洗面礙tio̍h鼻

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

Chok-chiá: 李南衡

福伯看 tio̍h 我緊問講:咱敢是乞食?我應講當然 m̄ 是!你哪會問我 chit 號三八問題?福伯笑講,6月初9,中國「中央電視」講台灣接受美國 kah 日本捐送「武漢肺炎」疫苗是「國際乞食」。佇台灣 ê 中國國民黨有一寡甘願作中國共產黨僚儸 ê 政客,緊 tòe 人喙尾講台灣是「疫苗乞食」。Chiah-ê 政客戇戇 m̄ 知 án-ne講是「洗面礙 tio̍h 鼻(Sé-bīn gāi-tio̍h phīⁿ)!」我好奇問講,án-ne 是洗 tio̍h 啥人 ê 面、礙 tio̍h 啥人 ê 鼻?福伯講,咱台灣話真趣味,「洗面」 ê 洗 mā 會使用來作「剾洗」(khau-sé)諷刺 ê 意思。In 原本是 beh「洗」台灣 ê 面,in

無常識 m̄ 知 án-ne 已經「礙」tio̍h 至少92國 ê 鼻。我問講:哪會 chiah 嚴重?
福伯分析 hō͘ 我聽:中國 ê 武漢肺炎,in 講 ê 「新冠病毒肺炎」傳遍全世界,染病確診、死亡 ê 人愈來愈濟。除了掛喙罨、勤洗手、保持社交距離以外,全世界上緊急需要 ê 是疫苗。有 ê 好額國家先付訂金,一氣 tio̍h 買足濟疫苗。濟到有夠 hō͘ in ê 每一個國民注四擺五擺疫苗;另一方面,世界至少有92个散鄉國家,根本無錢 thang 買疫苗。好佳哉,2020年4月全球疫苗免疫聯盟(GAVI)、流行病防備創新聯盟(CEPI)kah 世界衛生組織(WHO)組織一個新 ê 機構「嚴重特殊傳染性肺炎疫苗實施計劃」(COVAX),主張「病毒之前人人平等」公平分配疫苗,但是防範病毒感染 ê 疫苗 tio̍h 用錢買才有。錢咧?靠募款,英國政府第一个出聲承諾捐7.34億美元,了後日本認捐18億美元、歐盟認捐10億歐元等等,到6月初3為止,COVAX 總捐款達96億美元,猶 koh teh 增加中。目標是2021年2月開始分發疫苗,到年底向全球配送至少20億劑疫苗,其中13億劑 beh 贈送 hō͘ 92個散鄉國,hō͘ chiah-ê 國家20% ê 人會 tàng 注 tio̍h 疫苗。Án-ne, in 敢 m̄ 是罵92國、幾十億 ê 人是「疫苗乞食」?

福伯講 chiah-ê 戇囝好狗命!你知影 ùi 1950年代開始,美國每年贈送台灣大批「美援物資」以外,1951至1957年,每年贈送台灣一億美元,1957到1962年,一億美元一半贈送一半貸款,到1962年才開始全部貸款,十年後才開始一年一年還本金、無利息。若照中國國民黨 ê 一寡政客罵台灣是「疫苗乞食」,早前 hit 當時台灣敢 m̄ 是「美援乞食」咧?In 戇戇「洗面礙 tio̍h 鼻」,礙 tio̍h ê 鼻超級大粒,若是 hit 當時 in 會無命!叼一粒鼻 hiah 大粒?當年統治台灣的是中國國民黨 ê 蔣介石, án-ne,in 敢 m̄ 是罵蔣介石是「美援乞食」咧?

Koh 過幾年,你若講「洗面礙 tio̍h 鼻」chit 句台灣俗語話,真有可能有真濟人 m̄ 知影啥意思。

廣告/聖經充滿我-經文填充本

我有話要說