Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉李南衡
「請教福伯，為tio̍h 2024年總統大選候選人初選，中國國民黨有幾个有想beh拚初選提名。黨內意見真濟，甚至有中國國民黨政策會執行長曾銘宗chit種人，反對黨內總統提名初選，講提名初選會留tio̍h後遺症，會對整合不利。孫文學校總校長張亞中教授發出新聞稿剾削講，若是chit種講法會成立，中國國民黨應該建議總統府，為tio̍h避免選舉造成台灣無團結，產生後遺症，2024不如tio̍h用協調式徵召來產生總統。伊講，初選是制度m̄是麵chhè想beh按怎liap tio̍h按怎liap。福伯你講伊按呢講敢有道理？」
福伯笑：「張亞中教授祖籍中國山西省算是北方ê人，慣勢食麵食，才會講初選是制度m̄是麵chhè想beh按怎liap tio̍h按怎liap。伊chit句話換作咱台灣人會講『麻糍手內出。（Môa-chî chhiú-lāi chhut.）』意思是講麻糍佇主事者ê手內，beh liap偌大粒偌細粒，出在主事者ê意思。Chit句台灣俗語話延伸作大權佇主事者ê手內，生死出在伊決定。我緊插嘴講：「福伯，張亞中教授剾削中國國民黨ê總統提名初選制度變來變去無原則，按呢講敢tio̍h？你煞講到麻糍去。」
福伯應講：「中國國民黨堅守ê一个原則tio̍h是：『無原則。』2016年中國國民黨總統候選人初選提名，洪秀柱是中國國民黨初選中唯一登記參選ê候選人，初選民調mā順利通過。7月19，中國國民黨全國代表大會中無異議拍噗仔通過。10月17，中國國民黨中央委員會召開臨時全國代表大會，決定廢止洪秀柱ê提名，改徵召當時新北市市長兼中國國民黨主席朱立倫參選總統。Che tio̍h是麻糍佇黨主席ê手內liap一下，總統候選人煞變作黨主席本人。你講che是啥物制度？
2020年ê總統大選初選提名，中國國民黨mā是仝款麻糍出在黨主席liap。2019年4月中，郭台銘講有考慮會經過中國國民黨初選程序參選總統，當時黨內對伊ê黨籍問題有各種爭議，當時ê黨主席吳敦義落去liap一粒麻糍，4月17佇中常會親身送郭台銘『中國國民黨中央委員會榮譽狀」，稱呼伊『同志」、『黨員』，郭台銘當場宣布beh參加中國國民黨總統初選。中國國民黨煞陷入初選辦法ê制度之爭。吳敦義只好koh liap一粒麻糍徵召抑是特邀韓國瑜參加初選，韓國瑜bē爽，甚至發聲明講『無法度參加現行制度ê初選』，路尾才koh liap一粒麻糍：同意伊納入初選民調，那像伊是『被動參選』。」
2024年總統大選初選，中國國民黨主席朱立倫手內會liap出啥款ê麻糍，逐個目睭金金teh看。「麻糍手內出」chit句台灣俗語話應該會koh流傳一站。
