孵囝 ê 所在

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

Chok-chiá:陳柏壽

我佇雲林古坑 ê 溪邊厝出世大漢,彼間老廟是阮庄社一切活動 kah 精神 ê 中心,無論是拜拜、giâⁿ 鬧熱、做戲,差不多我攏有佇 hia。廟內特別一項代誌是我一世人袂袂記得 ê,就是正身頂面大樑頂,燕仔用 chhùi-nōa(喙瀾)kap 土角做出來 ê 巢。一年過一年,燕仔某攏會佇遐孵卵生囝,藍色 ê 卵。鳥仔大漢,飛去,in 就 koh 生第二巢。Tiāⁿ-tiāⁿ 看著鳥仔囝猶袂曉飛,摔落去土跤,鳥仔爸母就佇土跤,慢慢 á kā 教,慢慢 á kā 扶,一直到鳥仔囝家己會曉飛出去為止。逐年 in 攏會轉來這間廟仔,因為這是 in 徛家 ê 所在,全庄 ê 人嘛攏款待 in 真好。

想著阮過去 ê 人生,阮二翁仔某對台灣、日本搬到美國逐所在,做四个巢,生四个囝,有公 ê 有母 ê,去到佗位阮就去揣路、揣材料、揣厝,佳哉上帝保庇,hō͘ 阮平安孵卵生囝,到今 hō͘ in 飛去全世界 in 愛去 ê 所在。世間人 teh 款待阮,親像阮庄 ni̍h ê 人 teh 款待 hia-ê 轉來做巢 ê 燕仔仝款,給阮扶持照顧,hō͘ 阮平安生長大漢。阮一世人有經過真濟艱苦、挫折、著磨、悲傷;就是因為經過 chia–ê,阮才體會著會當安心、做巢、孵卵、生囝 ê 幸福。

最近,因為疼風去 hō͘ 阮附近一个台灣人針炙醫生看病,技術真好。入去病院就看見一仙紅色小關公佇壁頂,二邊有紅色電火。吳醫師講伊細漢 ê 時,伊 ê 老母就下願欲 hō͘ 伊做關公 ê 契囝。不管伊對關公 ê 信仰如何,濟少這仙關公 hō͘ 伊心靈有安心,伊就按呢平順處理阮 chia-ê 患者。我感覺關公 tòa(蹛)佇這間病院 ê 厝瓦跤,就親像燕仔蹛佇阮廟內仝款,毋但 hō͘ 關公真安定,也 hō͘ 流浪到美國 ê 吳醫師真安心。

猶太人佇久長亡國 ê 歷史中,最後建立 in 家己 ê 聖殿,是何等歡喜滿足 ê 代誌。In 佇聖殿中敬拜上帝,毋過,詩人用來描寫聖殿 ê 尊嚴上好上實 ê 方式,是透過 bi̍h佇聖殿內做巢 ê 鳥仔,來講起上帝 ê 疼 kah 憐憫。容允燕仔 kah 雀鳥來聖殿內做巢,變做上帝 ê 疼 ê 體現,厝鳥 ê 厝 ê 安心,kah 上帝 ê 神聖 kah 尊嚴是仝一體。詩篇84篇寫講:「我 ê 上帝啊,佇祢神聖 ê 坐位邊,有雀鳥仔揣著家己 ê 巢,有燕仔揣著孵囝 ê 所在,因為 tòa 佇你 ê 厝,就有平安 kah 福氣。」(詩篇84篇3~4節,作者翻譯)

佇 New York 做牧師 ê 時,有一擺邀請萬佛會 ê 宗聖法師來阮衛鄉教會禮拜,伊剃和尚頭,身穿袈紗,伊設 ê 宣傳台灣獨立 ê 地下電台,拄好去 hō͘ 中國國民黨禁台,所有廣播器材攏 hông 沒收去。伊徛起來第一句話就講:「我來遮禮拜,就親像轉來家己 ê 厝!」對這位流浪天涯無位好去 ê 法師,伊佇上帝 ê 厝內,就是親像燕仔歇佇阮溪邊厝 ê 廟內,真正平安。

世界去到 tó-ūi 雨水攏是冷 ê,社會人情攏是現實 ê,人生到處風湧較濟,總是聖經繼續教咱講:世間 iáu-koh 有安心歇睏孵卵 ê 所在,就是彼个會當遮風避雨 ê 廟仔 kah 教會 ê 厝跤。佇 hia 無論風颱落雨,無論外口樹仔掃 kah 東倒西歪,無論溪水一直漲高,無論世情按怎冷淡,無論性命到尾會有死亡,上帝 iáu-koh hō͘ 咱有孵卵生囝 ê 所在。囝會大漢,iáu-koh 會飛出去,iáu 會當為咱繼續戰鬥,行頭前 ê 路,kah 風湧車拚。所以咱佇這世間 ê 頭前路,iáu-koh 充滿希望,咱著愛有信心,繼續向前。

我有話要說