 tio̍h。免疫系統好 ê 人 ē-tàng 消滅 chiah-ê 超強病菌。若是 khah lám ê 人，to̍h ài 靠藥 á ê 醫治，chit 時超強病菌就 oh 消滅，ài 試各種 ê 抗生素看有效 á 無。
所以，人 ê 衛生習慣 ài 注意，thang 避免感染 tio̍h 超強病菌。Tī 病院有時消毒無完全，人破病入院治療，soah 感染超強病菌。所以，人 ài 時時注意環境衛生，來減少超強病菌 ê 感染。全世界約有 70 萬人死 tī chiah-ê 超強病菌，tī 美國每年也有 2、3 萬人因為超強病菌 ê 感染喪失性命，年年也 teh 增加。
人 ài 好好 á 思考，如何使用抗生素，如何避免超強病菌 ê 感染，是真大 ê 挑戰。抗生素 m̄ 是萬靈丹 ，親像流行感冒，一般 ê 感冒 lóng 是病毒 m̄ 是病菌所引起，若用抗生素治療，是無效果。
Chit 幾年來，有科學家 teh 研究 chiah-ê 超強病菌是 án 怎來對付抗生素。加拿大有人講是病菌產生保護膜，hō͘ 抗生素無法度進入超強病菌內，所以無起作用。Tī 美國有人發見超強病菌 ē 產生一種酵母 á 是叫做 mûi （enzyme），ē kā 抗生素破壞，所以抗生素 bē 起作用 kā 病菌殺死；進一步 koh 發見一个藥 á ē 阻擋 chit-ê 酵母 ê 功用。所以，kā chit-ê 藥 á kah 抗生素做伙食，to̍h ē 對超強病菌有作用，kā 病菌殺死。希望 chit-ê 藥 á 緊緊 tī 人體實驗成功，hō͘ 舊 ê 抗生素 lóng koh 有功效；m̄-nā 對人有醫治 ê 功效，mā 對減少醫藥費用有大大 ê 幫贊。
