(Chhiáⁿ an-chong Taigi Unicode jī-hêng, phòe-ha̍p Firefox Browser lâi tha̍k. 請安裝Taigi Unicode字形，配合Firefox瀏覽器來讀)
台譯：黃正州
編按：本文對 Even about the Weather: a Visit to George William Mackay 摘錄，由偕叡廉口述，偕仁利記錄。中文版有林一真譯《馬偕的孩子說故事：來看偕叡廉》。
佇艋舺這个台北上早 khai-hòa ê 所在，有一間誠媠 ê 佛教廟寺，號作龍山寺。真濟年前，龍山寺 ê 住持是羅妙吉 ，伊是台灣上 hō͘ 人敬重 ê 法師，三个中 ê 一个。伊受過真好 ê 教育，佇中國 kap 印度攏捌修行、研究佛教幾若冬；伊嘛捌佇日本講道過，彼時伊才27歲 niā-niā。
我頭一擺見著伊，是佇20年前。我 kap 一个南京來 ê 宣教師，kap 淡水教會 ê 鍾天枝牧師（1878～1957年），做伙到龍山寺。有一陣佛教徒，佇觀音佛像面前聚集，阮傳講一段短短 ê 福音。有 ê 人誠受氣，想欲 kā 阮趕出去。羅住持 ta̍uh-ta̍uh-á 解說，是伊請阮入來廟埕 ê。
伊誠好禮，看起來誠斯文、有智慧。伊生作誠 lò，穿黑色 ê 長袍，胸坎有一 tè 金線 pian-chit ê 牌仔，看起來嘛誠有威嚴。
佇阮欲離開 ê 時陣，我 hō͘ 伊我 ê meh-chih，我講，伊若是有來淡水，我會非常歡喜款待伊。
過幾個月，我佇阮 ê 門跤口，看著一个穿做和尚款 ê 人，斟酌看，就是羅住持。我請伊入門，伊講起這擺來 ê 目的。
「做一个傳道者，」伊講：「我知影一項代誌，就是這个世界，偉大 ê 宗教攏已經老矣。佛教老矣，親像一欉樹，樹心已經蛀 kah 空空空，基督教嘛老矣。咱需要一个新閣有氣力 ê 宗教。我 ê 建議是按呢，咱來 kā 佛教 kap 基督教 ê 重點整理出來，成做一个新 ê 宗教，咱會使做伙去全台灣宣教。」
聽著這个提議，我感覺誠意外，我應伊講：「你講 ê 無毋著，這世間有 ê 物件實在是舊，嘛需要改變。毋過，有 ê 物件是永遠都袂變舊 ê，幾千年前，in 著是按呢，到明仔載也會是按呢。譬喻來講，疼是永遠攏袂變舊 ê。你講佛教老去矣，這我看嘛是，但是呢，基督教永遠攏袂老，因為毋管是昨日、今仔日，抑是永遠 ê 以後，耶穌基督攏是仝款 ê。你著放捒你過時 ê 宗教，來信耶穌基督。伊袂改變，會 hō͘ 你永遠 ê 活命。你 kap 我會使做伙去四界傳福音。」
羅住持聽煞，猶原真客氣，但是無啥合意我 ê 回答，無 gōa-kú 伊就離開矣。毋過，我講 ê 話應該 hō͘ 伊想真久，因為伊尾仔閣來揣我，這擺一住就是三暝。
伊差不多攏咧伊 ê 房間，恬恬仔看冊，抑是佇亭仔跤來回散步，看風景 kap 花草。有當時仔，阮會做陣行，伊講一寡蹛佇別間廟寺 ê 經驗，我分享基督教 ê 故事。
閣再幾若個月，羅住持破病矣（註：胸膜炎）。伊堅持欲送到阮傳道 ê 病院檢查（註：馬偕病院），hō͘ 別 ê 法師非常無歡喜，刊報紙講伊已經死去矣，欲 kap 伊斷絕關係。
羅住持是一个好病人，病院 ê 宣教師坐佇伊 ê 邊仔，傳講耶穌 ê 時陣，伊攏有專心聽。伊出院了後，無轉去龍山寺，搬去蹛咧台北別位 ê 朋友厝內。阮去看過伊一擺。
羅住持慢慢仔行過來，伊面色白恂恂。我問伊，敢會使 kap 阮做伙敬拜上帝？敢願意 kap 阮做伙祈禱？
「會當得。」他講：「我相信祈禱，我佇病院感覺真悲慘 ê 時陣，宣教師有為我祈禱，我本來感覺真沉重 ê 負擔，敢若攏放落來矣。」
