◉陳柏壽
Kah其他福音書比，路加描寫主耶穌來招掠漁人做學生ê故事上活跳有情（路加福音5章1～11節）。伊招ê學生是佇加利利海邊，學生大部分是討魚人，一世人靠討魚過日。耶穌來到位，看in攏teh討魚，叫in kā網pha去另外彼爿看māi。Hia ê掠魚人，特別是彼个chhōa頭ê彼得，講：「耶穌！阮已經舞規日規瞑舞無半尾，阮一世人佇chia掠魚討食，一世人是靠漁網過日，你kiám有影比阮卡ba̍t？」「好lah！照你ê意思，阮tō來pha網去另外彼爿看māi？！」
真正想袂到，規網lóng是魚，tîⁿ–tīⁿ-tīⁿ，魚濟到船kiōng-kiōng 欲沉落去。
彼得phak佇耶穌ê跤前，kā耶穌講：「主啊！請離開我，因為我是罪人！」
咱台灣人佇這款情形下，第一項心內會想、喙會講ê代誌，毋是去想tio̍h「我是罪人」這款代誌？！「罪人」這个觀念，對咱來講可能是十八天地外lah。
湖面佇這个深秋ê季節，無論pha有魚pha無魚，一擺pha落去，網pha入水，湖面ê水一擺閣一擺回復平靜。掠魚人知影人生本成就是按呢，一次閣一次，一網閣一網，giú起來閣pha落去，規暗規日按呢繼續，有魚無魚，mā tio̍h認份。上帝hō͘ in ê人生kah咱kāng款，本來就是按呢，一工閣一工繼續落去。今仔日過了等mî-á-chài，等待閣再等待。In人生ê一切就是靠這个漁網，漁網就是in人生ê一切。
一直等到主耶穌開喙講：「Pha落去另外彼爿看māi咧！」In雖然心猶存疑，但是mā無法度，這是最後一步，無其他步lah！
Chi̍t-má，真平靜ê水面忽然起大波，魚仔忽然濟到跳起來水面，頭前ê路起狂，想mā想袂到，世間ê代誌thài會變hiah緊，光景thài會變遐快。掠魚ê學生目睭起金，心肝起花，毋知beh按怎才好……
我想tio̍h過去，人生kiâⁿ來到chia，mā有真濟時陣進無步、退無路。但是mā有真濟時陣，我kā家己講：「Chhân-chhâ–ah kā網pha過彼邊看māi咧！」
講chhàu-tú-khám實在真歹勢，實在真正是上帝咧開路。Hiàng-sî上帝叫我將網pha去日本，我規家伙lóng搬搬去，佇遐，酸鹹苦chiáⁿ ê日子卡濟，只有櫻花開ê時陣，心情有khah開，一个人佇地下鐵ê火車內流目屎。按呢閣過15年，上帝閣開喙叫我將網pha去美國，佇hia，海閣khah闊，水閣khah深。全家初次去Manhattan，為tio̍h beh省錢，叫一份hamburger，分做3舟，3人分做伙食，來到美國mā是儉腸neh肚，生活毋敢討債。Taⁿ， 囡仔lóng大漢，隨人去lah。二个老歲仔，加拿大北爿吹來ê冷風真利，棉被giú hō͘ ân，無法度期待囡仔來有孝，一人一家代，阮lóng看會開，萬事交託天父上帝。
咱就是親像一个職業ê討魚人，手內這个漁網毋知已經pha過幾千幾萬擺。總是佇咱這个人生ê大海，咱bat躊躇過：閣落去beh按怎？Beh pha正爿抑是pha倒爿，beh pha近水抑是深水？這个網完全佇你手內，你完全家己決定閣落去彼步beh按怎行。我ê人生beh繼續靠這个網beh kiâⁿ偌久，pha偌遠，閣落去beh去tó-ūi？
主耶穌講：「我beh hō͘恁tit-tio̍h性命，而且 tit-tio̍h閣khah豐盛！」（約翰福音10章10節）親像滿滿網ê魚仔，你kiám káⁿ接受？你kiám真正káⁿ pha網，pha離開你逐日習慣ê環境，去到另外彼爿？
主耶穌並無要求咱siuⁿ-chē，伊kan-taⁿ叫咱勇敢離開咱既成ê環境kah慣勢，chhun ê lóng交代hō͘伊，伊會為咱設法，魚仔家己會入網。
做一个基督徒有一項人生ê特權，就是佇進無路退無步ê時陣，猶有chhun最後一步，就是求叫上帝，求上帝無一定hō͘我滿網到tīⁿ–tīⁿ ê魚，濟少，上帝啊，hō͘我有位通去，hō͘我ê某囝有溫飽，hō͘我會當順順仔kiâⁿ–lo̍h-khì 就好。
