Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉陳柏壽
阿公出山ê時因為我是大孫，tio̍h扶佇棺材邊tòe行到庄外ê墓仔地，天氣真清，棺材後面tòe一群庄頭庄尾來ê婦人人，排一列，長長長，其中有一个班長喝開始「哭！」逐家toh做伙出聲大聲哭，嘴攏oân-nā哭oân-nā唸，唸sím-m h話我聽無啥有，若準是講「你thài會hiah早去lah！」入墓了，班長喝停，大家就攏停，無閣哭。我佇長榮大學教冊時，tòa佇學校宿舍，時時聽著歸仁庄裡有人過身ê時，悲哀ê鼓吹kah人ê哭聲，通瞑攏無停。
我做牧師以前，攏想講這款哭墓方式無真好，攏是有哭無目屎，無心。但是最近我ê看法無啥仝款。古早以來各民族各宗教攏有哭墓隊ê記載。中國ê秦始王不但有真大群ê哭墓隊，甚至將王妃、女婢、兵馬、軍隊kap動物攏做伙埋埋入去。偤太人嘛是仝款，耶利米書9章17節嘛有記載「著招歸群哭墓ê婦人人」出來哭墓，是一種宗教祭典。人間ê哭墓不但是對死者ê悲傷，也是對世間ê無情kah無常ê反抗。
咱對月娘既成ê印象kah日頭無仝，日形是無變，但是月娘常常予詩人擬人化、羅漫蒂克化，因為月娘每時咧變形，有新月、上弦月、滿月、下弦月、殘月等等，但是通常咱無注意ê一點是月娘永遠向地球ê一爿，每個月、每一年攏固定維持固定ê一面，向地球leh se̍h。咱人所看著ê月娘ê一面永遠是仝一面，就是月娘向地球彼面，月娘ê另外彼面永遠藏佇後面，世間人無人知影另外彼邊烏暗ê月娘究竟是生做sím-mi̍h款？
聖經中記載悲傷艱苦kah目屎較濟，歡喜kah笑面較少。主耶穌一世人kap破病人、艱苦人、死失、破相、犯著鬼、娼妓、罪人、放蕩囝等等做伙。當伊醫好去hō͘魔神仔khip tio̍h ê囡仔ê時，囡仔ê老爸拜耶穌，講：「主啊，我是罪人，願祢赦免我！」（馬可福音9章24節）。主耶穌將這世間所有ê艱苦病疼死失、目屎，攏總kā khoán-khoán–leh、清清–leh、綣綣–leh、包包–leh，攏總囥落去月娘ê另外彼爿安靜ê所在，收留佇hia。
人欲瞭解上帝無簡單，印度Calcutta ê聖女Mother Teresa嘛講：「我愈揣上帝，愈揣無上帝。我kah上帝中間有一个空白kah深ê烏暗ê空間。」實在上帝嘛是活佇烏暗ê所在，佇月娘ê另外彼爿。佇彼所在ê上帝，上歹hō͘人瞭解。上帝欲hō͘人瞭解ê部分，不過是上帝賜人ê「恩典」。
有人講月娘kah上帝仝款有二个面，上帝有憐憫慈悲kah正義ê二面。月娘嘛是：月娘向咱ê彼面，就是光面、慈善、詩人歡喜唱歌ê一面；月娘有另外彼面，嘛是上帝ê創造，就是嚴肅、安靜、正義無妥協ê彼面。咱人人生結束ê時就是欲轉去彼个安靜、嚴肅ê上帝ê正義彼面。月娘烏暗ê彼面，不但代表上帝正義ê一面，嘛是代表上帝ê悲情，代表上帝承擔世間一切ê艱苦、上帝ê疼kah受苦ê一面，上帝將彼面藏佇烏暗ê所在。
世間人較需要ê就是上帝賞賜咱有一个烏暗ê所在，因為he代表上帝ê恩典。主耶穌講：「恁所有勞苦擔重擔ê人tio̍h來我chia，我欲hō͘恁得tio̍h安歇。」（馬太福音11章28節）保羅嘛講咱著將一切勞苦、掛慮、重擔一盡交代互上帝，上帝會將chiah-ê攏總囥入去彼個「永古隱藏不言ê奧祕」ê所在（羅馬書16章5節）來堅固咱ê心，彼个所在就是咱看袂著ê月娘後面ê烏暗面，佇hia無日頭赤焱焱。彼所在應該就是咱ê靈魂安歇kah平安ê所在，是上帝為咱備辦ê，上帝將世間所有死失、艱苦收留佇hia，佇hia咱嘛會當kah地球咱ê親人接近。咱人看若準是世間否定不完美ê一部分，實在是完美ê上帝ê一部分。烏暗爿ê月娘也是上帝創造ê完美ê一部分，咱也著感謝伊。
印度詩人泰戈爾有講：「死是性命ê一部分」，「醜是無完全ê美」，「惡是無完全ê善」。佇《飛鳥集》伊按呢寫：
「這是一場夢，一切事物攏散漫佇hia leh壓迫我。當我醒來，我ē看tio̍h hia-ê攏已經聚集佇上帝你hia。按呢，我就得著自由lah！」（詩152）
「性命ê黃昏親像一個窗仔，窗內有點一pha燈，內面有一个人leh等待。」（詩#183）
「太陽向西方落去ê時，伊早起ê月娘已經靜靜佇東方，徛佇伊ê面前。」（詩#205）
