【台文世界】Lâi thè Siōng-tè sím-phòaⁿ?

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◎tihtih-hû

Góa tha̍k chheⁿ-phôe Hiān-tāi Tâi-gú Sin-iok E̍k-pún hù Si-phian liáu-āu it-ti̍t tán-thāi Hiān-tāi Tâi-gú Kū-iok E̍k-pún ê chhut-pán. Tī chit ē làng-phāng ē sî-kan góa ū tha̍k Choân-bîn Tâi-gí Sèng-keng, kám-kak pian-e̍k-chiá hui-siông iōng-sim, hō͘ lâng tha̍k tio̍h sim-chêng ē hoaⁿ-hí, in kā Iâ-so͘ kiò I-é-su chit hong-bīn hui-siông te̍k-pia̍t, góa mā ē-tàng chiap-siū.

Góa khat-bō͘ Hiān-tāi-pán Kū-iok Sèng-keng kúi-nā tang, chit pún Sèng-keng chiong-kî-bóe tī kū-nî nî-té chhut-pán. Góa kín beh chai-iáⁿ Kū-iok ê piàn-hòa ū jōa-tōa kah lán Tâi-oân-ōe ê súi, té-ùn ū hoat-hui chhut-lâi bô.

Góa kā múi chi̍t chiuⁿ, múi chi̍t choā, múi-chi̍t-jī, lóng tha̍k chhut siaⁿ, tha̍k kàu Sin-bēng-kì 1:17, kóng “M̄-thang kiaⁿ jīm-hô-lâng, in-ūi lín sī thòe Siōng-tè sím-phòaⁿ ” hō͘ góa siūⁿ tio̍h tī Hiang-káng tiān-iáⁿ lāi-bīn ê lu̍t-su ka̍p hoat-koaⁿ thâu-khak-téng lóng tì chi̍t-téng khiû-mn̂g ê ké-thâu-chang (Wigs in Court) beh piáu-bêng ê ì-gī í-ki̍p tāi-piáu chèng-gī ē ì-sù.

Tān-sī tī Sin-bēng-kì 1:17, téng-bīn hit-kù ōe hō͘ góa chin-put-an, chiū khì chhâ khòaⁿ-māi Pa-khek-lé pán án-chóaⁿ kóng í-ki̍p kî-thaⁿ e̍k-pún, góa koh liân-sòa chhâ saⁿ-chióng pán-pún siá tī ē-bīn lâi tùi-chiàu.

Lán lóng-chai Hiān-tāi-pán e̍k-pún kiông-tiāu kong-lêng tùi-téng goân-chek, chit-sî góa lâi ín-iōng Tâi-oân Kàu-hōe Kong-pò 3353 kî ê 25 pán.

Góa ín-iōng bûn-chiong tē 6, tē 7-2, tē 9 tiám tī Sin-bēng-kì 1:17 ê ēk-hoat.

1、全民台語譯本:審判屬佇上帝。p263(功能對等)
2、巴克禮台語譯本:講法同上。p198,0.0版(形式對等)
3、聖經公會黑皮和合本:審判是屬乎神。p215(形式對等)
4、思高譯本:審判是天主的事。p235(形式對等)
5、現代台語譯本:因為恁是替上帝審判。p322,4.0版(功能對等)

Í-siōng gō͘-chióng pán-pún, góa beh chhéng-kàu lia̍t-ūi sian-chìn, Sin-bēng-kì 1:17 tàu-tóe sī siáng teh sím-phòaⁿ? Sī lâng, sī Siōng-tè, á-sī lâng tāi-thè Siōng-tè teh sím-phòaⁿ? Lán pit-su thê-chhut thó-lūn. Lēng-gōa, lán ê Sèng-keng koan-hē sím-phòaⁿ ê tāi-chì, kám ha̍h tī Eng-kok Sin-kàu ê sìn-gióng thoân-thóng, hoat-koaⁿ tì khiû-mn̂g lâi thè Siōng-tè sím-phòaⁿ ?

廣告/聖經充滿我-經文填充本

我有話要說