(請安裝Taigi Unicode字形，配合Firefox瀏覽器來讀)
作者：李南衡
福伯看報紙看 kah 笑 hai-hai，對厝邊來坐 ê 阿明講：你看，「想貪 tio̍h nǹg 雞籠（Siūⁿ tham tio̍h nǹg ke-lam）」。讀小學三年 ê 阿孫仔插嘴問講：阿公，你講雞籠是啥物？Nǹg 雞籠 beh 創啥？福伯講：我無講你毋知。阿明問講，是 ah，是按怎「想貪 tio̍h nǹg 雞籠」？你看 tio̍h 啥物 kah nǹg 雞籠有關係 ê 新聞？
福伯講，我先來 kā 恁講啥物是雞籠。早前 tòa tī 庄跤 ê 人，差不多家家戶戶攏有飼雞，有 ê 雞愛啄 chit 隻啄 hit 隻，那像相拍雞仔，不得已 tio̍h 用雞籠 kah 關起來 hō͘ 伊無自由；另外，庄跤定定有鴟鴞（bā-hio̍h）ē 飛來。阿孫仔 koh 插嘴問講：「阿公，bā-hio̍h 是啥？」鴟鴞 tio̍h 是恁學校所教 ê「老鷹」。鴟鴞雖然飛真懸，但是伊 ê 目睭足利，伊若看 tio̍h 細隻雞仔囝，伊 to̍h suit 一下飛落來咬雞仔囝去，所以，飼雞 ê 人攏 ē kā 細隻雞仔囝關 tī 雞籠內底。
福伯講，你看最近詐領助理費 chit 種貪汙案， tī 台灣比「武漢肺炎」koh khah 流行。因為議員需要助理，但是議員 ê 收入無夠支付，由政府來出錢。縣市議員 ē-sái chhiàⁿ 兩至四名助理，每個月總金額 bē 使超過八萬；院轄市議員 ē-sái chhiàⁿ 六至八名助理，每名 bē-sái 超過八萬，每個月總金額 bē 使超過24萬。有 ê 議員想貪，用伊 ê 親人好友作人頭虛報作伊 ê 助理來詐領助理費。
新聞報導講，新黨台北市議員潘懷宗涉嫌 ùi 2008年到2020年，詐領助理費新台票300萬。平平新黨 ê 台北市議員李慶元講，潘懷宗有真濟副業收入，伊 bē 為 tio̍h 一個月兩萬外箍去犯法。今年1月，中國國民黨新北市議員曾煥嘉，hông 控告 ùi 2016年起詐領助理費約200外萬。澎湖縣無黨籍成萬貫，hông 控告擔任兩屆縣議員期間，涉嫌用人頭報助理費共829萬，hō͘ 澎湖地院依貪汙治罪條例判處徒刑12年。中國國民黨新竹縣議員陳栢維 hông 控告 ùi 2012年到2017年詐領助理費191萬外，判3年6個月。民進黨新北市六連霸議員高敏慧涉嫌詐領助理費 hông 起訴。中國國民黨台南市議員李中岑 kah 仝黨市議員蔡育輝 mā 涉嫌詐領助理費。鬥鬥一下台南市議會2020年已經有五名現任議員 kah 一名卸任議員，攏總六個人涉嫌詐領助理費 hō͘ 檢調單位偵辦。中國國民黨台東縣議員林威志涉嫌詐領助理費56萬，台東地檢署12月底偵結起訴。
趣味 ê 是：想貪 ê 人身分無分好額散赤；黨派無分藍綠烏白，地點無分東西南北，金額無分大條細條。我講「想貪 tio̍h nǹg 雞籠」，是講想貪 ê 人若去犯 tio̍h 法，tio̍h ē 像雞仔 hông 關 tī 雞籠失去自由，毋是講 in 真正去 nǹg 雞籠。
阿明講，福伯你講歸晡我才明白，我看，chit 句俗語話免偌久 tio̍h bē 時行。
