Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎陳柏壽
細漢讀國校ê時tiāⁿ tòe老爸經過梅山、阿里山、草嶺、樟湖，佇遐遠遠khòaⁿ ē tio̍h玉山。阮爸kā阮講彼粒就是咱台灣上懸ê山，山尖猶有崁雪，有時會chhèng煙。到今，年紀雖大，心中猶原有彼粒我懷念kah光榮ê聖山，伊親像一葩火佇遐咧chhōa台灣人ê進路。
細漢ê時人就教咱：「人tio̍h向懸行，水向下流」「人tio̍h逆水行舟，不進者退」向下流叫做「下流」，無啥物好意思。人ê一生tio̍h向頂面peh，peh起lih tio̍h閣再peh，毋通落蓑，毋通落第。這个道理變做咱人生ê通則，變做咱ê哲理。
Tòa西雅圖二十年才發現一个現象：遮个人佇落雨天ê時，無論大人囡仔，尤其是學生，tiāⁿ-tiāⁿ佇雨中行路，無giâ雨傘，無穿hō͘-moa，hō͘雨水對頭殼流到褲跤，真自然，親像用雨水teh行洗禮。因為是雨城，雨chāi in看是歡喜kah祝福ê象徵。咱ê運命有時親像水teh流，順順仔流，流入去土跤，流入去池仔kah大湖，進入大海，一直到hňg–hn̄g-hn̄g（遠遠遠），到水連天，天連水ê水平線。佇hia就是kah上帝接近ê所在。
主耶穌出來傳道理ê時，有講一句話：「人tio̍h對『水』kah「聖神」來得tio̍h重頭生」（約翰福音3章5節）。我想，「聖神」ê意思應該是「火」。日本ê職人鍊劍毋是干單靠火，mā tio̍h靠水，有火kah有水，才有法度將鐵鍊純變做鋼，純鋼才有法度變做利劍。主耶穌意思是講人ê靈魂欲精煉tio̍h用火kah水去精煉才有法度清氣，人ê靈魂清氣chiah ē-tàng重頭生，chiah ē-tàng入去上帝國。主耶穌講遮ê代誌毋是teh講地面上ê代誌，是teh講天頂ê代誌。天頂ê代誌是用水kah火結連才有法度達成。我想，神學就是欲探討人生中「水」kah「 火」ê關係：怎樣將這兩項人看做是對立ê元素合一配合運用，怎樣將「服從」kah「反抗」囥入去家己ê理念kah行動ê指針，來完成做一个完整ê人ê價值。
人生無法度無服從運命ê支配，有真濟時陣運命會支配咱ê人生，親像前任日本總理大臣安倍晉三忽然受暗殺，完全毋是伊家己ē-tàng支配。咱ê運命有時就是親像水leh流，順順仔流，流入去上帝遐，親像安倍先生按呢。
另外一面人ê性命就是tio̍h照主耶穌ê吩咐，愛親像一pha火向頂面𤏸，一直𤏸，毋通hoa，親像古早摩西看tio̍h佇刺phè內面𤏸ê火kāng-khoán（仝款），引𤆬咱進前。有一pha火𤆬路，人活teh才有意義。
古早人講水火不相容。我想，性命內面水kah火是一體共存ê，咱ê靈魂內面ê水kah火是辯證ê兩面，ná親像關仔嶺公園kah美國黃石公園內面水火同源ê現象kāng-khoán，欠一項就袂使。上帝安排咱ê性命內面有水kah火共存，就是愛咱知咱性命內面本來就是應該有這兩項元素。咱信上帝ê人tio̍h有信心，啥物時陣上帝ài咱行「水」ê路或是行「火」ê路，毋免躊躇，mā毋免勉強，知影上帝疼惜伊ê囝兒，伊一定留一條好ê路hō͘咱，咱tio̍h有信心。
