Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
請教福伯按怎看chit遍南投縣立法委員補選？福伯講：「2022年11月26 ê九合一大選，原任立法委員許淑華當選南投縣縣長，依法tio̍h辭掉立委職，2023年3月初4舉行立委補選。Chit遍補選ê南投縣第二選區，是包括南投市、名間鄉、集集鎮、竹山鎮、鹿谷鄉、水里鄉kah信義鄉ê濁水溪線選區。民進黨推蔡培慧出馬，中國國民黨提名林明溱，想講抵抵卸任縣長ê林明溱bat作過兩任縣長、兩任立法委員，ē-sái講是南投第一勇。果然無錯，起頭ê民調林明溱贏蔡培慧15%左右。」我插喙問講：「選舉結果那會顛倒蔡培慧選嬴咧？」
福伯講：「蔡培慧真拚勢以外，上重要是伊提出ê兩个政見縣民聽會落去。第一，伊講伊若當選立委，一定會認真爭取佇南投縣設立一間大型ê綜合病院。你想看覓，南投縣佇台灣島ê正中央，koh是土地面積第二大ê一个縣，全台灣差不多每一个縣市攏有一間甚至兩、三間大型綜合病院，南投縣卻無半間。伊ê政見會拍動縣民ê心，真濟人票tio̍h投hō͘伊。第二，伊若kah林明溱比錢ē-sái講是散赤人，但是伊講伊若當選，選舉補助一票30元ê錢，攏總捐出來做公益。Chit點mā感動真濟kah伊仝款ê散赤人票投hō͘伊。」
「選戰到尾期上激烈ê時陣，民進黨陣營質疑林明溱ùi 2015年到2022年連續作八年縣長，那會無能力處理南投縣ê糞埽咧？頭起先林明溱怪講前台中市長林佳龍無beh幫忙。隨時hō͘林佳龍市長任內ê新聞局長、現時新北市議員卓冠廷佇面冊頂面kā拍銃講：『台中市長林佳龍4年任內，幫南投縣處理5萬7,000噸糞埽，中國國民黨盧秀燕作台中市長以後，干單協助南投縣處理3,000噸糞埽，而且ùi 2020年tio̍h完全停止，che才造成南投縣近年來ê糞埽危機。』」
「2月28，中國國民黨發言人林家興講：『南投縣糞埽問題是全縣無一座糞埽焚化爐，起頭是因為2004年中央民進黨執政時期ê環保署指示南投縣取消興建糞埽焚化爐計畫。講tio̍h那像2004年到taⁿ中央一直是民進黨執政。2008年至2014年林明溱有作6年ê南投縣立委，hit當時中央是中國國民黨執政、總統叫作馬英九。是按怎林明溱攏無向中央反應南投縣需要一座糞埽焚化爐咧？莫怪2004年當時陳水扁總統ê後生、高雄市議員陳致中會跳出來罵講：『Bē曉駛船嫌溪狹（Bē-hiáu sái-chûn hiâm khe-e̍h）！』」
我問福伯：「阮攏習慣講『Bē曉駛船嫌溪彎（Bē-hiáu sái-chûn hiâm khe-oan）！』」福伯笑講：「Che tio̍h是方言差，一句俗話佇台灣逐所在可能有小可精差ê講法，意思攏仝款是講一个bē曉駛船ê tiāⁿ-tiāⁿ lòng tio̍h溪岸，煞怪溪狹。陳致中是罵bē曉執政ê林明溱怪東怪西。」