這擺見面了後，有一陣仔，我無伊 ê 消息。有一日，一通電話 khà 來，是羅住持。
「我欲 hō͘ 你知影，」伊講：「我頭拄仔辭掉住持 ê 身分矣，編輯佛教雜誌《亞光新報》、管理法雲寺 ê khang-khòe 我嘛攏辭掉矣。我這馬是一个喪鄉人，毋過我甘願接受你 ê 邀請，搬去你 hia。這擺毋是和尚，是一个來 o̍h 物件 ê 人，我欲揣真正 ê 宗教。」
羅住持確實無穿伊 ê 金絲長袍，換做穿一領舊 ê hiû-á，ām-kún 圍一條巾仔。伊一手提包袱仔，另外一手提一頂遮日用 ê 舊帽仔。伊講：「這就是我所有 ê 一切。我 ê 地位 hām 錢財攏 pàng-sak 了後，賰落來 ê 一切。」伊離開伊 ê 信仰，因為佛教毋捌 hō͘ 伊真正 ê 滿足。
「佛教是一个 siau-ke̍k ê 宗教。」有一擺伊講：「咱應該要 chek-ke̍k 主動來幫贊別人，hō͘ 人過較好勢 ê 生活。若無，阮敢若是 ùi 這个世界偷走，閃避到山頂一个清幽安靜 ê 所在。」
因為伊是用學生 ê 身分來到遮，我提議講，伊 kap 我做伙來讀聖經，ùi 路加福音開始。逐工透早，我會大聲讀 hō͘ 伊聽，伊會 tòe 我讀伊手頭 ê 新約聖經。我會解說經文，了後伊著轉去伊 ê 房間，家己閣繼續讀。
「你敢知影？」有一工早起伊問我：「這一切對我來講，攏是全新 ê，毋管是人名抑是地名。所以，拜託你 ta̍uh-ta̍uh-á 讀，逐節經文加讀 kúi 擺。對我來講，了解其中 ê 意義，非常要緊！」有時陣，伊會誠心提出伊 giâu-gî ê 部分；有時陣，伊會 kap 我分享伊思考了後 ê 心得。」
有一工早起，伊行來我 ê 冊房。伊雙手合倚做伙，看起來淡薄仔戇神戇神，伊坐落來。
「昨暗我發見福音書內面 ê 一寡代誌。」伊說：「殘忍 ê 人 kā 耶穌釘佇十字架，伊忍受遮爾大 ê 痛苦。總是，伊原諒伊 ê 對敵。這表明伊 ê 疼是完全 ê，親像一个圓箍仔。」
羅住持用 chéng-thâu-á 佇半空中畫一个圓。伊繼續講：「我去過印度，研究過佛教，但是佛祖無完全 ê 疼。」
另一工 ê 早起，伊笑微微，來揣我。
「今仔日我感覺真快樂。」伊講：「因為昨暝我讀著耶穌 hō͘ 人 ùi 十字架徙落來、埋葬，第三日對死亡中復活。佛祖佇印度過身，伊無復活。我嘛捌去過孔子 ê 墓，伊兩千外年前，hō͘ 人 tâi 到這馬。毋過，耶穌是活 ê。伊是活 ê 救主，我相信伊！」
按彼日開始，伊規个人變 kah 無仝款。伊想欲出外，kap 逐个拄著 ê 人，分享伊體會 ê 道理。伊會揣中學 ê 學生，問 in 敢知影耶穌 ê 故事。
阮整理神學院 ê 一間房間，hō͘ 羅住持使用，hō͘ 伊會使接待訪客，kap in 討論福音。伊 hō͘ 真濟人真深 ê 印象。我會記得有一工，林傳道師來揣我。
「你敢知影羅住持已經 chiap-la̍p 基督？」我問伊。這个老傳道師 liâm-mi 落去樓跤。
「你欲去叨位？」我緊 tòe 伊行。
「去看羅住持。」伊那走那回答，實在真歡喜。
尾仔，羅住持搬轉去城內。差不多半冬後，是復活節 ê 主日，我到城內講道。佇車頭我拄著伊 ê 兩个姊妹，攏對獅頭山落來。In kā 我講一个悲傷 ê 代誌，羅住持過身矣。這兩个姊妹無頭毛，穿 phú-sek ê 長袍，攏是修行 ê 法師。以前 in 對阮無好面色。這時，in ê 態度無仝款矣。
「阮 ê 師兄過世 ê 時陣，是基督徒。」in 講：「伊是恁 ê 人矣，阮袂反對用恁 ê 方法，為伊辦後事。」
所以，雖然龍山寺 ê 人反對，羅住持 ê 姊妹猶原舉辦一个告別禮拜，真濟基督徒攏有參加。
