◎ thô͘-hún
佇1990年代，趙鏞基牧師《第四度空間》等 ê 冊，就是我 ê 父母40外歲時，排佇厝內冊格仔上顯目 ê 所在。1988年，我 ê 老母 kap 教會 ê 牧師娘去韓國 ê 祈禱山，兩冬後，老母鼓勵我 ê 老父去。老母 bat 講：「阮佇旅社 ê 時，真濟人做伙大聲祈禱。濟濟基督徒透早會先去教會祈禱，了後才去上班。」
我 ê 老父原本癮薰，我猶記得伊欲去韓國進前，佇露台拚命 kā 幾仔包薰 lóng 食了了。老母講老父對祈禱山轉來了後，「逐工透早起來，就唱佇韓國學著 ê 激勵詩歌、讀經、祈禱，開始 kap 阮親近，建立家庭祭壇，用心投入教會事工 kap 牧師同工、關懷會友、排解糾紛、慷慨奉獻、殷勤探訪，幫助會友 ê 需要。」
趙鏞基 kap 伊 ê 團隊，特別是祈禱山 ê建立者──崔子實傳道（趙鏞基 ê 丈姆），鼓勵信徒透過祈禱山禁食祈禱 ê 靈修，體驗上帝 ê 神蹟、聖神充滿 kap 醫治，渴望基督再臨 ê 福音。這款神學 bat 吸引我 ê 老父。佇伊去祈禱山進前，已經因為病痛住院，伊 mā bat 為著脫離喪鄉來投資股票 ，sóa 百外萬「七溶八溶溶了了」。
毋過，我 ê 父母無因為祈禱山 ê 經驗 sòa 轉向強調靈恩 ê 教會。我 ê 老母講：「我kap 妳 ê 老父做伙祈禱，上帝指示阮著繼續佇台灣基督長老教會。因為教會非常疼惜這塊土地，對中法戰爭、日治時代保護人民，後來國民黨 ê 警察掠牧師、錄音牧師 ê 講道，教會攏堅持落來。教會真關心老人，重視社區。我體會著人佇靜靜 ê 中間才會當聽見上帝 ê 聲。」
當趙鏞基因為瀆職 kap 貪汙受著判刑時，我 ê 老母用憐憫 ê 心理解這位名牧只是一位罪人。我相信，我過身 ê 老父若知，大概會用伊上佮意 koh 吩咐阮著刻佇伊 ê 墓牌 ê 經文回應：人必須親像行洗禮 ê 約翰知影「祂必興旺，我必衰微」。
佇這个事件頂面，趙鏞基成做需要 hông 牧養 ê 對象。韓國汝矣島純福音教會 ê 眾長老用真實來提醒牧師應該行 ê 路，忠信 ê 信徒無棄捒犯罪 ê 牧師，規个韓國基督教信仰群體共同背負伊帶來 ê 陰影。我，清楚知影，伊 bat 經驗聖神 ê 大氣力、伊 kap 伊 ê 團隊通過祈禱山 bat 影響我 ê 爸母，佇今仔日，伊已經衰微安息主懷。 （作者為基督徒）
